Mateo 25

Cisimo ca vambanda likumi

1 # Luk 12:35 “Asinoni Vumwene vwa mwilu vukafwa ngwe vambanda likumi, vaje vambatele mazi mu vindeya vyavo vaile nakushesha vavenya vulo. 2Vatanu vapwile vakweva, co vatanu lalo vapwile vakunyanyama. 3Omwo vaje vakweva vambatele vindeya lika, kuvambatele mazi. 4Oloni vaje vakunyanyama vambatele mazi mu malulu amo na vindeya vyavo. 5Omo vavenya vulo weshwalele, ngecivene, vaje vambanda vanengukile vaile mu tulo.

6“Oloni mukati ka vutsiki vazivile mutambi ngwavo, ‘Kengeni, vavenya vulo alinakwija, tuukeni mukamusheshe!’ 7Asinoni vaje vambanda voshe vendukile nakushwameka vindeya vyavo. 8Co vaje vakweva vendekele kuli vaje vakunyanyama ngwavo, ‘Twaneniko mazi eni, omwo vindeya vyetu vilinakuzima.’ 9Oloni vaje vakunyanyama vavakumbulwile ngwavo, ‘Embwe, kutupwisamo neni netu. Yeni ku vaka-kulandesa mukalilandele yeni vavenya.’ 10Co omo vambanda vakweva vaile nakulanda mazi, co vavenya vulo wetele, na vaje vambanda vatanu valivwaeselele cimweja vakovelele amo nendi ku ciwano ca vushombolwa, co vashokele lipito.

11 # Luk 13:12 “Munima lalo vaje vambanda vakwavo vezile, vendekele ngwavo, ‘Mwene! Mwene! Tushokolweleniko.’ 12Oloni wavakumbulwile ngwendi, ‘Mwa vushunga njimileka ngwange, kunjimizivuka.’ ”

13Co Yesu wamanesele kwendeka ngwendi, “Nyanyameni omwo kumuzivuka litangwa nambe simbu.

Cisimo ca vangamba vatatu

(Luka 19:11-27)

14 # Luk 19:11-27 “A simbu ije vene Vumwene vwa mwilu vukafwa ngwe munalume umo waile vungenzi ku lifuti lyakulyala, co wasanene vangamba vendi, co wavanene moko a vufuko vwendi. 15Waanene kuli umo na umo ngwe ku mana endi, umo wamwanene vimbongo vya ngolinde vyakupwa 5,000 mukwavo wamwanene vimbongo vyakupwa 2,000, co mukwavo wamwanene vimbongo vyakupwa 1,000. Asinoni wakatukile waile vungenzi vwendi. 16Uje ngamba watambwile vimbongo vyakupwa 5,000 waile nakukasekasana, wawaneneo lalo vimbongo vyakupwa 5,000. 17Mu ngila imo lalo ngamba uje watambwile vimbongo vyakupwa 2,000 waile nakukasekasana, co wawaneneo lalo vimbongo vyakupwa 2,000. 18Oloni ngamba uje watambwile vimbongo vyakupwa 1,000 waile, co wakendile citeke washitikile vije vimbongo vya shukulu yendi.

19“Omo kwetile matangwa amangi, co uje shukulu ya vangamba vaje welukile, walavele amo navo vije vimbongo vyendi. 20Co uje ngamba watambwile vimbongo vyakupwa 5,000 wezile, co waanene vimbongo vyeka lalo vyakupwa 5,000, wendekele ngwendi, ‘Shukulu, mwanjanene vimbongo vyakupwa 5,000. Kengeni! Njinawanao lalo vimbongo vyeka vyakupwa 5,000.’ 21Shukulu yendi wamukumbulwile ngwendi, ‘Unalingi mwamuvwa manene, u ngamba wamuvwa wa kulongwa! Walongwele ku vyuma vyavindondo, ngecivene, njikakupwisa muka-kunyunga vimbongo vyavingi. Kovela mukuvwaelela kwa shukulu yove!’

