Mako 3
3
Munalume wakusekwa livoko
(Mateo 12:9-14; Luka 6:6-11)
1Asinoni Yesu welukile lalo ku sinangonge, co kuje kwakele munalume umo wakusekwa livoko. 2Co kuje kwakele vanu vamo vashakele kashwilo ali Yesu ngeci vamuwaneneo mulonga, ngecivene, vamukengele shwii ngeci vamone nga ikeye akangwisa uje munu a Litangwa Lyakuhwima.
3Co Yesu wendekele kuli uje munalume wakusekwa livoko ngwendi, “Ija kuno kulutwe.” 4Asinoni wehwile vanu ngwendi, “Cuma muka vanatutavesa ku Lishiko lyetu kucilinga a Litangwa Lyakuhwima? Kukwasa nambe kuvulumuna? Kwamena mwonyo wa munu nambe kuunyongesa?”
Oloni volokele kuluu. 5Co Yesu waluvalele omo wavakengele, oloni a simbu ije vene wazivile manene vusiwa omwo vakevo, omwo vakaluwisile vimbunge vyavo. Asinoni wendekele kuli uje munalume ngwendi, “Olola livoko lyove.” Wolwele livoko lyendi, co lyakangukile. 6Ngecivene, vaFaliseo vatuukile mu sinangonge, co valikungulwile vwasi-vwasi na vaka-munga ya Helonde, co vatumbile vutumbe vwakutsiya Yesu.
Mbunga ya vanu ku lishali
7Yesu na vandongisi vendi vaile ku Lishali lya Ngalileya, co mbunga yakama ya vanu vamukavele. Vatundile ku Ngalileya, veka lalo vatundile ku Yundeya, 8co veka lalo vatundile ku Yelusalema, veka lalo vatundile ku lifuti lya ku Indumeya, veka lalo vatundile ku lifuti lya musambwa ya Yondau, co vakwavo lalo vatundile ku mafuti aje azengelekele ku vinganda vya Tile na Sindone. Vanu voshe ava vezile kuli Yesu omwo vazivile vyuma vije vyakele nakulinga. 9#Mak 4:1; Luk 5:1-3 Co mbunga ya vanu yapwile yakama manene ngeci Yesu walekele vandongisi vendi vamuvwaesele cimweja vwato, ngeci vanu kesi vamusindakane. 10Ikeye wakangwisile vanu vavangi, co voshe vaka-kuvinja vakele nakulinakozola mukushwenya kuli ikeye ngeci vamukwate. 11Co omo vanu vaje vakele na minzinzime yakujwala vamumwene, vawililile asi ku mesho endi nakutambeka ngwavo, “Yove u Muna Njambi!”
12Co Yesu wasin̄ikile manene minzinzime yakujwala kesi valeke munu umo ngeci ikeye napu iya.
Yesu aangula miluwa likumi na vavali
(Mateo 10:1-4; Luka 6:12-16)
13Asinoni Yesu walamatele a lilundu, co wasanene vaje vanu vashakele ikeye vavenya. Vezile kuli ikeye, 14co waangwile likumi na vavali, vaje vatumbwile miluwa wavalekele ngwendi, “Yange njinamyangula ngeci mukale amo nange. Njikamituma lalo nakwambulula, 15co mukakala na moko yakutundisa minzinzime yakujwala.”
16Ava vakevo likumi na vavali vaje vaangwile, Simoni (uje Yesu wamulukile lizina lya Petulu), 17Yakomba na ndolome yendi Yowano, vana va Zembendeo (vaje Yesu wavalukile lizina lya Mboanengesi, nkumbu yalyo ngwavo “Vanalume va cililimo”), 18Anduleo, na Filipu, na Mbatolomeo, na Mateo, na Tomasi, na Yakomba muna Alufeya, na Tandeo, na Simoni ikeye Zelote, “Kukakateya” 19na Yundasa Isikalyote uje wendele Yesu vungungu.
Yesu na Mbelezembulu
(Mateo 12:22-32; Luka 11:14-23; 12:10)
20Asinoni Yesu waile kwimbo. Co lalo mbunga yakama yalikungulwile ngeci Yesu na vandongisi vendi kuvakele na simbu yakulya. 21Co omo naanga yendi vazivile a vyuma evi, vaile nakumusetela, omwo vanu vakele nakwendeka ngwavo, “Nazaluka!”
22 #
Mat 9:34; 10:25 Co vamo valongisi va majwi a Lishiko vaje vatundile ku Yelusalema vendekele ngwavo, “Ali na Mbelezembulu! Mwene ya minzinzime yakujwala ikeye namwana nzili yakutundisa minzinzime yakujwala.”
23Ngecivene, Yesu wavasanene vaije kuli ikeye, co wendekele kuli vakevo na visimo ngwendi, “Vati Satana asa kutundisa Satana? 24Nga vumwene vulyangunuka mu vimunga vije vililwisa akati kavyo, vumwene vuje vukanyonga. 25Nga naanga ilyangunuka mu vimunga vije vililwisa akati kavyo, naanga ije ikanyonga. 26Ngecivene, nga vumwene vwa Satana vulyangunuka mu vimunga, kuvwasa kwishwala, oloni vukawa nakweta kukunyonga kwavwo.
27“Naumo wai asa kukovela mu njuvo ya muka-nzili nakupukula vufuko vwendi kuvanga alivange kukuta uje muka-nzili, asinoni akapukula vya mu njuvo yendi.
28“Mwa vushunga njimileka ngwange, vivi vyoshe na kushaula kwoshe vakavisambesa.#3:28 VIVI VYOSHE NA KUSHAULA KWOSHE: Kenga Mateo 12:31. 29#Luk 12:10 Oloni uje ashaula Munzinzime Wakujela kuvakamusambesa nalumo lwai, omwo nalingi vuvi vwa ku myaka yoshe.” (30Yesu wendekele evi omwo vamo vanu vakele nakwendeka ngwavo, “Ali na munzinzime wakujwala.”)
Vaina ya Yesu na vandolome vendi
(Mateo 12:46-50; Luka 8:19-21)
31Asinoni vaina ya Yesu na vandolome vendi vezile. Co vemanene anja, co vatumine lijwi nakumusana. 32Co mbunga ya vanu vatumbamene kuje vazengelekele Yesu, co vendekele kuli ikeye ngwavo, “Kenga, vanyoko na vandolome vove na vandokazi vove vanemana anja vashaka kwendeka nove.”#3:32 MBUNGA YA VANU...VASHAKA KWENDEKA NOVE: Kenga Mateo 12:47.
33Co Yesu wavakumbulwile ngwendi, “Vanana veyajo? Na vandolome vange veyajo?” 34Wakengele kuli vanu vaje vatumbamene kuje nakumuzengeleka, wendekele ngwendi, “Kengeni! Ava vakevo vanana na vandolome vange! 35Woshe uje alinga cizango ca Njambi ikeye vene napu ndolome yange, na ndokazi yange, na vanana.”
Currently Selected:
Mako 3: MBB
Highlight
Share
Compare
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
