Yombi 9
9
Yombi
1Co Yombi wamukumbulwile ngwendi,
2 #
Yom 4:17
“Mwa vushunga njazivuka mukemwo mucafwa vene.
Oloni vatijo munu asa kupwa muka-vushunga
ku mesho a Njambi?
3Vatijo munu asa kulinga na Njambi vimata?
Njambi asa kwihula vihula 1,000
oloni naumo wai asa kumukumbulula.
4Njambi muka-mana na nzili,
munu naumo wai emana nakumulwisa.
5Ikeye atundisa minkinda kwa kuyanukisa,
co mu vukalu vwendi ayinyongesa.
6Njambi akajajesa kaye nakuningangesa livu,
nakujajesa vimanda vyalyo.
7Ikeye ashika litangwa, co kulitu ceke,
na vingongonosi kutwa ceke ku vutsiki.
8Naumo wai wakwasele Njambi kujangumuna melu,
nambe kulyata a mankimba mu mema a kalunga.
9 #
Yom 38:31; Amo 5:8 Njambi ikeye muka-kutanga Vana va Tulwi
na Muta-mbambi mwilu,
na Lishano Mutumbu na vingongonosi vya mu mbwela.
10Kutwasa kuzivisisa vyuma vyakama vije vyakalingi,
na vikomokesa vyendi vyavingi
vije naumo wai asa kuvilava.
11“Kenga, Njambi aita kuyehi
oloni kunjimumono,
alinakuya kulutwe lwange
oloni kunjimunongonona.
12Ambata vije ashaka,
co naumo wai amuvindika,
naumo wai asimpa nakumwihula ngwendi,
‘Vikajo ulinakulinga?’
13Co vukalu vwa Njambi kuvwesi kuhwila muyehi.
Watsenene vitozi vendi vaje vakwasele Lahave,#9:13 LAHAVE: Lahave wapwile cikashama wa mu mema a kalunga uje ivayongwele kukala na nzili yakama.
uje cikashama wa mu mema a kalunga,
muka-kumuyeluwisa.
14Yange iyajo ngeci njikumbulule Njambi?
Njangula vatijo majwi ngeci njijokote nendi?
15Nameme nji muka-kujeneka mulonga,
cuma cinjilinga lika kulomba kutetela
kuli Njambi lyaako lyange.
16Nga anjitava njendeke,
kunjikulaela ngeci anjitolilila.
17Ikeye anjinakula na lihunzi lyakama nakunjitsena,
nakutumisa vimbandu vyange kwakujeneka mulonga.
18Ikeye katava ngeci njihwime muku wange,
ikeye nashulisa mwonyo wange na kayando.
19Yange njasa kumusindiya ndi?
Njasa kusindiya Njambi ndi?
Njasa kumutwala ku mbanja ndi?
Iyajo asa kumutwalako?
20Nameme nji muka-kujeneka mulonga
na munu wakukulaela,
oloni kanwa kange kanjihisa,
co vyuma vyoshe njilinakwendeka,
vilinakusholoka kunjihisa.
21Nameme nji muka-kujeneka mulonga,
oloni njinayeluwisa mwonyo wange,
22vyoshe vinapu mumolika.
Muka-kujeneka mulonga nambe muka-mulonga,
Njambi akavanyongesa.
23Nga mushongo wa ciita utsiya vwasi munu,
co Njambi ajola tuyando twa muka- mulonga.
24Njambi naana kaye kuli vaka-vuvi.
Ikeye napuputiisa mesho a vaka-kusompa voshe.
Co nga Njambi kacilingile,
ngwe iyajo nesikucilinga?
25“Matangwa ange alinakuhwa vwasi
kutuvakana muka-kushatuka lumbisi,
matangwa ange alinakwita vwasi,
oloni kuwamono vyavivwa.
26Mwonyo wange ulinakwita vwasi ngwe vwato vwita,
vwita vwasi ngwe kambembe akwavula muna kasumbi.
27Nga njendeka ngwange njivale tuyando twange,
co cihanga cange cijeneke kumwesa vusiwa,
cipwe cakujolela,
28njazivuka ngeci anga vene
Njambi akanjitumbula muka-mulonga.
29Vananjihisa laja,
vikajo lalo njundanganena?
30Kukwesi njapau yasa kutundisa vuvi vwange.
31Njambi anga akanjumbila mu mbulu ya mazilo,
nameme vuzalo vwange vukanjizivisa shwamwa.
32Nga Njambi wapwile munu,
nga njasa kumukumbulula,
twapandele kuya ku mbanja
mukusompa vin̄anda vyetu.
33Oloni kukwesi lyaako mukati ketu
ngeci atusompe muvuvali vwetu nange na Njambi.
34Njambi, kesi unjihise!
Kesi unjipupe embwe!
35Yange kunjesi na lyova,
njinapande kwendeka vene,
omwo njizivuka muyafwa mbunge yange.
The Bible in Mbunda ©The Bible Society of Zambia, 2006