Mateo 26

Vutumbe vwakutsiya Yesu

(Mako 14:1-2; Luka 22:1-2; Yowano 11:45-53)

1Omo Yesu wamanesele kulongesa vyuma vyoshe evi, wendekele kuli vandongisi vendi ngwendi, 2#Kut 12:1-27 “Mwazivuka ngeci omo kwita matangwa avali lika, kukakala Ciwano ca Pasovala, co Muna Munu vakamwana ngeci vamushukike a cilindakano.”

3Asinoni vakulunu va vaka-kukombelela na vakulunu va vaYunda valikungulwile amo mu lipela lya Kayafase Muka-kukombelelela Wakama. 4Co valingile munga ali Yesu ngeci vawane ngila imo yakumuseveleka nakumukwata ngeci vamutsiye. 5Oloni valyendekesele akati kavo ngwavo, “Kesi tumukwate a simbu ya ciwano, kutewa vanu vakalinga muyoyo.”

Vavwavesa Yesu ku Mbeteniya

(Mako 14:3-9; Yowano 12:1-8)

6Omo Yesu wakele mu Mbeteniya ku njuvo ya Simoni, munalume umo uje wayandele manene ku mushongo wa mbumba. 7#Luk 7:37-38 Omo Yesu wakele nakulya ku mesa, munakazi umo wezile kuli ikeye wakele na lilulu lyakushula lya mazi a ndando yakama akunika lwengo lwaluvwa aje etilile ku mutwe wa Yesu. 8Oloni omo vandongisi vendi vacimwene, valuvalele manene vendekele ngwavo, “Omwo vikajo alinakuviisa awa mazi ngacije? 9Omwo mazi awa vanapandele kuwalandesa ndando yakama nakwana vimbongo ku tuutu!” 10Oloni Yesu wazivukile vije vivakele nakwendeka, wendekele kuli vakevo ngwendi, “Omwo vikajo mulinakupakesa ou munakazi? Omwo napanga cuma cacivwa manene ali yange. 11#Kwi 15:11 Omwo tuutu muli navo simbu yoshe, oloni yange kunjikakala neni simbu yoshe embwe. 12Akwitila awa mazi a muvila wange, nacilingila mukunjivwaesela kunjitsinda. 13Mwa vushunga njimileka ngwange, kwoshe-ikwoshe kuvakambulwila evi vin̄anda vyavivwa mu kaye koshe neci lalo canalingi ou munakazi, vakacambulula nakumwanukilao.”

Yundasa atava kwenda Yesu vungungu

(Mako 14:10-11; Luka 22:3-6)

14Asinoni ndongisi umo uje wavulikumi na vavali, lizina lyendi Yundasa Isikalyote, waile kuli vakulunu va vaka-kukombelela, 15#Zak 11:12 co wavehwile ngwendi, “Vikajo mukanjana nga njikamisholwelaye?” Co vamufwetele makumi atatu a vimbongo vya siliva. 16Co kutunda aje vene Yundasa washakezekele ngila imo yaivwa yakwenda Yesu vungungu.

Yesu alya na vandongisi vendi ku Ciwano ca Pasovala

(Mako 14:12-21; Luka 22:7-13,21-23; Yowano 13:21-30)

17A litangwa lyakulivanga lya Ciwano ca Makende Akujeneka Musima, vandongisi va Yesu vezile kuli ikeye vamwihwile ngwavo, “Kulijo ushaka ngeci tukakuvwaeseleko kulya kwa Ciwano ca Pasovala?”

18Wavalekele ngwendi, “Yeni ku munu umo mu nganda, co mukamuleka ngweni, ‘Mulongisi nendeka ngwendi, simbu yange inete, njikalingila Ciwano ca Pasovala mu njuvo yove amo na vandongisi vange.’ ”

19Co vandongisi vendi valingile muje mwavalekele Yesu, co vavwaesele vyakulya vya Ciwano ca Pasovala.

20Omo vetele ku cingwezi, Yesu na vaje likumi na vavali vatumbamene ku mesa nakulya.

