Yombi 10
10
1“Njajuka kuyoya.
Njikalyendekela kukulinyenga kwange.
Njikendeka vyakulinyenga
vije vili mu mbunge yange.
2Njikendeka kuli Njambi ngwange kesi unjihise.
Njileke! Vikajo unjilwisila?
3Kuma mwamuvwa kuli yove kuyandesa nakuyeluwisa
vije watangele yove vavenya ndi?
Nakujolela viyongola vya vanu vaka-vuvi?
4Kuma yove uli na mesho a vusitu?
Indi ukamono ngwe muvakamono vanu?
5Matangwa ove analifu ngwe matangwa a munu ndi?
Nambe myaka yove inalifu ngwe myaka ya munu ndi?
6Ngeci utondesese milonga yange
nakukon̄a vuvi vwange.
7Nameme uzivuka ngeci kunjesi na mulonga,
ngeci naumo wai asa kunjamena ku livoko lyove.
8Mavoko ove anjimungile nakunjipanga,
co ololo mavoko aje vene alinakunjinyongesa.
9Anuka ngeci wanjimungile ngwe vuma,
co ushaka kunjitsena nakunjiilwisila
lalo ku livu ndi?
10Yove waanene tate nzili yakunjikita,
co wanjikolesele mwimo lya vanana.
11Yove wamungile muvila wange
na vitsiya na mishisha,
nakufwika vitsiya mishuni na cikonde.
12Yove unanjana mwonyo na cizemo cije
kucesi kutenguluka,
co unanjinyungu ngeci njiyoye.
13Oloni ololo njazivuka ngeci
visimbu vyoshe vije wakele
na vutumbe vwa mu vushweke vwakunjivulumuna.
14Wakele nakunjinyungilila kumona nga njilinga vuvi,
ngeci uvyane kunjisambesa.
15Nga njilinga vuvi, njinapu munu wakuvindama,
nambe nga njiwakushungama,
kunjikasa kwandula mutwe wange
omwo njili na shwamwa yakama.
16Nga yange njivezika,
co yove unjiyomba ngwe ndumba mwakayombo kasitu,
co ulisholola lalo kupwa muka-kulinga
vikomokeso ali yange.
17Simbu yoshe uli na vakaleo vaka-kunjilwisa,
vukalu vwove kuli yange vulinakutwalao,
simbu yoshe uli na vutumbe vwavuhwa vwakunjilwisa.
18“Omwo vikajo Njambi watavele ngeci yange njisemuke?
Njapandele kutsa kunjimona ku munu.
19Nga njapwile ngwe njiwaiko,
nakunjitundisa mwimo kunjitwala ku mbumbo.
20Kuma matangwa akuyoya kwange kuwahwile ndi?
Njecele ngeci njivwaelele kamandondo.
21Ololo njilinakuya,
co kunjikeluka lalo,
njiya ku lifuti lya lisusulungu lyakuzivala vwii,
22lifuti lya lisusulungu, na munzinze, na vukalu,
kuje ceke calyo capwa lisusulungu.”
The Bible in Mbunda ©The Bible Society of Zambia, 2006