Mateo 15
15
Vilongesa vya vakukulwila
(Mako 7:1-13)
1Asinoni vaFaliseo vamo na valongisi va majwi a Lishiko vezile kuli Yesu vatundile ku Yelusalema, vamwihwile ngwavo, 2“Omwo vikajo vandongisi vove vakaleulula vilongesa vya vakukulwila vetu? Omwo vakevo kuvesi kujwela ku mavoko avo omo valya!”
3Yesu wavakumbulwile ngwendi, “Co neni lalo, vikajo mukaleulwila mashiko a Njambi akukava mwaya vilongesa vyeni? 4#Kut 20:12; 21:17; Kwi 5:16; VaLe 20:9 Omwo Njambi wendekele ngwendi, ‘Singimika isho na vanyoko,’ co ‘woshe uje asinga ishe nambe vaina vanapande kumutsiya.’ 5Oloni yeni mukalongesa ngweni, nga munu ali na cuma cimo cije asa kukwasa naco ishe nambe vaina, oloni endeka ngwendi, ‘Vije njashakele kumikwasa njinavyana kuli Njambi,’ 6kapandele kusingimika ishe.#15:6 KAPANDELE KUSINGIMIKA ISHE: Nambe, kapandele kusingimika ishe nambe vaina. Mu ngila eyi munazimangana lishiko lya Njambi ngeci mukavangeye vilongesa vyeni. 7Yeni vaka-civembulu! Isaya muka-kwimanena wambulwile mamuvwa vyeni ngwendi,
8 #
Isa 29:13
‘Njambi ngwendi, vanu ava valinakunjisingimika lika na majwi avo,
oloni vimbunge vyavo vili kulyala nange.
9Cinapu cangoco kuli vakevo kunjilemesa,
omwo vakevo valinakulongesa mashiko a vanu
ngwe akewo anapu mashiko ange!’ ”
Vyuma vije vilingisa munu kupwa wakujwala
(Mako 7:14-23)
10Asinoni Yesu wasanene mbunga ya vanu vaije kuli ikeye, co wendekele navo ngwendi, “Tolillileni, co zivisiseni! 11Kesi cije cikovela mu kanwa ka munu cikeco cimuviisa embwe, oloni cije cituuka mu kanwa, cikeco cimuviisa.”
12Asinoni vandongisi vendi vezile kuli ikeye, vendekele nendi ngwavo, “Wazivuka ngwove vaFaliseo vanaluvala a vije unendekele navo?”
13Ikeye wavakumbulwile ngwendi, “Vimbuto vyoshe vije Tate wa mwilu kavikunine vakavitukula. 14#Luk 6:39 Veceleni, kesi mulinyenge ali vakevo! Vakevo vanapu vantwama va tupuputwa vatwamenena tupuputwa vakwavo. Co nga kapuputwa atwamenena kapuputwa mukwavo, voshe vavali vakawila mu mbulu.”
15Oloni Petulu wamukumbulwile ngwendi, “Tulumbunwine mucaila cisimo eci.”
16Co Yesu wendekele ngwendi, “Kuma neni lalo kumuzivisisa ndi? 17Kuma kumwazivukile? Cuma coshe cikovela mu kanwa ka munu cikovela lalo mwimo, co vakacumbila ku shwata. 18#Mat 12:34 Oloni vyuma vije vikatundu mu kanwa vikevyo vikatundu mu mbunge. Co evi vikevyo vene vikaviisa munu. 19Omwo mu mbunge ya munu mukemwo mukatundu viyongola vyavivi, vije vimutwamenena kukutsiya, na ku vupangala, na ku vwizi, na ku kuvangela, na ku makuli, na ku kufweya. 20Evi vyoshe vikevyo vikaviisa munu. Oloni kulya na mavoko akujeneka kujwela kuvyasa kuviisa munu.”
