Yombi 35
35
1Co Elihu watwaleleo kwendeka ngwendi,
2“Yombi kesi mwamuvwa kuli yove kwendeka ngwove
yove unapu u wa kulongwa ku mesho a Njambi,
3nambe kwihula Njambi ngwove,
‘Vuvi vwange vukuviisa vatijo?
Vikajo njinawanao a kulinga vuvi?’
4Yange njikukumbulula nakukumbulula lalo vasamba vove.
5“Kenga mwilu!
Mona kutundwa kwa mashelwa kutuvakana yove!
6Nga ulinga vuvi, eci kucinene vushonde kuli Njambi.
Nga uviisa visimbu vyavingi,
kuma eci kucipu vushonde kuli ikeye ndi?
7Nga u muka-vushunga vika ukamwana?
Cuma nacimo cai catonda Njambi kuli yove.
8 #
Yom 22:2-3
Vuvi vwove vwasa kuviisa mukweni munu,
co vuvwa vuulinga kuli ikeye
vwasa kukwasa mukweni munu.
9“Omo vanu valinakuvayandesa,
co vavinjoka,
vatambeka ngeci umo avakwase.
10Oloni kuvesi kutengulukila kuli Njambi,
Ishamatanga wavo uje muka-kuvana cinyangavili
mu simbu yavo ya vukalu.
11Kuvesi kutengulukila kuli Njambi,
uje akatupwisa vaka-mana,
uje akatupwisa vaka-mana manene
kutuvakana tusitu nambe tuzila.
12Vakevo vatwa kawelele ngeci vavakwase,
oloni Njambi kavakumbulula embwe,
omwo vakevo vaka-kulyalesa,
co lalo vaka-vuvi.
13Cinapu cangoco kuli vakevo kutwa kawelele,
Njambi Muka-nzili yoshe
kasa kuvamona nambe kuvaziva.
14Yombi, yove wendeka ngwove kuwasa kumona Njambi,
oloni tatamena lika nakusimpa,
n̄anda yove ili kuli ikeye.
15Yove uyongola ngwove Njambi kesi kuhisa,
ngwove ikeye akatolilila kamandondo ku vuvi.
16Eci cinapu cangoco kuli yove kutwalao kwendeka
mwa vushunga vene yove kuuzivuka vije ulinakwendeka.”
The Bible in Mbunda ©The Bible Society of Zambia, 2006