21Co omo vakele nakulya Yesu wendekele kuli vandongisi vendi ngwendi, “Mwa vushunga njimileka ngwange umo akati keni akanjenda vungungu.”

22Co vandongisi vendi vakele na vusiwa manene, co vashangumukile kumwihula umo na umo ngwavo, “Mwa vushunga vene, Mwene aamo yange ndi?”

23 # Mya 41:9 Yesu wavakumbulwile ngwendi, “Ou vene natanta amo nange mu lilonga omo tunakele nakulya, ikeye vene akanjenda vungungu. 24Muna Munu akatsa ngwe muje muvasonekele, oloni ngongo yendi uje enda Muna Munu vungungu! Mwamuvwa kuli munu uje nga kasemukile!”

25Yundasa uje vene wamwendele vungungu, wamwihwile ngwendi, “Mwa vushunga Mulongisi, yange vene ndi?”

Yesu wamukumbulwile ngwendi, “Omo vene muunendeka.”

Mesa ya Mwene

(Mako 14:22-26; Luka 22:14-20; 1 Kolinte 11:23-25)

26Omo vakela nakulya, Yesu wanonele likende, walombele lilombelo lyakukandelela, co walipazwile, co walyanene kuli vandongisi vendi ngwendi, “Tambuleni mulye. Eli linapu muvila wange.”

27Asinoni Yesu wanonele lalo nganja ya vinyu, wakandelelele kuli Njambi, co wavaneneyo nakwendeka ngwendi, “Nwenimo mulishumwine muvavoshe, 28#Kut 24:8; Njele 31:31-34 omwo vinyu evi vinapu maninga ange aje anakolesa cikumiiyo ca Njambi, akwitikila ali vanu vavangi mukuvasambesa ku milonga yavo. 29Njimileka ngwange, kutunda lelo kunjikanu neni lalo vinyu kuvanga noo a litangwa lije njikanwa neni vyaviha mu Vumwene vwa Tate.”

30Co omo vamanesele kwimba mwaso, co vatuukile vaile ku Munkinda wa Oliveta.

Yesu endeka ngeci Petulu akamuvyana

(Mako 14:27-31; Luka 22:31-34; Yowano 13:36-38)

31 # Zak 13:7 Asinoni Yesu wavalekele ngwendi, “Ku vutsiki vuno vene, yeni voshe mukatewa nakunjiseza ange lika, omwo visoneka vinendeka ngwavyo, ‘Njambi akatsiya kanyungi, co vutanga vwa vimanga vukalishandoka!’ 32Oloni omo njikasanguka, njikalivanga kuya kulutwe lweni ku Ngalileya.”

33Petulu wendekele nendi ngwendi, “Nameme voshe vakakuseza yange kunjikakuseza nalumo lwai!”

34Yesu wakumbulwile Petulu ngwendi, “Mwa vushunga njikuleka ngwange, vutsiki vuno vene simbu ndemba kanda atambeke, ukanjivyana visimbu vitatu ngwove kuunjizivuka.”

35Petulu wamukumbulwile ngwendi, “Kunjikendeka ngwange kunjikuzivuka, nameme kutsa vene njikatsa amo nove!”

Co na vandongisi vakwavo voshe vendekele cuma cimo.

Yesu alombela mu Ngetesemani

(Mako 14:32-42; Luka 22:39-46)

36Asinoni Yesu waile ku mutambela wa Ngetesemani na vandongisi vendi, wendekele ngwendi, “Tumbameni kuno simbu njilinakuya mukulombela.” 37Co ikeye waile amo na Petulu na vaje vana va Zembendeo vavali, washangumukile kuzeya mu mbunge nakuvupuka manene. 38Co ikeye wendekele navo ngwendi, “Mbunge yange inazeye na vusiwa vwakama manene vwakunjitwala ku kutsa vene. Njivandameneni kuno nakukengelela amo nange.”

39Co washwenyeleko kulutwe kamandondo, wavulumanene, co walombelele ngwendi, “Tate, nga citava, nganja eyi ya kayando itunde kuli yange! Kesi ngwe mwaya cizango cange embwe, oloni cizango cove cilingiwe.”

