Mako 7

Vilongesa vya vakukulwila

(Mateo 15:1-9)

1VaFaliseo vamo na valongisi va majwi a Lishiko vaje vatundile ku Yelusalema vakungulukilile kuli Yesu. 2Vamwene ngeci vandongisi vendi vamo valile vyakulya vyavo kujeneka kujwela ku mavoko, kuvajwelele ngwe mu ngila ije ivendekele vaFaliseo ku vanu ngeci valingemo.

( 3Omwo vaFaliseo, na vaYunda, vakavele vilongesa vije vatambwile kuli vakukulwila vavo, kuvasele kulya ngoco kuvanga kujwela mwamuvwa ku mavoko avo, 4co lalo kuvasele kulya cuma cakutunda kuje kwakulandesela kuvanga vacikushe akulivanga.#7:4 KUVANGA VACIKUSHE AKULIVANGA: Nambe, kuvanga vakevo vavenya vajwele akulivanga. Vakavangeyeye mashiko akwavo amangi aje avatambwile, ngwe kukusha vinganja, na vindeo, na malonga, na milili.)#7:4 NA MULILI: Kunungulula kumo majwi awa, na mulili aimo.

5Ngecivene, vaFaliseo na valongisi va majwi a Lishiko vehwile Yesu ngwavo, “Omwo vikajo vandongisi vove vakaleulula vilongesa vya vakukulwila vetu? Vakevo kuvesi kujwela ku mavoko omo valya!”

6 # Isa 29:13 Co Yesu wavakumbulwile ngwendi, “Yeni vaka-civembulu! Isaya Muka-kwimanena wambulwile mwamuvwa vyeni ngwendi,

‘Njambi ngwendi, vanu ava valinakunjisingimika lika na majwi avo,

oloni vimbunge vyavo vili kulyala nange.

7Cinapu cangoco kuli vakevo kunjilemesa

omwo vakevo valinakulongesa mashiko a vanu

ngwe akewo anapu mashiko ange!’

8“Yeni munaka mashiko a Njambi kumukulo, co mulinakwononoka vilongesa vya vanu.”

9Co Yesu wendekele lalo ngwendi, “Yeni munaleulula mashiko a Njambi ngeci mukave vilongesa vyeni. 10#Kut 20:12; 21:17; VaLe 20:9; Kwi 5:16 Omwo Mosesa washikile ngwendi, ‘Singimika isho na vanyoko.’ Co, ‘Woshe uje asinga ishe nambe vaina vanapande kumutsiya.’ 11Oloni yeni mukalongesa ngweni, nga munu ali na cuma cimo cije asa kukwasa naco ishe nambe vaina, oloni endeka ngwendi, ‘Evi vinapu Ngolevani,’ (kulumbununa ngwavo, eci cakundama kuli Njambi,) 12asinoni ikeye nalisambesa akukwasa ishe nambe vaina. 13Mu ngila eyivene munatengulula majwi a Njambi kuwapwisa angoco na vilongesa mulinakulongesa vakweni. Co kuvili vyuma vyavingi vyakufwa ngacije vije vimukalingi.”

Vyuma vije vilingisa munu kupwa wakujwala

(Mateo 15:10-20)

14Asinoni Yesu wasanene ije mbunga vaije kuli ikeye, co wendekele navo ngwendi, “Njitolilileni yeni voshe, co muzivisise. 15Navimo vyai vili anja vikovela muli munu, vyasa kumuviisa. Oloni vije vituuka muli munu, vikevyo vimuviisa.” 16Tolilileni, uje woshe ali na matwi, azive!#7:16 TOLILILENI, UJE WOSHE ALI NA MATWI, AZIVE: Kunungulula kumo vesi 16 yaimo.

