Yombi 4
4
Visimutwiya vyakulivanga
(4:1—14:22)
Elifaze
1Elifaze kaTemane wakumbulwile Yombi ngwendi,
2“Yombi, nga munu endeka nove,
co uviilila mu mbunge ndi?
Kunjasa kwoloka lika kuluu.
3Kenga, yove walongesele vanu vavangi,
nakwana nzili kuli vanu vaje vanazeye
4Omo munu wapelyangelele,
nakuzeya nakujuka,
co majwi ove amukolesele mukwimana.
5Oloni omo vukalu vunete kuli yove,
co wazeye nakushota mbunge,
omo ukenga avukevwo.
6Yove walemesele Njambi,
co kuyoya kwove kwapwile kwa vushunga,
co unapande kukala na cinyangavili nakusimpa.
7Anuka vya kunima,
munu iyajo muka-vushunga ivanyongesele?
8Vanu vaje valinga vuvi valinakukuna vuvi vwavo,
co vateja lalo vuvi vwavo.
9Njambi akavanyongesa mu vukalu vwendi vwakama.
10Majwi a vaka-vuvi anapu ngwe kwana kwa vindumba,
oloni Njambi avakanda nakupokozola mayo avo.
11Ngwe vindumba vaje vanajeneka
kukwata kasitu ngeci valye,
oloni vatsa, co vana vavo vashandoka.
12“Munu umo wanjiyevetelele,
co njazivile vije vyendekele.
13 #
Yom 33:15
Capwile ngwe njozi ku vutsiki,
ije ikatanganesa tulo.
14Njakasumukile nakuziva lyova,
co njajajele.
15Njazivile lihunzi pepya ku mesho ange,
njazivile mu vitsiya njenje.
16Njamwene cuma cimo cinemana kuje,
co njalikasamenene,
oloni kunjasele kunongonona cifwa caco.
Asinoni njazivile lijwi ngwalyo,
17‘Munu asa kupwa wakushungama
ku mesho a Njambi,
nambe kupwa wakujela ku mesho a
Ishamatanga wendi?
18Kengeni, inonwa Njambi kakulaelele
vangamba vendi va mwilu.
Ikeye akawana milonga nameme
kuli tungelo twendi.
19Kuma yove uyongola ngwove
ikeye akulaela citanga ca ku vuma,
citanga cakutunda ku likungu
cije vasa kutsena ngwe menzi?
20Munu asa kuyoya ku mutondo,
oloni atsa cintulu
omo litangwa kanda litoke.
21Vyoshe vije vyalinavyo
vakamunyekavyo,
atsa, oloni anga acijeneka mana.’
The Bible in Mbunda ©The Bible Society of Zambia, 2006