Yombi 37
37
1Omo a eci mbunge yange ijaja,
yatundu mungangu yayo.
2Tolilileni yeni voshe,
ku lijwi lya Njambi,
ku muhyato uje ulinakutunda mu kanwa kendi.
3Ikeye akatumu muhyato kutunda
ku shongo imo ya ano asi
nakweta ku shongo ikwavo.
4Asinoni vakaziva kuluma kwa lijwi lyendi,
co aluma na lijwi lyendi lyakama,
co muhyato uhyahyata simbu yoshe.
5Akushika kwa Njambi
vyuma vyakukomokesa vilingiwa,
ikeye alinga vyuma vyakukomokesa
vije yetu kutwasa kuvilinga.
6Ikeye akashiki mema akukonda ngeci anyokele asi,
akanyokesa nyonzi ya vusuku-mbundu
kujulisa kwoshe.
7Avindika vipangi vya munu woshe,
ngeci vanu voshe vaje vanatanga
vazivuke vipangi vyendi.
8Tusitu vatunda a mombu,
co vakovela ku mateke avo.
9Lihunzi lya mu mbwela lihuwa,
co linena kankumba,
lihunzi lya ku kunto linena lisika.
10Muku wa Njambi ukondesa mema,
nakuwatengulula kupwa akukonda.
11Co muhyato wakuyemuna ukatundu mu mashelwa,
12akewo alinakushwenya akushika kwa Njambi.
Co alinga vyoshe vije Njambi avishika,
kwoshe-ikwoshe mu kaye mwoshe.
13Njambi akatumu nyonzi kunyokela ano asi,
ikeye asa kuyituma mukunyanyamesa vanu,
nambe mukuvamwesa vuvwa vwendi.
14“Yombi, imana tai kamandondo nakutolilila,
singanyeka vyuma vyakukomokesa vyakalingi Njambi.
15Wazivuka Njambi muje mwakashiki
na muje mwakayemwisa mihyato mu mashelwa ndi?
16Wazivuka mashelwa muje mwakapekumuka mwilu?
Evi vikevyo vipangi vya Njambi
vya vutongwe vyakukomokesa.
17Vikajo uzivila ntwima ya vuzalo vwove
omo mu lifuti munoloka na lihunzi lya mu mbwela?
18Kuma wasa kujala lilu ngwe Njambi?
Likelyo lyapwa lyakukola
ngwe vutale vwakusangununa.
19Tulongese mutukendekela kuli Njambi,
mana etu apwa amupulungwa,
kutwesi na vimo vyakwendeka.
20Kunjasa kulomba kwendeka na Njambi,
omwo vikajo njimwanena vukovelelo vwakunjinyongesa?
21“Co lilu linajele na lihunzi,
co ololo ceke cilinakuvyazima mwilu.
Cilinakuvyazima manene kutwasa kukengako.
22Ku kunto kwizilila kuvyazima ngwe ngolinde,
Co Njambi nazala vumpau vwakujujwisa.
23Nzili ya Njambi inapu yakama
ngeci kutwasa kushwenya kuli ikeye,
napu wa kulongwa na vushunga
mukupanga kwendi na vanu.
24Ngecivene, vanu vakamukomoka,
ikeye kesi kumbako mbunge,
kuli vaje valiyongola vakevo vavenya kupwa vaka-mana.”
The Bible in Mbunda ©The Bible Society of Zambia, 2006