Yombi 8
8
Mbilendande
1Asinoni Mbilendande kaShuhe
wakumbulwile ngwendi,
2“Unamanesa laja kwendeka majwi ove
angoco ndi?
3Njambi kesi kupengesa-pengesa vushunga,
ikeye kesi kujuka kulinga vya vushunga.
4Nga vana vove vanalingi vuvi
ku mesho a Njambi,
ngecivene, ikeye navahisa
ngwe ku vivulumuna vyavo.
5Oloni ololo tengulukeni
nakwimana na Njambi Muka-nzili yoshe,
6nga unapu uwamuvwa nakujela,
asinoni Njambi akaija nakukukwasa,
nakukwilwisila lalo naanga yove kupwa vwana vwove.
7Co vufuko vwoshe wazimbalesele
vunapu cuma cangoco,
kwesekesa ku vije vyakakwana Njambi.
8“Kenga kamandondo lika ku mana a ku san̄ulu,
yongola a vushunga vatatetu valilongeselevwo.
9Myonyo yetu yapwa ya kasimbu lika,
nacimo cai cituzivuka,
tulinakwita ngwe minzinze.
10Oloni tava vanalume va ku san̄ulu
vakunyanyama vakulongese,
yove tolilila lika vije vendeka ngwavo,
11‘Makanda kuwasa kumena kuje kukwesi mema,
co nalumo lwai ukawana likava lili mu nunda.
12Nga mema oma cau,
co akewo makanda alivanga kujujwama,
simbu acili amandondo kuwateta nakuwapangesa.
13Vanu vaka-vuvi vanalifu ngwe makanda,
cinyangavili cavo cinahu,
kasimbu lika, co Njambi vanamwivala.
14Vakulaela vwanda-nzili vwa kavuvi.
15Nga vajenjela a vwanda-nzili,
kuma vwasa kuvakwata ndi?
Nga vasakamena a vwanda,
vwasa kuvakwata ngeci vemaneo ndi?’
16“Vaka-vuvi vakapishuka mitwe
ngwe vimbuto vya mu litanya,
ngwe vimbuto vije vyashandokela mu lihya mwoshe.
17Co mizi yavyo ilizengelela a mutumbo wa mamanya,
co vikala mukati ka mamanya.
18Oloni omo vaikanguvulako,
co naumo wai akazivuka kuje kuyakele.
19Kenga, oku kukekwo kujolela kwa vaka-vuvi,
omo vakevo vanatunduko,
co veka vakaya nakwinga mitambela yavo.
20“Kenga, Njambi kakavyana muka- mulonga,
co ikeye kakakwasa vanu vaka-vuvi.
21Ikeye akakulingisa ngeci ujolele,
nakutambakana mukujolela,
22oloni akazivisa shwamwa vaje vakuzinda,
co membo a vaka-vuvi akanyonga.”
The Bible in Mbunda ©The Bible Society of Zambia, 2006