Yoshwa 17
17
Manase wa mu Kangombe ka Yambi
1Mutambela wa lifuti wa mu kangombe ka yambi ya Yondau vawanene ku litambelo lya muyati wa Manase muna Yosefa wa ntwatwa. Makile ishe ya Ngilyande, wapwile muna Manase wa ntwatwa, ikeye vamwanene mitambela ya Ngilyande, na Mbashane, mu ngangela ya Yondau, omwo naanga yendi yapwile ya vingenyenye. 2Ngecivene, lifuti lya mu kangombe ka yambi ya Yondau valyanene ku litambelo lya muyati wa Manase vaje vasaleleo, Ambiyezele, na Heleke, na Asilyele, na Shekeme, na Hefele, na Sheminda. Ava vakevo vapwile vatekulwila va vanalume va Manase muna Yosefa, co vakevo vapwile vakulunu va vikota vyavo. 3Zelofehande wapwile muna Hefele, Hefele wapwile muna Ngilyande, Ngilyande wapwile muna Makile, Makile wapwile muna Manase, co Zelofehande kakele na vana va vanalume, kuvanga va vanakazi lika. Mazina avo, Mahela, na Nowa, na Hongela, na Mileka, na Tileza. 4#Kul 27:1-7 Co vaje vana va Zelofehande vaile kuli Elyazale muka-kukombelela, na kuli Yoshwa muna Nune, na kuli vantwama, vendekele ngwavo, “Shukulu Kalunga washikile Mosesa kutwana mutambela wa livu kupwa vushwana vwetu kupwisa mumolika na vavushoko vwetu va vanalume.” Ngecivene, Yoshwa wavaanene vushwana amolika na vavushoko vwa ishavo va vanalume ngwe muje mwashikile Shukulu Kalunga. 5Omu mukemwo muvaanenene Manase mitambela likumi kukumbasana ku Ngilyande, na Mbashane mu ngangela ya Yondau, 6omwo vatekulwila va Manase va vanakazi vavaanene vushwana amo na vatekulwila vendi va vanalume. Co livu lya Ngilyande valyanene kuli vatekulwila va Manase vaje vasaleleo.
7Co nginga ya Manase yatundile ku Ashele nakweta ku Mikimetate, mu ngangela ya Shekeme. Co nginga yakengeselele ku mbwela kukumbasanako na vanu va ku Entapwa. 8Co livu lije lyazengelekele Tapuwa lyapwile lya Manase, oloni nganda ya Tapuwa, ije yakele ku nginga ya Manase, yapwile ya vatekulwila va Efalime. 9Asinoni nginga yakengeselele ku muna ndonga Kana. Co vinganda vije vyakele ku mbwela ya muna ndonga Kana vyapwile vya Efalime, nameme vyakele mu mutambela wa Manase. Oloni nginga ya Manase yetele na ku kunto ya muna ndonga Kana, co yahwililile ku Lishali lya Menditelenyani. 10Efalime wakele ku mbwela, co Manase wakele ku kunto, co mema a Lishali lya Menditelenyani apwile nginga yavo ya mu kangombe ka yambi. Co Ashele wakele ku kunto ya mu kangombe ka yambi, co Isakale wakele ku kunto ya mu ngangela. 11Co mu lifuti lya Isakale, na Ashele, Manase vamwanenemo nganda ya Mbete Shane, na Imbelyame, na vinganda vije vyazengelekeleko na Ndole nganda ije yakele ku cikuma, na Endole, na Tanaake, na Mengindo, na vinganda vije vyazengelekeleko. 12Oloni vatekulwila va Manase, kuvasele kushekamo vanu vaje vakele muje mu vinganda, ngecivene, vaKanana vakele nakuyoyelamo. 13#Maa 1:27-28 Nameme omo vaIsalele vapwile vaka-nzili, kuvashekelemo vaKanana voshe embwe, oloni vavapangesele ngwe vindungo.
Efalime na Manase wa mu Kangombe ka Yambi valomba lalo livu likwavo
14Co vatekulwila va Yosefa vendekele kuli Yoshwa ngwavo, “Omwo vikajo unatwanena mutambela umolika kupwa vushwana vwetu? Yetu tunapu tuvavangi manene omwo Shukulu Kalunga natuvezikisa.”
15Yoshwa wavakumbulwile ngwendi, “Nga munapu muvavangi manene, co lifuti lya malundu lya Efalime linapu lyalindondo, lamateni mu shwata mukalishinjile yeni vavenya mu lifuti lya vaPelezi, na vaLefaime ngeci mukakalemo.”
16Co vatekulwila va Yosefa vamukumbulwile ngwavo, “Lifuti lya malundu linapu lyalindondo, oloni vaKanana vaje vali mu vyana vali na matemba a vikuvo, na vaje vakala mu Mbete Shane, na vinganda vije vyazengelekako na vaje vakala mu Cana ca Njezelele.”
17Oloni Yoshwa wendekele ku miyati ya Efalime na Manase wa mu Kangombe ka Yambi ngwendi, “Mwa vushunga munapu muvavangi manene, co yeni lalo muli na nzili manene. Kumwapandele kukala na mutambela umolika embwe. 18Mwa vushunga lifuti lya malundu likapwa lyeni vene! Nameme likelyo lyapwa shwata, co mukashinjamo miti nakulipwisa lyeni kutunda ku shongo imo nakweta ku shongo ikwavo. Nameme vaKanana vakala na matemba a vikuvo, na nzili, oloni mukavashekamo.”
The Bible in Mbunda ©The Bible Society of Zambia, 2006