17Co omo Yesu wasezele ije mbunga wakovelele mu njuvo, vandongisi vendi vamwihwile a cisimo eci. Co Yesu wendekele kuli vakevo ngwendi, 18“Kuma neni lalo kumuzivuka mwaila mana awa kutuvakana veka ndi? Kuma kumwazivukile? Navimo vyai vili anja vikovela muli munu vyasa kumuviisa, 19omwo kuvikovela mu mbunge yendi embwe, oloni vikovela mwimo lyendi, co vituuka lalo anja kutunda mu muvila wendi.” (Akwendeka evi, Yesu watavesele ngeci vyakulya vyoshe vanapande kuvilya.)

20Co Yesu wendekele lalo ngwendi, “Vije vitunda muli munu vikevyo vimuviisa. 21Omwo mukati, mu mbunge ya munu, mukemwo mukatundu viyongola vyavivi vije vimutwamenena ku vyuma vya vuvi, kwiva, kutsiya, 22kulinga vupangala, kuliveya, nakulinga vyuma vyoshe vya vivi, kukwisa, mashungu amavi, cipululu, vungumba, kulyalesa, na vulema, 23evi vyuma vyoshe vyavivi vikevyo vituuka mukati ka munu nakumuviisa.”

Kukulaela kwa munakazi

(Mateo 15:21-28)

24Asinoni Yesu watundile ku mutambela uje waile ku lifuti lya kuyehi na nganda ya Tile. Co wakovelele mu njuvo kashakele munu umo amuzivuke ngeci ali kuje, oloni kasele kuvanda. 25Co munakazi umo, munendi wakele na munzinzime wakujwala, wazivile Yesu, co aje vene wezile kuli Yesu wawililile ku myanja yendi. 26Munakazi uje kesi kaYunda, wasemukilile mu Fonisiya mu Silya. Co walambelelele Yesu ngeci atundise munzinzime wakujwala muli munendi. 27Oloni Yesu wamukumbulwile ngwendi, “Akulivanga tuciliseni vanike tai. Kesi mwamuvwa kwana vyakulya vya vanike ku tutali.”

28Oloni wamukumbulwile ngwendi, “Eyo mwane, oloni nameme vene tutali vakali vungululu vuje vukau ku mesa ya vanike!”

29Ngecivene, Yesu wendekele kuli ikeye ngwendi, “Omwo akukumbulula kwangacije, njikuleka ngwange ya kwimbo, ukawana munzinzime wakujwala unatundu laja muli munove!”

30Co welukile kwimbo, co wakawanene mwanike nalala a vulili, uje munzinzime wakujwala watundile muli munendi.

Yesu akangwisa kasinda-matwi na vuveveve

31Asinoni Yesu watundile ku lifuti lya Tile, co waile ku Sindone nakweta ku Lishali lya Ngalileya, co watuvakanene mu lifuti lya Vinganda Likumi. 32Co vanu vamo vamunenelele munalume umo wakusinda-matwi, co wakele lalo na kalaka, co valambelelele Yesu ngeci akambeke mavoko endi ali ikeye. 33Ngecivene, Yesu wamutwalele kwendi lika, kulyala na vanu, co waakele milavo yendi mu matwi a uje munalume, wajekwile mate, co wakwatele ndaka ya uje munalume. 34Asinoni Yesu wakengele mwilu, walisisumwine, wendekele kuli uje munalume ngwendi, “Efefata.” Kulumbununa ngwavo, “Shokolola!”

35Co aje vene matwi endi azikukile, na kalaka lalo kamutundile, washangumukile kwendeka mwamuvwa. 36Asinoni Yesu wasin̄ikile vanu ngeci kesi valekeko munu a cuma eci, oloni nameme wavasin̄ikile ngeci kesi vambulule, vakevo vambulwile na nzili. 37Co voshe vaje vavizivile valikomokelele ngwavo, “Alinakulinga vyoshe mwamuvwa! Nameme tusinda-matwi vaziva na tuveveve vendeka!”

Currently Selected:

Mako 7: MBB

Highlight

Compare

Copy