Mako 4

Cisimo ca muka-kukuva

(Mateo 13:1-9; Luka 8:4-8)

1 # Luk 5:1-3 Yesu washangumukile lalo kulongesa vanu ku kenge ya Lishali lya Ngalileya. Co mbunga yakama vakungulukile kuli ikeye nakumuzengeleka, ngecivene, wakovelele mu vwato nakutumbamamo. Vwato vwakele mu lishali alyala kamandondo, co vanu vemanene a nunda ku kenge ya mema. 2Co wavalongesele vyuma vyavingi na visimo ngwendi,

3“Tolilileni! Kwakele munalume umo waile nakukuva mbuto. 4Co omo wakele nakukuva vimbuto mu lihya, vimo vyawililile kumukulo wa ngila, co tuzila vezile nakuvilya. 5Vimbuto vikwavo vyawililile a mamanya aje kwaakele livu lyalingi. Co vwasi-vwasi vije vimbuto vyashangumukile kumena, omwo kwaakele livu lyalingi. 6Co omo litangwa lyatuukile, nakutwa litanya, co vije vimbuto vyajujwamene, omwo mizi yavyo kuyakovelele manene mu livu, co vije vimbuto vyomine vwasi cau. 7Vimbuto vikwavo vyawililile mukati ka mambimbo, co aje mambimbo akulile avitivile, co vije vimbuto kuvyemine. 8Oloni vimbuto vikwavo vyawililile ku livu lya vwilo, vyamenene, vyakolele, co vyemine, vimo vyemine vimbuto makumi atatu, vikwavo vyemine vimbuto makumi atanu na limo, co vikwavo vyemine vimbuto 100.”

9Co Yesu wamanesele kwendeka ngwendi, “Uje woshe ali na matwi, azive!”

Vutumbe vwa visimo

(Mateo 13:10-17; Luka 8:9-10)

10Omo Yesu wakele endi lika, vamo vaje vazivile vyendekele, na vandongisi vendi vezile kuli ikeye vamwihwile avalumbunwine vije visimo. 11Co Yesu wavakumbulwile ngwendi, “Yeni vanamyana kuzivuka vyuma vya Vumwene vwa Njambi, oloni kuli ava vali anja, vakaziva muvinalumbunukila vyuma vyoshe kuvanga na visimo, 12#Isa 6:9-10 ngecivene,

‘Kumona vamona, oloni kuvakamonesesa,

co kuziva vaziva, oloni kuvazivisisa.

Omwo nga valingamo,

vakatengulukila kuli Njambi,

co akavasambesa!’ ”

Yesu alumbununa cisimo ca muka-kukuva

(Mateo 13:18-23; Luka 8:11-15)

13Asinoni Yesu wavehwile ngwendi, “Kuma kumwazivukile mucalumbunukila cisimo eci ndi? Vatijo mwasa kuzivisisa visimo vikwavo? 14Muka-kukuva akuva lijwi lya Njambi. 15Co vanu vamo vanapu ngwe vimbuto vije vyawililile kumukulo wa ngila, vwasi-vwasi omo vakevo vaziva lijwi, co Satana aija nakulitundisa. 16Co lalo vanu vamo vanapu ngwe vimbuto vije vyawililile a mamanya. Omo vakevo vaziva lijwi, co valitambula vwasi-vwasi nakuvwaelela. 17Co kulyesi na mizi muli vakevo, co kuvasa kwishwala embwe. Ngecivene, omo tuyando nambe mapakeso vija omwo lijwi, aje vene veluka munima. 18Co vanu vamo lalo vanapu ngwe vimbuto vakuvile mukati ka mambimbo. Ava vakevo vaziva lijwi, 19oloni akulishoshomwena kwa ano asi, nakuzema vufuko, na vyeka lalo vyavingi vya mashungu akuliseza-seza vivazengeleka vitinikisa lijwi, co kuvasa kwima vushuka. 20Oloni vanu vamo vanapu ngwe vimbuto vije vyawililile ku livu lya vwilo. Vakevo vaje vaziva lijwi, nakulitambula, co vaima vushuka, vimo makumi atatu, vikwavo makumi atanu na limo, co vikwavo 100.”

