Yombi 5
5
1“Yombi, tambeka.
Nga munu umo akakukumbulula.
Kuli kangelo umo asa kukukwasa ndi?
2Ulinakulipesa yove vavenya
kutsa na cishota-mbunge, cinapu ca vulema.
3Njamwene vilema vaje vayoyele kuyoya kwakuvwa
oloni vwasi-vwasi njasingile membo avo.
4Co vana vavo va vanalume kuvakawana kwoloka,
naumo wai akavemanena mu mbanja.
5Vanu vaka-njala vakalya vimbuto vya vilema,
nameme vimbuto vije vyakumenena
mukati ka mambimbo,
vaka-kulakama vakashungwiya vufuko vwendi.
6Vuvi kuvwesi kumena mu livu ngwe vimena,
nambe tuyando kutwesi kumena mu livu ngwe mwila.
7Mwa vushunga embwe!
Munu ikeye muka-kulishakela tuyando,
ngwe muvikatinuka vishashe a tuhya.
8“Nga yange njinapwile ngwe yove,
nga njinashakezeka Njambi
nakumuleka mulonga wange.
9Ikeye lika asa kulinga vyuma
vyakama vije kutwasa kuzivuka
na vyuma vyakukomokesa
vije kutwasa kuvizivisisa.
10Ikeye akanyokesa nyonzi ano a kaye,
nakunyokesa lalo nyonzi mu mahya.
11Eyo, Njambi ikeye muka-kujundula vaka-kulikeesa,
nakwana kujolela kuli vaje voshe valila.
12Ikeye muka-kutanganesa matumbe a vaka-kunyanyama,
ngeci kukwesi cuma civalinga civezike.
13 #
1 Koli 3:19
Vaka-kunyanyama vatsa mu myeto
na kutsa mu matumbe avo vavenya,
14simbu ya mutanya vaimona ngwe lisusulungu,
co mukati ka mutanya vapapateya ngwe vutsiki.
15Oloni Njambi amena tuutu ku kutsa,
ikeye amena vaje vavalinakuyandesa.
16Aana cinyangavili ku tuutu,
nakwolwesa vaka-vuvi.
17 #
Vis 3:11; VaHe 12:5-6 Kenga, navezika munu uje Njambi amulongesa!
Ngecivene, kesi uyeluwise kulongesa kwa Njambi.
18 #
Hoz 6:1
Omo Njambi akutwa mbandu,
co azengao,
nambe akupupa na mavoko endi,
anga vene mavoko endi akukangwisa.
19Co ku simbu na simbu akakwamena ku vushonde,
20omo njala ya lyangengela ikaija,
ikeye akakunyunga,
co mu nzita akakunyunga ku kutsa.
21Njambi akakupatula kuli vaka-kwendeka makuli.
Ikeye akakwamena kukunyonga.
22Kuvakakunyongesa nambe kuukakala na njala,
kuukazivi lyova lya vikashama.
23Mahya awukalima
kuwakakala na shaku,
co vikashama kuvakakulwisa.
24Asinoni ukakala mu kwoloka mu njuvo yove,
omo ukakenga ku vimanga vove,
co ukavawana valimwamuvwa.
25Ukazivuka ngeci vatekulwila
vove vakapwa vavangi,
vana vove vakapwa vavangi ngwe mwila wa asi.
26Ukatsa mu vukulukazi vwove,
ngwe mukuta wa tiliku wa kuteja a simbu yawo.
27Kenga, cuma eci tunaciilula
nakuwana ngeci mukemwo mucafwa,
citolilile nakucizivuka yove vavenya.”
The Bible in Mbunda ©The Bible Society of Zambia, 2006