Yombi 36
36
1Co Elihu watwaleleo nakwendeka ngwendi,
2“Njitolilile kamandondo,
co yange njikakumwesa ngeci
yange njili na vimo vyakwendeka
kwimanenako Njambi.
3Kuzivuka kwange cinatuvakana,
njipangesa vije njizivuka,
mukumwesa ngeci Njambi,
Ishamatanga wange wapwa wa vushunga.
4Cuma nacimo cai cinjendeka kuli yove cipwe ca makuli,
kenga, kulutwe lwove kuli muka-mana wa vushunga.
5“Kenga, Njambi ikeye Muka-nzili,
kesi kuyengula munu,
Njambi Muka-nzili yakukolesa mana akuzivisisa.
6Ikeye kesi kutava muka-vuvi ngeci ayoye embwe,
oloni simbu yoshe akapangesa vushunga
kuli vaka-kuyanda.
7Ikeye muka-kunyunga vaje vaka-vushunga,
akavatavesa, kushwana ngwe vimyene,
nakuvatava ngeci vavasingimike ku myaka yoshe.
8Oloni nga vanu vanakutiwa mu malyenge,
nakuyandela vije vivanalingi,
9co Njambi avamwesa vuvi vwavo,
na kulyalesa kwavo.
10Ikeye ashokolola matwi avo,
ngeci vazive vilongesa nakuvashika
ngeci vatunde ku vuvi vwavo.
11Nga vononoka kuli Njambi nakumupangela,
co vakayoya mwamuvwa mu kwoloka.
12Oloni nga kuvamutolilila,
co vakanyonga ku moko ya mukwale,
co vakatsa mu vunzimba vwavo.
13“Co vaje vaka-vuvi vakatwalao kuviilila,
nameme omo vavahisa kuvashaka kulomba ngeci vavakwase.
14Vakevo vatsa omo vacili vanike vavandondo,
co kuyoya kwavo kunapu kwa shwamwa.
15Oloni Njambi alongesa vanu omo vali mu tuyando,
apangesa mapakeso ngeci ashokolole mesho avo.
16“Njambi wakutundisile mu tuyando,
nakutava ngeci ukale mwamuvwa,
co mesa yove yashulile na mutumbo
wakama wa vyakulya.
17Oloni ololo yove valinakukuhisa
ngwe mucinakupande.
18Nyanyama kesi utave vaka-mazika-kanwa
kukukwisa embwe,
nambe vufuko vukuungumwine kweka.
19Kuma kulila kwove kukwamena ku tuyando ndi?
Nzili yove yoshe kuyasa kukukwasa ololo.
20Kesi ushungwiye vutsiki ngeci vwije,
simbu ije omo miyati vakanyonga.
21Nyanyama kesi utengulukile ku vuvi embwe,
omwo tuyando twove vatutumine
ngeci utunde kutuketwo.
22“Anuka vukama vwa nzili ya Njambi,
ikeye mulongisi wakama ku vyoshe.
23Naumo wai asa kuleka Njambi mwakupangela,
nambe kumuvangela ngeci nalingi vuvi.
24Anuka kushangazala vipangi vyendi,
vije vivashangazalele vanu mu myaso.
25Munu woshe namono vije vyalingile,
oloni kutwasa kuzivisisa vyoshe.
26Kutwasa kuzivuka vukama vwendi,
nambe kulava vungi vwa myaka yendi.
27“Njambi ikeye muka-kutundisa mema ano asi,
nakuwatengulula mambase a nyonzi.
28Ikeye akanyokesa nyonzi kutunda ku mashelwa,
nakunyoka mingole ku vanu voshe.
29Naumo wai azivuka mashelwa muwakende,
nambe muhyato muukalumu mwilu,
muje mwakala Njambi.
30Ikeye akatumu ceke mwilu mwoshe,
oloni kwisi ya mema a kalunga
kwakala lisusulungu lika.
31Omu mukemwo mwakalisa vanu,
nakuvana vyakulya vyakulisala.
32Ikeye akakwata muhyato na mavoko endi,
nakuushika ngeci utombole kuwila mu cimango.
33Cililimo ca nyonzi cituleka
ngeci naluvala manene omwo ya vuvi.
The Bible in Mbunda ©The Bible Society of Zambia, 2006