22“Na uje ngamba watambwile vimbongo vyakupwa 2,000 nendi lalo wezile, co wendekele ngwendi, ‘Shukulu, mwanjanene vimbongo vyakupwa 2,000. Kengeni! Njinawanao lalo vimbongo vyeka vyakupwa 2,000.’ 23Shukulu yendi wamukumbulwile ngwendi, ‘Unalingi mwamuvwa manene, u ngamba wamuvwa wa kulongwa! Walongwele ku vyuma vyavindondo, ngecivene, njikakupwisa muka-kunyunga vimbongo vyavingi. Kovela mukuvwaelela kwa shukulu yove!’ 24Asinoni uje ngamba watambwile vimbongo vyakupwa 1,000 nendi wezile, wendekele ngwendi, ‘Shukulu, njakuzivukile ngwange wapwa u munu wamukalu manene, ukateje kuje kuwakuvile, co ukongulula kuje kuwashandwelele. 25Ngecivene, njazivile lyova, co njaile nakushitika vimbongo vyove mu livu. Kenga! Vimbongo vyove evi.’ 26Oloni shukulu yendi wamukumbulwile ngwendi, ‘Ove ngamba wamuvi wa vulwa! Wanjizivukile ngwove yange njikateje kuje kunjakuvile, nakukungulula kuje kunjashandwelele? 27Mwamuvwa nga waanene oyo mbongo yange kuli vaka-kusekasana, co yange omo njinaija nga njinawana mbongo yange amo nakakondweso kayo. 28Ngecivene, munyekeni ovyo vimbongo, co muvyane kuli uje ali na vimbongo vyakupwa 10,000, 29#Mat 13:12; Mak 4:25; Luk 8:18 omwo uje alinavyo vakamuwezelelako, co akakala na vyavingi, oloni uje kesi navyo, nameme vene vije vyavindondo vyalinavyo vakamutambulavyo. 30#Mat 8:12; 22:13; Luk 13:28 Co ngamba wangacije, mumbileni anja mu lisusulungu, kuje akalila nakulingenjenga ku mayo.’

Kusompa kwakumaneselela

31 # Mat 16:27; 19:28 “Omo Muna Munu akaija mu vumpau vwendi amo na tungelo twendi voshe, akatumbama a litanda lyendi lya vumwene. 32Co miyati yoshe vakakungulukila kuli ikeye. Asinoni akavangununa vamo oku, vakwavo oku, ngwe muje kanyungi akaangununa vimanga kuvatundisa ku vimembe. 33Co akaka vimanga ku livoko lyendi lya cilyo, oloni akaka vimembe ku livoko lyendi lyacimwoshwe. 34Asinoni mwene akendeka kuli vaje vali ku livoko lyendi lya cilyo ngwendi, ‘Ijeni, yeni vaanavezikisa Tate! Shwaneni vumwene vuje vamivwaeselele tunde kukutanga kwa kaye. 35Omwo njakele na njala, co mwanjilisile, njakele na lihwila, co mwanjinwisile, njapwile nji mungenzi, co mwanjitambwile, 36njakele na vuzu, co mwanjizikile, njakele nakuvinja, co mwanjimenekelele, njakele mu kamenga, co mwezile kuli yange.’

37“Asinoni vaka-vushunga vakamukumbulula ngwavo, ‘Mwene, simbu ikajo twakumwene uli na njala, co twakulisile, nambe simbu ikajo twakumwene uli na lihwila, co twakunwisile? 38Co simbu ikajo twakumwene u mungenzi, co twakutambwile, nambe na vuzu, co twakuzikile? 39Co simbu ikajo twakumwene ulinakuvinja, nambe uli mu kamenga, co twezile kuli yove?’ 40Co mwene akavakumbulula ngwendi, ‘Mwa vushunga njimileka ngwange, omo mwacilingile kuli umo wa ava vavandondo vasamba vange, mwacilingile kuli yange!’

41“Asinoni akendeka lalo kuli vaje vali ku livoko lyendi lyacimwoshwe ngwendi, ‘Tundeni kuli yange, yeni vaka-cisingo! Yeni mu tuhya tuje tuvavwaeselele Satana na tungelo twendi! 42Omwo njakele na njala, co kumwanjilisile, njakele na lihwila, co kumwanjinwisile, 43njapwile nji mungenzi, co kumwanjitambwile, njakele na vuzu, co kumwanjizikile, njakele nakuvinja na mu kamenga, co kumwanjimenekelele.’

44“Asinoni vakamukumbulula ngwavo, ‘Mwene, simbu ikajo twakumwene uli na njala, nambe na lihwila, nambe u mungenzi, nambe na vuzu, nambe nakuvinja, nambe mu kamenga, co tujeneke kukukwasa?’ 45Asinoni akavakumbulula ngwendi, ‘Mwa vushunga njimileka ngwange, omo kumwacilingile kuli umo wa ava vavandondo, kumwacilingile kuli yange.’ 46#Ndan 12:2 Co ava vakakovela mu tuyando twa myaka yoshe, oloni vaka-vushunga vakakovela mu mwonyo wa myaka yoshe.”

Currently Selected:

Mateo 25: MBB

Highlight

Copy