Yombi 7
7
1Mwonyo wa munu unafu ngwe mashwalale
vavasindiya kupanga,
matangwa endi anapu ngwe
a ngamba wakukumuna,
2ngwe ndungo ashungwiya manene munzinze,
ngwe muka-vipangi avandamena fweto yendi.
3A ngonde na ngonde kunjesi na cuma cakuyoya naco,
co a vutsiki na vutsiki njilinakuyanda.
4Omo njilala, co njendeka ngwange,
simbu mukajo njikenduka?
Co vutsiki vwoshe njilinakutonga-tonga
noo kutuuka kwa litangwa.
5Muvila wange unashulu na tulongolo,
uli na vimbandu,
na masina alinakutunda a vimbandu vyange.
6Co matangwa ange alinakwita
kujeneka cinyangavili,
matangwa ange alinakwita vwasi
ngwe mwakakwavula kambembe muna kasumbi.
7“Anuka, Shukulu Njambi,
mwonyo wange wapwa muku,
mesho ange kuwakamono lalo vyavivwa.
8Uje nanjimono ololo,
oloni kakanjimono lalo.
Mukanjishakezeka, oloni a simbu ije
yange njinai laja.
9Ngwe lishelwa lilinakutsitsivala,
co lizimangana,
mukemwo mwanafu munu
uje ali mu vukalo vwa vatsi,
kakatundumo embwe.
10Co kakelukila lalo ku njuvo yendi,
nambe vavushoko vwendi
kuvakamwanuka lalo.
11Ngecivene, kunjasa kulikela kwendeka embwe!
Njikatwalao kwendeka lika omwo ya vusiwa
vuje vuli mu mbunge yange.
Co njikatwalao kulinyenga
omwo ya vukalu vwa mwonyo wange.
12“Omwo vikajo mulinakunjinyungiiya ngacije?
Kuma mwayongola ngeci
yange njapwa nji cikashama
wa mu mema a kalunga ndi?
13Njilala nakweseka kuhwima,
ngeci njiwane kuhwima kukuvinjoka kwange.
14Oloni yeni mulinakunjitewesa na vinjozi,
mulinakunjizivisa lyova na vimona,
na vilota vya vutsiki,
15ngwe cinasiwile
nga kunjatsa lika cintukulu
kutuvakana kuyoya mu muvila ou wa tuyando.
16Njinonwa, omwo njajuka kuyoya,
njeceleni ange lika.
Mwonyo wange unapu wangoco.
17 #
Mya 8:4; 144:3 “Omwo vikajo munu wapwa wa vulemu kuli yove?
Omwo vikajo ulinakumwena
vije vyalinakulinga?
18Yove u muka-kumwindwisa a mutondo na mutondo,
co ukamwilula a kasimbu na kasimbu.
19Yove kuwesi kukenga kweka simbu yakama,
nambe kunjecela ngeci njimine mate ange.
20Nga njinalingi vuvi,
vikajo njikalinga kuli yove?
Yove muka-kunyunga vanu nakuvakenga.
Omwo vikajo unanjipangesa mu vipangi
a seteko iwunamanga?
Kuma yange njinapu citele cakama kuli yove ndi?
21Omo vikajo kuwesi kunjisambesela
ku vivulumuna vyange?
Kuma kuwasa kunjecela ku kupenga-penga kwange
oku njilinakulinga?
Njikalala mu mbumbo,
co mukanjishakezeka, oloni kumukanjiwana.”
The Bible in Mbunda ©The Bible Society of Zambia, 2006