Yoshwa 15
15
Mutambela uvaanene kuli Yunda
1Mutambela wa muyati wa vatekulwila va Yunda, wetele ku nginga ya Endome na ku mambo ya Zine ku mbwela. 2Nginga yavo ya ku mbwela yatundile ku shongo ya Mema a Kalunga a Kutsa, 3co yakengeselele ku mbwela ku vulamatelo vwa Ngila ya Akelambime kutwala ku Zine. Yetile ku mbwela ya Kandeshe Mbaleneya, co yetile ku Hezelone nakulamata ku Andale, yongolokele ku Kaleka, 4yetele ku Azemone, co yakavele muna ndonga ije yakele ku nginga ya Ingito nakweta ku Lishali lya Menditelenyani, kuje kukekwo kuyahwililile nginga. Eyi ikeyo yapwile nginga ya ku mbwela ya lifuti lya Yunda.
5Co nginga ya mu ngangela yapwile Lishali lya Kutsa nakweta aje ayashangela Ndonga ya Yondau. Co nginga ya ku kunto yatundile ku cana ca Lishali lya Kutsa, 6yalamatele ku Mbete Hongela, nakweta ku kunto kuje kwaliwanenene Cana ca Yondau. Asinoni yalamatele lalo na ku Limanya lya Mbohane, (Mbohane wapwile muna Luvena), 7co nginga yalamatele kutunda ku Cana ca Tuyando nakuya ku Ndembile, asinoni yazengulukile ku kunto ku Ngilingale, kushungama na vulamatelo vwa Ngila ya Andumime ku mutambela wa cana ca mu mbwela. Co nginga yetile ku masima a tuvwelu-vwelu a ku Eneshemeshe, co yaile lalo ku Enelongele, 8asinoni nginga yetile mu Cana ca Hinome, ku mutambela wa ku mbwela ya lilundu kuje kwakele nganda ya vaNjevushi ikeyo Yelusalema. Co nginga yalamatele a lilundu ku mutambela wa ka ngombe ka yambi ya Cana ca Hinome, ku shongo ya ku kunto ya Cana ca Lefaime. 9Co nginga yetile akamwa ya lilundu nakweta ku masima a tuvwelu-vwelu a ku Nefetowa, yakengeselele ku vinganda vya muyehi na Munkinda wa Efelone. Co kutunda aje yakengeselele ku Mbala ikeyo Kilyate Njelime, 10kuje kwongolokelele nginga mu kangombe ka yambi ya Mbala nakweta ku lifuti lya malundu ku Endome, likelyo lifuti lya Seya, co yakengeselele lalo ku mutambela wa ku kunto ya Munkinda wa Njelime (nambe Kesalone), kushelumukila ku Mbete Shemeshe, nakweta ku Timena. 11Co nginga yakengeselele ku vushelumukilo vwa lilundu lya Ekelone ku kunto, co yakengeselele ku Shikelone, yetile ku Munkinda wa Mbala, yetile ku Njameniya, co yahwililile ku Lishali lya Menditelenyani. 12Co ngenge ya Lishali lya Menditelenyani ikeyo yapwile nginga ya mu kangombe ka yambi.
Mu vinginga evi mukemwo muvakele vatekulwila va muyati wa Yunda.
Kalembi afungulula Hevelone na Ndembile
(Maa 1:11-15)
13Co Kalembi muna Njefune wa ku muyati wa Yunda vamwanene litambelo lya mutambela wa Yunda ngwe muje mwashikile Shukulu Kalunga kuli Yoshwa. Watambwile nganda ya Hevelone, ikeyo nganda ya Alemba ishe ya Anake. 14#Maa 1:20 Co muje mu nganda Kalembi washekelemo vatekulwila va Anake, vikota vya Sheshai, na Ahimane, na Talemai. 15Co kutunda aje waile nakulwisa vanu vaje vakele mu Ndembile, ije nganda akulivanga yapwile Kilyate Sefele. 16Co Kalembi wendekele ngwendi, “Njikashombwesa munange Akesa kuli munalume uje akafungulula Kilyate Sefele.” 17Asinoni Otenyele, muna Kenaze ndolome ya Kalembi, ikeye waifungulwile, ngecivene, Kalembi washombwesele munendi Akesa kuli Otenyele. 18A litangwa lya ciwano ca vulo Otenyele wasindiiye Akesa#15:18 OTENYELE WASINDIIYE AKESA: Mu ciHevelu ngwavo, Akesa wasindiiye Otenyele. Kenga Maako 1:14. ngeci alombe lihya kuli ishe, co Akesa washulukile a cimulu cendi, co Kalembi wamwihwile ngwendi, “Vikajo ushaka?” 19Akesa wamukumbulwile ngwendi, “Njishaka munjane masima a mema a tuvwelu-vwelu, omwo lifuti lije munanjana lyapwa lyakuma.” Ngecivene, Kalembi wamwanene masima a tuvwelu-vwelu a ku cava nawa a ku shango.