40Asinoni Yesu welukile kuli vandongisi vendi vaje vatatu, co wavawanene vanalala tulo, wendekele kuli Petulu ngwendi, “Kuma kumwasa kukengelela amo nange, nameme simbu imolika? 41Toneni nakulombela kutewa mukovela mu vyeseko. Mbunge ishaka vene, oloni muvila unazeye.”

42Lalo simbu yamucivali waile, co walombelele ngwendi, “Tate, nga nganja eyi ya tuyando kuyasa kunjituvakana kuvanga njiinwe, cizango cove cilingiwe.” 43Co welukile lalo, wawanene vandongisi vendi vanalala tulo, omwo mesho avo alemene manene na tulo.

44Ngecivene, Yesu wavasezele lalo, waile nakulombela simbu yamucitatu nakwendeka majwi amolika. 45Asinoni welukile kuli vandongisi vendi, wavehwile ngwendi, “Kuma anga munacilala nakuhwima ndi? Kengeni! Simbu inete laja, omwo Muna Munu valinakumwana ku nzili ya vaka-vuvi. 46Indukeni, tuyeni. Kengeni, munalume ou alinakunjenda vungungu ali kuno!”

Yesu vamukwata

(Mako 14:43-50; Luka 22:47-53; Yowano 18:3-12)

47Omo Yesu wacikele nakwendeka navo, Yundasa, umo wa vaje likumi na vavali wetele. Co wezile na mbunga yakama vambatele mikwale na vimbweti, vavatumine kuli vakulunu va vaka-kukombelela na kuli vakulunu va vaYunda. 48Muka-kumwenda vungungu wavanene cizivukiso ngwendi, “Uje munalume injikatsemba ikeye vene imushaka. Mukwateni!”

49Co Yundasa wetele washungamene vene ali Yesu, co wendekele kuli Yesu ngwendi, “Kwoloka kukale neni Mulongisi,” co wamutsembele.

50Yesu wamukumbulwile ngwendi, “Ove mukwetu, linga vwasi cije ciwushaka kulinga.”#26:50 LINGA VWASI CIJE CIWUSHAKA KULINGA: Nambe, omwo vika ulikuno, musamba?

Asinoni vezile, vamukwatele nakumuvumbatela manene. 51Co umo uje wakele na vaje vakele na Yesu, washomwene mukwale wendi, co wavatwile litwi lya ndungo ya Muka-kukombelela Wakama. 52Asinoni Yesu wamulekele ngwendi, “Shomeka mukwale wove mu cindalo cawo, omwo voshe vaje vapangesa mikwale yavo vakanyonga ku mikwale yavo. 53Kuma kuuzivuka ngeci yange njasa kulomba Tate ngeci anjikwase? Co vwasi-vwasi asa kunjitumina vimbunga vya mashwalale va tungelo likumi na vivali ndi? 54Oloni a vyuma vyangacije, co vatijo visoneka vyasa kupwamo, vije vinendeka ngeci vinapande kulingiwa mu cifwa eci vene?”

55 # Luk 19:47; 21:37 Asinoni Yesu wendekele na mbunga ije ngwendi, “Kuma munaija na mikwale na vimbweti mukunjikwata ngwe lipwepwe ndi? Njatumbamene nakulongesa mu Njuvo ya Shukulu Kalunga matangwa oshe, co kumwanjikwatele. 56Oloni vyoshe evi vyalingiwa ngeci vije vivendekele vaka-kwimanena mu visoneka vilingiwe.”

Aje vene vandongisi vendi voshe vamusezele, co vatewele.

