Mako 5

Yesu akangwisa munalume wa minzinzime yakujwala

(Mateo 8:28-34; Luka 8:26-39)

1Yesu na vandongisi vendi vezile musambwa ya Lishali lya Ngalileya mu lifuti lya Ngelasa. 2Co omo Yesu watundile mu vwato, waliwanene na munalume umo watundile ku viilo. Uje munalume wakele na munzinzime wakujwala, 3co wakele mukati ka viilo. Co munu naumo wai wasele kumukuta nameme na malyenge, 4Omwo visimbu vyavingi vakutile mendi endi na tukunju, co mavoko endi vawakutile na malyenge, oloni visimbu vyoshe wakele nakuvatozola malyenge nakupokozola tukunju poko-poko. Co wakele manene na nzili, co naumo wai wasele kumwononwesa. 5Mutanya na vutsiki wakele nakwendangana mukati ka viilo na mu malundu, co wakele nakukangoka manene nakulilengozola ikeye vavenya na mamanya.

6Co omo wakele alyala wamwene Yesu, ngecivene, washatukile, watsikamene a mavuli ku mesho endi, 7co wakangokele na lijwi lyakama ngwendi, “Vika ushaka kulinga nange ove Yesu, Muna Njambi wa Akamwa ya Vyoshe? Omwo a lizina lya Njambi, njikulomba ngwange, kesi unjihise embwe!” ( 8Ou munalume wendekele evi omwo Yesu wendekele kuli ikeye ngwendi, “Ove munzinzime wakujwala, tunda muli munu ou!”)

9Ngecivene, Yesu wamwihwile ngwendi, “Lizina lyove yove iya?”

Ikeye wamukumbulwile ngwendi, “Lizina lyange yange ‘Mbunga’ omwo twapwa tuvavangi!” 10Co walombele manene Yesu ngeci kesi ashekele ije minzinzime yakujwala anja ya lifuti lije.

11Kuje kwakele vutanga vwakama vwa vingulu vakele nakulya kumukulo wa lilundu. 12Co ije minzinzime yakujwala yalombele Yesu ngwayo, “Tutume ku vingulu, tukakovele muli vakevo.” 13Ngecivene, waitavele, co ije minzinzime yakujwala yatundile muli uje munu, co yakakovelele mu vutanga vwa vingulu. Co vutanga vwoshe vwa vingulu vapwile 2,000, vwashatukilile mu lishali, co vwanyongelelemo.

14Vanu vaka-kunyunga vingulu vashatukilile ku nganda vakambulwile vin̄anda vyoshe kuje na kuli vaka-kulima. Co vanu vaileko nakukamona vije vyalingiwile, 15co omo vezile kuli Yesu, co vamwene munalume uje wakele na mbunga ya minzinzime yakujwala natumbama kuje, nazala mwamuvwa nalikongomeka, co voshe vakele na lyova. 16Co vaje vamwene vije vyalingile vambulwile kuli vanu vije vyalingiwile kuli uje munalume muka-minzinzime yakujwala, na kuli vingulu.

17Ngecivene, valombele Yesu atunde mu lifuti lyavo.

18Co omo Yesu wakovelele mu vwato, uje munalume wakele na minzinzime yakujwala wamulambelelele ngwendi, “Njitave njiye amo nove!”

19Oloni Yesu kamutavele embwe. Wamulekele ngwendi, “Iluka kwimbo kuli vavushoko vwove ngeci ukavaleke evi vyanakulingila Mwene na muje mwanakuzivilako mema ku mbunge.”

20Ngecivene, uje munalume wetile mu Vinganda Likumi, nakuvaleka vije vyamulingilile Yesu. Co voshe vavizivile valikomokelele.