Vinganda vya Yunda
20Ovu vukevwo vushwana vwa vatekulwila va muyati wa Yunda, 21Vinganda vya ku shongo ya lifuti lya vatekulwila va Yunda vyakele kuyehi na nginga ya Endome mu mbwela, mazina avyo, Kambezele, na Endele, na Njangule, 22na Kina, na Ndimona, na Andanda, 23na Kendeshe, na Hazole, na Itenane, 24na Zife, na Teleme, na Mbelote, 25na Hazole Handata, na Kelyote Hezelone ikeyo Hazole, 26na Amame, na Shema, na Molanda, 27na Hazale Nganda, na Heshemone, na Mbete Pelete, 28na Hazale Shuwale, na Mbeleshemba, na Mbiziyotiya, 29na Mbala, na Yime, na Ezeme, 30na Eletolande, na Kesile, na Holema, 31na Zikelange, na Mandemana, na Sanesana, 32na Lambaote, na Shilehime, na Aine, na Limone. Vinganda evi vyoshe vyapwile makumi avali na vitanu na viwana, kukumbasanako na vinganda vije vyavizengelekele.
33Vinganda vyakele mu lifuti lya kushelama mazina avyo, Eshetawole, na Zola, na Ashena, 34na Zanowa, na Enganime, na Tapuwa, na Ename, 35na Njalemute, na Andulame, na Soko, na Azeka, 36na Shalaime, na Anditaime, na Ngendela, na Ngendelotaime. Vinganda evi vyoshe vyapwile likumi na viwana, kukumbasanako na vinganda vije vyavizengelekele.
37Co lalo kwakele Zenane, na Handasha, na Mingendalengande, 38na Ndilyane, na Mizipa, na Njoketele, 39na Lakishe, na Mbozekate, na Engelone, 40na Kambone, na Lahemame, na Kitelishe, 41na Ngendelote, na Mbete Ndangone, na Naama, na Makenda. Vinganda vyoshe evi vyapwile likumi na vitanu na imo, kukumbasanako na vinganda vije vyavizengelekele.
42Co lalo kwakele Limbena, na Etele, na Ashane, 43na Ifeta, na Ashena, na Nezimbe, 44na Keila, na Akezimbe, na Malesha. Vinganda vyoshe evi vyapwile vitanu na viwana, kukumbasanako na vinganda vije vyavizengelekele.
45Co lalo kwakele Ekelone na vinganda vyayo na membo ayo, 46na vinganda vyoshe na membo aje akele muyehi na Ashendonde, kutunda ku Ekelone nakweta ku Lishali lya Menditelenyani. 47Co lalo kwakele Ashendonde na vinganda vyayo na membo ayo, na Ngaza na vinganda vyayo na membo ayo, vyetele na ku muna ndonga ku nginga ya Ingito na ku ngenge ya Lishali lya Menditelenyani.
48Co ku lifuti lya malundu kwakele Shamile, na Njatile, na Soko, 49na Ndana, na Kilyate Sefele (ikeyo Ndembile,) 50na Anambe, na Eshetemowa, na Anime, 51na Ngoshene, na Holone, na Ngilo. Vinganda vyoshe evi vyapwile likumi na imo, kukumbasanako na vinganda vije vyavizengelekele.
52Co lalo kwakele Alambe, na Nduma, na Eshane, 53na Njamine, na Mbete Tapuwa, na Afeka, 54na Humeta, na Kilyate Alemba (ikeyo Hevelone,) na Ziyole. Vinganda vyoshe evi vyapwile vitanu na viwana, kukumbasanako na vinganda vije vyavizengelekele.
55Co lalo kwakele Mayone, na Kalemele, na Zife, na Njuta, 56na Njezelele, na Njokendeme, na Zanowa, 57na Kaine, na Ngimbeya, na Timena. Vinganda vyoshe evi vyapwile likumi kukumbasanako na vinganda vije vyavizengelekele.
58Co lalo kwakele Halehule, na Mbetezule, na Ngendole, 59na Malate, na Mbete Anote, na Eletekone. Vinganda vyoshe evi vyapwile vitanu na imo, kukumbasanako na vinganda vije vyavizengelekele.
60Co lalo kwakele Kilyate Mbale (ikeyo Kilyate Njelime), na Lamba. Vinganda vyoshe evi vyapwile vivali, kukumbasanako na vinganda vije vyavizengelekele. 61Co mu mambo mwakele Mbete Alamba, na Mindine, na Sekaka, 62na Nimbeshane, na Nganda ya Mwongwa, na Engendi. Vinganda vyoshe evi vyapwile vitanu na imo, kukumbasanako na vinganda vije vyavizengelekele.
63 #
Maa 1:21; 2 Sam 5:6; 1 Miz 11:4 Oloni vanu va Yunda kuvashekelemo vaNjevushi vaje vakele mu Yelusalema. Ngecivene, vaNjevushi na lelo lino vacili nakukala amolika na vanu va Yunda.
The Bible in Mbunda ©The Bible Society of Zambia, 2006