Kukulaela kwa munakazi
(Mako 7:24-30)
21Co Yesu watundile ku mutambela uje waile ku lifuti lya kuyehi na vinganda vya Tile na Sindone. 22Munakazi umo wa ku Kanana#15:22 MUNAKAZI UMO WA KU KANANA: Munakazi ou kapwile kaYunda embwe. uje wakele mu lifuti lije wezile kuli ikeye. Watambekele ngwendi, “Ove muna Ndaviti, mwane njizivileko mema ku mbunge! Munange wa munakazi ali na munzinzime wakujwala, co alinakuyanda manene.”
23Oloni Yesu kamukumbulwile lijwi nalimo lyai. Co vandongisi vendi vezile kuli ikeye, vamulombele ngwavo, “Mwilwise! Omwo alinakutambeka manene munima yetu!”
24Asinoni Yesu wavakumbulwile ngwendi, “Vanjitumine lika ku vimanga vakuzimbala va ku vanu va Isalele.”
25Oloni uje munakazi wezile kuli ikeye nakuwila ku myanja yendi wendekele ngwendi, “Shukulu, njikwaseniko.”
26Co wamukumbulwile ngwendi, “Kesi mwamuvwa kwana vyakulya vya vanike ku tutali.”
27Ikeye wakumbulwile ngwendi, “Mwa vushunga vene, shukulu, oloni nameme tutali lalo vakali vungululu vuje vukau ku mesa ya shukwa-inavo.”
28Ngecivene, Yesu wamukumbulwile ngwendi, “Ove munakazi kukulaela kwove kwakama manene! Cilingiwe kuli yove ngwe kukushaka kwove.” Co kutunda a simbu ije vene munendi wa munakazi wakangukile.
Yesu akangwisa vanu vavangi
29Co Yesu watundile kuje, washwangesele lishali lya Ngalileya. Walamatele a munkinda, co watumbamene kuje. 30Co vimbunga vyakama vezile kuli ikeye, vamunenelele vilema, na tupuputwa, na vaka-kusekwa mendi na mavoko, na tuveveve, co na vanu veka vavangi vaka-mishongo, vaje vavatumbikile ku myanja ya Yesu, co ikeye wavakangwisile. 31Ngecivene, vije vimbunga valikomokelele omwo vamwene tuveveve valinakwendeka, na vaka-kusekwa mendi na mavoko valimwamuvwa, na vilema valinakwenda, co na tupuputwa vamona, co valemesele Njambi wa Isalele.
Yesu alisa vanu vakupwa 4,000
(Mako 8:1-10)
32Yesu wasanene vandongisi vendi vaije kuli ikeye, co wendekele ngwendi, “Njazivila vanu ava mema ku mbunge, omwo vanatumbama nange matangwa atatu, co kuvesi na vyakulya ngeci vyalye. Kunjishaka kuvashandola na njala, amo vatsila lusike mu ngila.”
33Co vandongisi vendi vamwihwile ngwavo, “Kulijo tuwana vyakulya vyakupwamo vyakulisa mbunga eyi yakama muno mu mambo yangoco?”
34Co Yesu wavehwile ngwendi, “Muli na makende angai?”
Vamulekele ngwavo, “Mikasha ya makende itanu na ivali, na tuvisi tumo twatundondo.”
35Ngecivene, Yesu washikile ije mbunga vatumbame asi. 36Asinoni watambwile ije mikasha ya makende itanu na ivali amo na vaje visi, co wakandelelele kuli Njambi, wavipazwile, waanene kuli vandongisi vendi, co vandongisi vapangezelele vanu. 37Co voshe valile vakutile. Asinoni vandongisi vakungulwile vimbazuvwila vije vyasaleleo vashulisile mitonga itanu na ivali. 38Vaje valile vapwile vanalume 4,000, kujeneka kulavako vanakazi na vanike.
39Asinoni Yesu washandwele vanu ngeci vaye, ikeye wakovelele mu vwato, waile ku lifuti lya Mangandane.
Currently Selected:
Mateo 15: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