Ndeya ya mwisi ya lyendeko

(Luka 8:16-18)

21 # Mat 5:15; Luk 11:33 Co Yesu wendekele lalo ngwendi, “Kuma umo asa kwambata ndeya, co ayaka mwisi ya lyendeko nambe mwisi ya vulili ndi? Kuma kakayaka a citumbikilo ca vindeya ndi? 22#Mat 10:26; Luk 12:2 Omwo kukwesi cuma cakushweka kuvanga cisholoke, co cuma coshe cakufwika kuvanga cifukuke. 23Uje woshe ali na matwi, azive!”

24 # Mat 7:2; Luk 6:38 Co lalo wendekele kuli vakevo ngwendi, “Tolilileni kuli evi mulinakuziva! Mashiko aje vene mukasompo nawo vakweni akewo lalo Njambi akamisompa nawo, oloni yeni vakamiwezelelako. 25#Mat 13:12; 25:29; Luk 19:26 Omwo uje ali na vyuma vakamuwezelelako lalo, co uje kesi navyo vakamunyeka nameme vyuma vyavindondo vije alinavyo.”

Cisimo ca mbuto yakumena

26Co Yesu wendekele lalo ngwendi, “Vumwene vwa Njambi vunalifu ngwe munu wakuvile mbuto mu lihya lyendi. 27Co ku vutsiki walalele tulo, co wendukile mutondo, co vimbuto vije vyakunine vyamenene nakukola. Oloni uje munu kazivukile muvyakolelele. 28Livu likelyo lyakolesele vimbuto nakwima vushuka, akulivanga kwamenene chishati, asinoni mutwe, co akukotoka mutwe wakele na vinona. 29#Njwe 3:13 Oloni omo vimbuto vyahile, uje munu ashangumuka kuteja, omwo simbu yakuteja inete.”

Cisimo ca mbuto ya musalata

(Mateo 13:31-32,34; Luka 13:18-19)

30Co Yesu wehwile ngwendi, “Vumwene vwa Njambi tukavwesekesa na vika? Nambe tukavulumbununa na cisimo muka? 31Vunalifu ngwe munu anona kanona kamo ka mbuto ya musalata, kakeko kapwa kakandondo manene muno mu kaye, co wakakunine. 32Oloni omo kwita lika kasimbu kakandondo, co kakola kapwa muti wakama kutuvakana miti yoshe. Co ukala na minango yakama, ngecivene, tuzila vaija nakutungilako mashwa avo.”

33Yesu wambulwile lijwi lyendi kuli vanu, wapangesele visimo vyavingi vyakufwa ngwe evi, ikeye wavalongesele ngeci vase kuzivisisa. 34Ikeye kendekele navo ngoco kuvanga na visimo, oloni omo wakele endi lika na vandongisi vendi, walumbunwine vyuma vyoshe kuli vakevo.

Yesu olwesa lihunzi lyakama

(Mateo 8:23-27; Luka 8:22-25)

35A litangwa lije vene ku cingwezi Yesu wendekele kuli vandongisi vendi ngwendi, “Tujavukeni tuye musambwa ya lishali.” 36Ngecivene, vasezele mbunga ya vanu, vandongisi vendi vakovelele muje mu vwato vwakovelele Yesu, co waile amo navo. Mato akwavo akele kuje. 37Co kwahuwile lihunzi lyakama manene na mankimba ashangumukile kukovela mu vwato, ngecivene, vwato vwashakele kushula na mema. 38Oloni Yesu wakele ku litusi lya kunima, nalala tulo nasindamena mutwe wendi a musato. Co vandongisi vamukasumwine vendekele kuli ikeye ngwavo, “Mulongisi, kuma yove kuwazivukile ngwove tutsa ndi?”

39Co Yesu wemanene washikile lihunzi ngwendi, “Oloka kuluu!” Co lalo washikile mankimba ngwendi, “Kukale kulendama kuluu!” Co lihunzi lyemanene, co kwolokele kuluu. 40Asinoni Yesu wendekele kuli vandongisi vendi ngwendi, “Omwo vikajo muli na lyova lyangacije? Kuma kumwakulaelele ndi?”

41Oloni vakele na lyova lyakama, co valihozwele umo na mukwavo ngwavo, “Munu wakufwa vatijo ou? Uje nameme lihunzi na mankimba vimwononoka!”

Currently Selected:

Mako 4: MBB

Highlight

Compare

Copy