Yombi 6
6
Yombi
1Asinoni Yombi wakumbulwile ngwendi,
2“Nga mishongo yange na tuyando twange
vyapwile vyakupeselesa a cipeseleso,
3vikevyo vyapandele kulema manene
kutuvakana lishen̄avu
lya ku mema a kalunga,
ngeci majwi ange kesi akukomokesa embwe.
4Njambi Muka-nzili yoshe nanjasha mikili,
ngeci vulembe vwayo
vunajalakana mu muvila wange.
Vyakujujwisa vya Njambi vilinakunjilwisa.
5“Ngolo akohyo omo alya mwila,
co ngombe wa lwavo akoloka kuluu
omo alya mwila wakuma.
6Oloni iyajo asa kulya vyakulya vya vushamu,
vyakujeneka kutova mwongwa?
Vutovalesi vukajo vuli mu mema-mena
a mukati ka livunda?
7Kunjesi na sholovya ya vyakulya
vya cifwa cangacije,
omwo vinapu vyakulya vya vunyengwe kuli yange.
8“Omwo vikajo Njambi kanjana evi njimulomba?
Omwo vikajo kakumbulula lilombelo lyange?
9Nga cinamuvwasele Njambi ku mbunge nga nanjitsii!
10Nga njazivukile ngeci alingamo,
nga njajolela nakundikangela,
nameme kuvinjoka kwange kunapu kwakama manene.
Njazivuka ngeci Njambi wapwa wakujela,
yange kunjavyanene vije vyakashiki.
11Nzili mukajo njilinayo ngeci njitwaleo kuyoya?
Omwo vikajo njili na kutwalao kuyoya
omo kunjesimo na cinyangavili?
12Kuma yange vanjipangele na limanya ndi?
Kuma muvila wange wapwa wa vunengu ndi?
13Yange kunjesi na nzili
yakulyamena yange vavenya,
naumo wai asa kunjamena.
14“Mu tuyando twakufwa ngeci otu,
kushakiwa vasamba va kulongwa,
nambe njinevala Njambi nambe embwe.
15Oloni yeni vasamba vange munanjikwisa,
ngwe vana va vindonga vaje vakuma a simbu ya lilanga.
16Mema a mu vana va vindonga evi anapu akutonola
nakuzivala, co mbundu inavifwiki,
17oloni a simbu ya ntwima vyuma cau.
18Co vimbunga vya vanu vazimbalele
mukushakezeka mema,
co mukwendangana vanyongele mu mambo.
19Vimbunga vya vanu vaka-kutunda ku Shemba na ku Tema
vashakezekele mema,
20oloni cinyangavili cavo cahwile omo kuvawanene mema.
21Yeni munafu ngwe vaje vana va vindonga kuli yange,
omo munamono tuyando twange,
co muziva lyova.
22Yange njamilombele ngeci munjane vwana?
Nambe ku vufuko vweni mwambateko vwana
munjilingileko lizika-kanwa?
23Nambe munjamene ku citozi?
Nambe ku muka-n̄ole?
24“Mwamuvwa, njilongeseni,
njilekeni mulonga wange,
yange njoloka kuluu,
co njitolilila kuli yeni.
25Majwi amavwa akazembeleka,
oloni yeni mulinakwendeka vyangoco.
26Yeni muyongola kuvayesa majwi ange,
munayongola ngeci vyendeka vya munu wa seo,
vinalifu na lihunzi lyakuhuwa.
27Yeni mwasa kuta n̄ela ngeci visiwa
muvapwise vindungo,
nakulifukisa a vasamba veni va a mbunge!
28Kengeni ku cihanga cange,
kunjesi nakwendeka makuli embwe.
29Yongoleni lalo a vije mulinakwendeka,
kengeni ngeci kunjalingile mwamuvi.
30Yeni muyongola ngweni
njilinakwendeka makuli.
Muyongola ngweni yange kunjasa
kunongonona vyavivi nevi vya vushunga ndi?
The Bible in Mbunda ©The Bible Society of Zambia, 2006