Mateo 24

Yesu endeka a kunyonga kwa Njuvo ya Shukulu Kalunga

(Mako 13:1-2; Luka 21:5-6)

1Yesu watuukile mu Njuvo ya Shukulu Kalunga, washakele kuya, omo vandongisi vendi vezile kuli ikeye vamumwesele vinjuvo vya Njuvo ya Shukulu Kalunga. 2Oloni Yesu wendekele ngwendi, “Munamono vinjuvo vyoshe evi ndi? Kukukakala limanya limo likasala mu mutambela walyo, oshe akasiwuka.”

Tuyando na mapakeso

(Mako 13:3-13; Luka 21:7-19)

3Co Yesu watumbamene a Munkinda wa Oliveta, vandongisi vendi vezile kuli ikeye mu vushweke, vamwihwile ngwavo, “Tuleke mwaka uka evi vyoshe vikasholoka, co cizivukiso mukajo tukazivuka naco kwija kwove nakukotoka kwa kaye?”

4Co Yesu wavakumbulwile ngwendi, “Nyanyameni, co kesi mutave umo amikwise. 5Omwo vanu vavangi vakaija mu lizina lyange vakendeka ngwavo, ‘Yange vene Wakuvwavesa!’ Co vakatangula vavangi. 6Mukaziva vinzita na lingwavo lya vinzita, oloni kesi mukajujuke. Omwo vyuma evi vinapande kusholoka, oloni kuvilumbununa ngeci kukotoka kwa kaye kunete. 7Omwo lifuti limo likalwa nzita na lifuti likwavo, co vumwene vukalwisa vumwene vukwavo. Kukakala njala ya lyangengela, na mandunduma ku mitambela yakuliseza-seza. 8Vyuma vyoshe evi vinapu ngwe kushangumuka kwa mushongo wakukita mwana.

9 # Mat 10:22 “Asinoni vakamikwata nakumiyandesa nakumitsiya, co miyati yoshe vakamizinda omwo lizina lyange. 10Co vavangi kuvakanjikulaela a simbu ije, co vakalyenda vungungu umo na mukwavo. 11Co vaka-kwimanena va makuli vavangi vakasholoka, co vakatangula vanu vavangi. 12Co omwo vuvi vunatumu, cizemo ca vanu ku vakwavo vanu cikatonola. 13#Mat 10:22 Oloni woshe uje akakateya na ku shongo akovoka. 14Co evi Vin̄anda Vyavivwa vya Vumwene vakavyambulula mu kaye mwoshe ngwe kupwa vukaleo ku miyati yoshe, co asinoni kukotoka kwa kaye kukaija.

Cimweso ca Vunyengwe

(Mako 13:14-23; Luka 21:20-24)

15 # Ndan 9:27; 11:31; 12:11 “Ngecivene, mukamona Cimweso ca Vunyengwe cije cendekele Ndanyele cinemana mu mwela wakujela.” (Yove ulinakulava zivisisa muvinalumbunukila!) 16“Asinoni vaje vali mu Yundeya vakatewele ku malundu. 17#Luk 17:31 Munalume uje ali akamwa ya njuvo yendi#24:17 AKAMWA YA NJUVO YENDI: Vinjuvo vyalaja vyakele na viluli vyakusivama, co vanu valikwasesele vindendelo mukulonda nakukahwimina akamwa ya ciluli. kesi akashulukeo nakwambata vije vili mu njuvo yendi. 18Co munalume uje ali mu lihya lyendi kesi akeluke nakwambata cikoveyo cendi. 19Co luvinda ku vanakazi vaje vakakala na tufumba, na vanakazi vaje vakajamwesa a simbu ije! 20Lombeleni kuli Njambi ngeci kesi mukatewe a simbu ya cisika, nambe a Litangwa Lyakuhwima! 21#Ndan 12:1; Kuj 7:14 Omwo a matangwa aje kukakala n̄avava ije kanda vaimoneo laja tunde akutanga kwa kaye kweta nalelo lino. Nambe kulutwe kuyikakalako lalo. 22Co nga Njambi kaakeesele matangwa aje, nga munu naumo wai akovoka. Oloni naakeesa omwo vanu vendi vaje vaangwile.

23“Asinoni, nga munu umo akamileka ngwendi, ‘Kengeni, ali kuno Wakuvwavesa,’ nambe ‘Uje ali kuje,’ kesi mukamukulaele. 24Omwo kukasholoka vaKuvwavesa va makuli na vaka-kwimanena va makuli, vakamwesa vizivukiso na vikomokeso vyakama, ngecivene, vakatangule nameme vaje vavaangwile kuli Njambi nga citava. 25Tolilileni! Njinamilekela cimweja omo simbu kanda yete.