Muna Njailosi wa mumbanda na munakazi uje wakwatele ku cikoveyo ca Yesu

(Mateo 9:18-26; Luka 8:40-56)

21Co omo Yesu wajavukilile lalo musambwa ya lishali ku mutambela ukwavo. Kuje ku kenge ya lishali kwakele mbunga yakama yamuzengelekele. 22Asinoni kwezile Njailosi, ntwama wa sinangonge, co omo wamwene Yesu, watsikamene ku myanja ya Yesu, 23co wamulambelelele manene na kasingimiko ngwendi, “Munange wamundondo wa munakazi alinakuvinja manene. Tuye ukamukambeke mavoko, ngecivene, akakanguke!”

24Co Yesu waile amo nendi. Ngecivene, vanu vavangi vaile amo na Yesu, co ije mbunga yamuzengelekele noku-noku.

25Co kwakele munakazi umo wakele na mushongo wakukomokesa wakwita maninga myaka likumi na ivali, 26co vimbanda vavangi vamusakele. Washandwele vimbongo vyendi vyavingi, oloni nameme ngoco kakangukile, mushongo wahyanene manene. 27Ikeye wazivile lutsimo lwa Yesu, co wezile munima ya mbunga ya vanu, 28omwo wendekele mu mbunge yendi ngwendi, “Nga njikwata lika ku mukundwilo wa cikoveyo cendi, njikanguka.”

29Co omo wakwatele ku mukundwilo wa cikoveyo ca Yesu, aje vene maninga omine cau, co wazivile mu muvila wendi ngeci nakanguka ku mushongo wendi. 30Co Yesu wazivukile ngeci nzili inamutundu mu muvila wendi, watengulukilile ku mbunga, co wehwile ngwendi, “Iya nakwata ku cikoveyo cange?”

31Co vandongisi vendi vamukumbulwile ngwavo, “Unamono vanu muvali nakukuzengeleka? Co wihula vati ngwove iya nanjikwata?”

32Oloni Yesu wakengezekele amone iya namukwata. 33Oloni uje munakazi wazivukile vije vyalingiwile kuli ikeye, wezile nakujaja na lyova, co wawililile ku myanja ya Yesu, co wamulekele vushunga vwoshe. 34Yesu wendekele kuli ikeye ngwendi, “Munange, kukulaela kwove kunakukangwisa. Ya mu kwoloka, co kanguka ku mushongo wove.”

35Omo Yesu acili nakwendeka evi, vamo miluwa vezile vatundile ku njuvo ya Njailosi, vamulekele ngwavo, “Munove natsi. Vikajo upakesela Mulongisi?”

36Oloni Yesu kombileko mbunge#5:36 OLONI YESU KOMBILEKO MBUNGE: Nambe, Yesu wazivile. ku lijwi lije livendekele, oloni walekele Njailosi ngwendi, “Kesi uzive lyova, kulaela lika.” 37Co katavesele munu weka kuya amo nendi kuvanga lika Petulu na Yakomba na shongo yendi Yowano. 38Omo Yesu wetele ku njuvo ya Njailosi, wamwene vitanga, co wazivile kulila kwakama nakukangoka. 39Co omo wakovelele mu njuvo, wendekele kuli vakevo ngwendi, “Omwo vikajo mulingila muyoyo ngeci? Omwo vika mulinakulilila ngeci? Ou mwanike katsile embwe, oloni nalala lika tulo!”

40Co vanu voshe vamujolele, oloni voshe wavashekelele anja, co wakovelelemo lika na ishe ya mwanike na vaina na vandongisi vendi vatatu, co vakovelele ku mulili kuje kwalalele uje mwanike. 41Ikeye wakwatele ku livoko lya uje mwanike, co wendekele kuli ikeye ngwendi, “Talita kumi,” kulumbununa ngwavo, “Mwanike wa munakazi, njikuleka ngwange induka!”

42Co aje vene wendukile, co washangumukile kwenda. (Wakele na myaka likumi na ivali.) Omo evi vyalingiwile, valikomokelele manene. 43Oloni Yesu wavasin̄ikile manene ngwendi kesi valekeko munu umo, co wavalekele ngwendi, “Mwaneni vyakulya alye.”

Currently Selected:

Mako 5: MBB

Highlight

Compare

Copy