Yombi 3
3
Kulinyenga kwa Yombi kuli Njambi
1Munima yevi Yombi washangumukile kwendeka, co wasingile litangwa lije lyasemukile. 2Co Yombi wendekele ngwendi,
3“Yove Njambi,
singa litangwa lije njasemukile,
singa vutsiki vuje vanjimitile!
4Njambi, tengulula litangwa lije
lipwe lisusulungu.
Litangwa lije kesi vakalyanuke,
co lalo litangwa lije kesi likatwe ceke.
5Litangwa lije ulipwise lya mashelwa manene
na lisusulungu,
lipwe lyakufwika na mashelwa,
co tundisa ceke.
6Tundisa vutsiki vuje mu mwaka uje,
kesi uvutave vavulavele mu matangwa
a ngonde ije lalo.
7Kesi kusemuke munu mu vutsiki vuje,
majwi akujolela kesi akalemo.
8Leka vimbanda vasinge lije litangwa,
vimbanda vaje vasa kwononwesa Levyatane.#3:8 LEVYATANE: Vamo ngwavo Levyatane wapwa ngandu, nambe cikashama umo wakama. Vanu vakulaelele ngwavo vaka-manseno vasa kumupangesa mukutsitsivalesa litangwa.
9Vingongonosi vya a mungulungengu vitsitsivale,
kesi vitwe ceke,
vutsiki vuje kesi vukye,
nambe kesi vumone misha ya mutondo.
10Singa vutsiki vuje vwanjitavele ngeci njisemuke,
vutsiki vuje vwajenekele kunjishweka
ku tuyando nakukuviilila.
11“Mwamuvwa nga njatsililile mwimo lya vanana,
nambe nga njatsile a simbu ije njasemukile.
12Omwo vika vanana vanjilelelele a mendi avo?
Omwo vika vanjijamweselele ku mavele avo?
13Nga njatsile, ololo nga njilimukuhwima,
14kuhwima amo na vimyene na vaka-kushwana,
vaje vatungulwile mapela a ku san̄ulu.
15Nga njinalala ngwe vana va vimyene va vanalume,
vaje vashulisile vinjuvo vyavo
na ngolinde na siliva,
16nambe kulala ngwe mwanike ivanajombwesa limbo,
nambe ngwe mbututu wa kumona ceke.
17Mu vimbumbo vaka-vuvi valikela kulinga vuvi,
na vaje vanajuka kupanga,
vakahwima akukotoka.
18Nameme vinzinda vakakala mu kwoloka,
kuhwima ku vijokota na ku mashiko amakalu.
19 #
Njele 20:14-18
Co vanu voshe vakakala kuje,
vaka-lutsimo na vaje kuvatsimanene,
co na vindungo lalo vakapatuka.
20“Omwo vikajo Njambi ecelela vanu kuyoya mu tuyando?
Omwo vikajo wana ceke kuli vanu valimukuviilila?
21 #
Kuj 9:6
Omwo valinakuvandamena kutsa,
oloni kucesi nakwija,
vakevo vanakulaela mbumbo
kutuvakana vufuko vwoshe-ivwoshe.
22Kuvasa kujolela,
kuvanga noo vanatsi nakuvatsinda.
23Omwo vika vanamwesela ceke mu ngila ya munu
uje kasa kumona?
Uje Njambi nazikinina ngila yendi?
24Kukemanga kwange kunapu ngwe vyakulya vyange,
co mivinjo yange itika ngwe mema.
25Cuma cije cinjizivila lyova cinanjiwana,
neci cakujujwisa cinaija ali yange.
26Kunjesi mu kwoloka, nambe kuhwima,
co vyeseko vyange kuvyesi nakuhwa.”
The Bible in Mbunda ©The Bible Society of Zambia, 2006