Yoshwa 16
16
Mitambela ivaanene Efalime na litambelo lya muyati wa Manase wa mu Kangombe ka Yambi
1Co nginga ya mu mbwela vayanene kuli vatekulwila va Yosefa kushangumukila ku Ndonga ya Yondau kuyehi na Yeliko, ku masima a mu ngangela ya Yeliko, co yakengeselele mu mambo. Co nginga yatundile ku Yeliko kuya ku lifuti lya malundu nakweta ku Mbetele. 2Co nginga yatundile ku Mbetele, yakengeselele ku Luze, yetile ku Atalote Andale, kuje vakele vaAleki. 3Asinoni lalo yaile mu kangombe ka yambi ku lifuti lya vaNjafeleti, nakweta ku mutambela uje wa ku Mbete Holone ya mu Cimbongo. Co yetele na ku Ngezele, yahwililile ku Lishali lya Menditelenyani.
4Ngecivene, vatekulwila va Yosefa, miyati ya Efalime na litambelo lya muyati wa Manase wa mu Kangombe ka Yambi, vakevo vatambwile mutambela ou wa lifuti kupwa vushwana vwavo.
Efalime
5Ou ukewo wapwile mutambela wa vatekulwila va Efalime. Nginga yavo yatundile ku Atalote Andale mu ngangela, yetele ku Mbete Holone, 6co kutunda kuje yakengeselele ku Lishali lya Menditelenyani. Co Mikimetate yakele ku kunto yavo. Co nginga yalizengele nakwita ku Tanaate Shilo, co yetile mu ngangela ku Njanowa. 7Asinoni yashelumukile kutunda ku Njanowa nakweta ku Atalote, na Naala, co yetele ku Yeliko asinoni yahwililile ku Yondau. 8Co nginga yakengeselele mu kangombe ka yambi kutunda ku Tapuwa kweta ku muna ndonga Kana, co yahwililile ku Lishali lya Menditelenyani. Ou ukewo mutambela uvaanenevatekulwila va Efalime kupwa vushwana vwavo, 9kukumbasanako na vinganda vimo na tumembo tuje twakele ku nginga ya Manase, oloni vavyanene kuli vaEfalime. 10#Maa 1:29 Oloni vaEfalime kuvashekelemo vaKanana vaje vakele mu Ngezele, ngecivene, vaKanana vacili nakukala akati ka vaEfalime na lelo lino, oloni valinakuvapangesa ngwe vindungo.
The Bible in Mbunda ©The Bible Society of Zambia, 2006