Mateo 14

Kutsa kwa Yowano Muka-kumbwitika

(Mako 6:14-29; Luka 9:7-9)

1A simbu ije Helonde,#14:1 HELONDE: Helonde Antipase, muna Helonde Wakama (kenga 2:1). uje washwanene mu Ngalileya, wazivile lutsimo lya Yesu, 2co wendekele kuli vamyata vendi ngwendi, “Ou ikeye vene Yowano Muka-kumbwitika nasanguka ku vatsi mukemwo ali na nzili yakama yakulinga vizivukiso.”

3 # Luk 3:19-20 Omwo Helonde washikile ngeci vakwate Yowano, co vamukutile nakumwaka mu kamenga, omwo ali Helondiya, munakazi wa ndolome yendi Filipu. 4#VaLe 18:16; 20:21 Omwo Yowano Muka-kumbwitika walekele Helonde ngwendi, “Kesi mwamuvwa kwambata Helondiya!” 5Helonde washakele kutsiya Yowano, oloni wazivile lyova lya vaYunda, omwo vakevo vatumbwile Yowano ngwavo muka-kwimanena.

6Oloni omo litangwa lyakwanuka kusemuka kwa Helonde lyetele, muna Helondiya wa munakazi wakinine ku mesho avo. Co Helonde wazivile kuvwaa 7ngecivene, wamukulaesele ngwendi, “Njilisinga ngwange cuma coshe ulomba njikakwanaco!”

8Vaina vayongwele mwakalinga, co wendekele ngwendi, “Njaneni ololo ano vene mutwe wa Yowano Muka-kumbwitika a lilonga!”

9Co mwene wakele na vusiwa manene, oloni omwo a cikulaeso cije walisingile naco ku mesho a voshe vaje vatumbamene nendi amo ku mesa, co watavele kulomba kwendi. 10Ngecivene, vakatapele mutwe wa Yowano mu kamenga. 11Co mutwe wa Yowano vaunenele a lilonga nakuwana kuli uje mumbanda, co uje mumbanda wautwalele kuli vaina. 12Co vandongisi va Yowano vezile nakwambata muvila nakukautsinda, co vaile kuli Yesu kukamulekako.

Yesu alisa vanalume vakupwa 5,000

(Mako 6:30-44; Luka 9:10-17; Yowano 6:1-14)

13Omo Yesu wazivile muzimbu wa kutsa kwa Yowano, watundile ku mutambela uje mu vwato, waile mu mambo kwendi lika. Oloni omo vanu vavizivile vasezele membo avo, co vamukavele. 14Yesu watundile mu vwato, co omo wamwene mbunga yakama, wavazivilile mema ku mbunge, co wakangwisile vaje vakele nakuvinja.

15Omo kwapwile cingwezi vandongisi vendi vezile kuli ikeye, vendekele ngwavo, “Litangwa linatoko laja, co muno mu mambo, shandola vimbunga evi, co vaye ku membo vakalilandele vyakulya vakevo vavenya.”

16Yesu wavalekele ngwendi, “Kuvapandele kuya embwe, yeni vene vaaneni vyakulya ngeci valye.”

17Vakevo vendekele nendi ngwavo, “Kutwesi na vyakulya vyeka kuno, kuvanga mikasha ya makende itanu na visi vavali.”

18Co wendekele navo ngwendi, “Vineneni kuno kuli yange.” 19Asinoni washikile vanu vatumbame asi a mwila, co watambwile ije mikasha ya makende itanu na visi vavali, wakengele mwilu, co wakandelelele kuli Njambi. Wapazwile ije mikasha ya makende wayanene kuli vandongisi vendi, co vandongisi vapangezelele vimbunga vya vanu. 20Co voshe valile vakutile. Co vandongisi vakungulwile vimbazuvwila vije vyasaleleo vashulisile mitonga likumi na ivali. 21Co vanu vaje valile vapwile vanalume 5,000, kujeneka kulavako vanakazi na vanike.

Yesu enda akamwa ya mema

(Mako 6:45-52; Yowano 6:15-21)

22Asinoni Yesu wasindiiye vandongisi vendi ngeci vakovele mu vwato valivange kuya kulutwe musambwa ya lishali, simbu ikeye acishandola vanu ngeci vaye. 23Co omo wamanesele kushandola vimbunga vya vanu, walamatele ku munkinda endi lika nakulombela. Omo litangwa lyatokele, Yesu wakele kuje endi lika. 24Oloni a simbu ije vwato vwakele akati ka lishali, mankimba akele nakupindisa vwato omwo lihunzi lyakele nakuvupekumuna.

25Co a mungulungengu Yesu wezile kuli vakevo, alinakwenda akamwa ya mema. 26Omo vandongisi vendi vamumwene alinakwenda akamwa ya mema, vazivile lyova vendekele ngwavo, “Ndumba ya munu!” Co vatambekele na lyova.

27Oloni Yesu wendekele navo ngwendi, “Simpeni! Yange, kesi muzive lyova!”

28Co Petulu wamukumbulwile ngwendi, “Mwene, nga mwa vushunga yove, njitave njende a mema njije kuli yove.”

29Ikeye wamukumbulwile ngwendi, “Ija!” Ngecivene, Petulu watundile mu vwato nakwenda akamwa ya mema kuya kuli Yesu. 30Oloni omo wazivile lihunzi nakumona mankimba, wazivile lyova, co washangumukile kumbwitama, watambekele ngwendi, “Mwene, njovole!”

31Yesu wolwele livoko lyendi wamukwatele, wamulekele ngwendi, “Yove muka-kukulaela kwakundondo! Vikajo walingila vimata?”

32Co omo vakovelele mu vwato, lihunzi lyalendamene. 33Asinoni vandongisi vaje vakele mu vwato valemesele Yesu vendekele ngwavo, “Mwa vushunga vene yove u Muna Njambi!”

Yesu akangwisa vaka-kuvinja mu Ngenesaleta

(Mako 6:53-56)

34Co omo vajavukile lishali vezile ku lifuti lya Ngenesaleta. 35Co omo vanu va ku lifuti lije vamuzivukile, vatumine lijwi mu lifuti lyavo mwoshe, co vamunenelele vaka-kuvinja voshe. 36Co vamulambelelele ngeci atave vaje vakele nakuvinja vakwate nameme ku mukundwilo wa cikoveyo cendi, co vaje voshe vakwateleko vakangukile.

Currently Selected:

Mateo 14: MBB

Highlight

Copy