26 # Luk 17:23-24 “Ngecivene, nga vakamileka ngwavo, ‘Kengeni, ali mu mambo,’ kesi mukayemo, nambe nga vakendeka ngwavo, ‘Kengeni, navanda kuno,’ kesi mukavikulaele. 27Omwo Muna Munu akaija ngwe muhyato utunda mu ngangela kweta na mu kangombe ka yambi.

28 # Luk 17:37 “Kwoshe kuje kuli civimbi kukekwo kukalingulwila makuvi.

Kwija kwa Muna Munu

(Mako 13:24-27; Luka 21:25-28)

29 # Isa 13:10; 34:4; Ezek 32:7; Njwe 2:10,31; 3:15; Kuj 6:12-13 “Vwasi-vwasi omo tuyando twa a matangwa aje tuneti, litangwa likazivala vwii, co ngonde kuyikatu lyezi, co vingongonosi vikawila asi, co vinzili vya mwilu vikaninganga. 30#Ndan 7:13; Zak 12:10-14; Kuj 1:7 Asinoni cizivukiso ca Muna Munu cikasholoka mwilu, co miyati yoshe ya ano asi vakalila mbimbi-mitwe omo vakamona Muna Munu alinakwija a mashelwa na nzili na vumpau vwakama. 31Co lupembo lwakama lukaimba, co akatuma tungelo twendi ku vimbango viwana vya ano asi, co vakakungulula vanu vendi vaje vaangwile kutunda ku shongo imo ya kaye nakweta ku shongo ikwavo ya kaye.

Cilongesa ca muti wa mukuyu

(Mako 13:28-31; Luka 21:29-33)

32“Lilongeseni mana ku cisimo ca muti wa mukuyu. Omo minango yawo ijovelela, mwazivuka ngweni nyangao ili muyehi. 33Ngecivene, omo mukamona vyuma vyoshe evi, mukazivuka ngeci ikeye ali muyehi, ku cikolo vene. 34Mwa vushunga njimileka ngwange, vyuma vyoshe evi vikalingiwa simbu kanda vanu ava valinakuyoya ololo voshe vatse. 35Lilu na asi vikaita, oloni majwi ange kuwakaiti embwe.

Naumo wai azivuka litangwa nambe simbu

(Mako 13:32-37; Luka 17:26-30,34-36)

36“Oloni litangwa lije, nambe simbu ije, naumo wai avizivuka, nambe tungelo va mwilu, nambe Mwana, oloni Ishe lika ikeye azivuka. 37#Kus 6:5-8 Ngwe mucafwile a matangwa a Nowa, ngecivene, mucikafwa akwija kwa Muna Munu. 38A matangwa aje omo livazi kanda lyete, vanu valile, vanwile, vambatele, nakushombwesa, noo a litangwa lije omo Nowa wakovelele mu vwato, 39#Kus 7:6-24 oloni kuvazivukile cuma muka cikalingiwa noo livazi lyezile, co voshe vanyongele. Mukemwo mucikafwa omo Muna Munu akaija. 40A simbu ije vanu vavali vakapanga mu lihya, umo vakamwambata, mukwavo vakamuseza. 41Vanakazi vavali vakatwa mu n̄unju imo, umo vakamwambata, mukwavo vakamuseza.

42“Ngecivene, nyanyameni omwo kumuzivuka simbu ije yakaija Mwene yeni. 43#Luk 12:39-40 Oloni zivukeni ngweni, nga vavenya njuvo nazivukile simbu yakaija mwizi, nga natumbamene nakutona ngeci mwizi kesi atuve njuvo yendi. 44Ngecivene, neni livwaeseleni cimweja, omwo Muna Munu aija a simbu ije vene kumwayongwele ngweni aija.

Ngamba wa kulongwa nou wakujeneka kulongwa

(Luka 12:41-48)

45“Iyajo napu ngamba wa kulongwa nakunyanyama? Ikeye uje shukulu yendi namusezela kunyunga vakwavo vangamba nakuvana vyakulya a simbu yaivwa. 46Navezika ngamba uje, omo shukulu yendi akaija, co akumuwana alinakulinga ngeci. 47Mwa vushunga njimileka ngwange, shukulu yendi akamwana moko yakumunyungila vyuma vyendi vyoshe. 48Oloni nga ikeye napu ngamba wamuvi, endeka mu mbunge yendi ngwendi shukulu kaija vwasi, 49co ashangumuka kupupanga vakwavo vangamba, co alya nakunwa amo na vaka-kupenda. 50Asinoni shukulu yendi akaija a litangwa limo a simbu ije kayongwele ngwendi ikeyo yakeluka. 51Co shukulu yendi akamumbila anja, co akaya ku cihiso amo na vaka-civembulu. Kuje akalila nakulingenjenga ku mayo.

Currently Selected:

Mateo 24: MBB

Highlight

Copy