Vasompa Yesu ku mesho a munga

(Mako 14:53-65; Luka 22:54-55,63-71; Yowano 18:13-14,19-24)

57Co vaje vakwatele Yesu wamutwalele ku njuvo ya Kayafase, Muka-kukombelela Wakama, kuje kuvakungulukilile valongisi va majwi a Lishiko na vakulunu. 58Oloni Petulu wamukavele alyala kamandondo, noo vetele ku cipango ca njuvo ya Muka-kukombelela Wakama. Co wakovelele mukati, watumbamene amo na vaka-kunyunga, ngeci amone muvihwila vyuma vyoshe. 59Vakulunu va vaka-kukombelela na vaka-Munga voshe vashakele ngila yakuwana vukaleo vwa makuli vwakuvangela Yesu ngeci vamutsiye, 60nameme kwezile vakaleo vavangi va makuli, oloni kuvavuwanene. Akukotoka, vanalume vavali vaile, 61#Yow 2:19 vendekele ngwavo, “Ou munu wendekele ngwendi, ‘Yange njasa kusiwula eyi Njuvo ya Shukulu Kalunga, co lalo njasa kuyitunga a matangwa atatu lika.’ ”

62Co uje Muka-kukombelela Wakama wemanene nakwendeka kuli Yesu ngwendi, “Kuma yove kuwesi na majwi akukumbulula a vyuma evi valinakukuvangela ngeci ndi?” 63Oloni Yesu wolokele kuluu. Co Muka-kukombelela Wakama wendekele kuli ikeye lalo ngwendi, “Mu lizina lya Njambi wakuyoya, ololo njikuleka ulisinge ngeci utuleke nga yove u Wakuvwavesa, Muna Njambi.”

64 # Ndan 7:13 Yesu wamukumbulwile ngwendi, “Muunendeka mukemwo vene. Oloni njimileka muvavoshe ngwange, tunde a simbu ino mukamona Muna Munu natumbama ku livoko lya cilyo lya Muka-nzili yoshe, alinakwija a mashelwa!”

65 # VaLe 24:16 A majwi awa, Muka-kukombelela Wakama watavwile vuzalo vwendi nakwendeka ngwendi, “Nashaula Njambi! Vikajo lalo tucishakezekela vukaleo vweka? Ololo vene mwalizivila kushaula kwendi a majwi endi! 66Mwayongola vati?”

Vakevo vamukumbulwile ngwavo, “Ali na mulonga, napande kutsa vene.”

67 # Isa 50:6 Asinoni vamujekwilile mate ku mesho, co vamupupile vimbanda 68vendekele kuli ikeye ngwavo, “Twambulwile vuka-kwimanena, yove Wakuvwavesa! Tuleke iya nakupupu.”

Petulu avyana Yesu

(Mako 14:66-72; Luka 22:56-62; Yowano 18:15-18,25-27)

69Petulu watumbamane anja mu lipela omo kwezile umo mumbanda ngamba ya Muka-kukombelela Wakama, co wendekele kuli Petulu ngwendi, “Nove lalo wakele amo na Yesu wa ku Ngalileya.”

70Oloni Petulu wavyanene ku mesho avo voshe, wakumbulwile ngwendi, “Yange kunjizivuka evi ulinakwendeka.” 71Co Petulu waile ku cikolo ca mbanja. Co ngamba mukwavo wamumbanda wamumwene wendekele na vanalume vaje vakele kuje ngwendi, “Ikeye wakele amo na Yesu wa ku Nazaleta.”

72Co lalo Petulu wavyanene nakukumbulula ngwendi, “Njilisinga ngwange kunjimuzivuka ou munalume!”

73Omo kwetile kasimbu kakandondo lika, co vaje vanalume vemanene kuyehi vezile, vendekele na Petulu ngwavo, “Mwa vushunga vene nove unapu umo wavo, omwo endekesi yove ikeyo inakujombolola!”

74Asinoni Petulu wendekele ngwendi, “Njilisinga ngwange njilinakumileka vushunga! Njambi anjihise nga kesi ngoco! Yange kunjimuzivuka ou munalume!”

Aje vene ndemba watambekele, 75co Petulu wanukile lijwi lya Yesu, omo wendekele nendi ngwendi, “Simbu ndemba kanda atambeke, ukanjivyana visimbu vitatu.” Co watuukile anja walilile manene.

Currently Selected:

Mateo 26: MBB

Highlight

Copy