Yombi 34
34
1Asinoni Elihu wendekele ngwendi,
2“tolilileni ku majwi ange,
yeni vaka-mana,
co jendekeleni matwi eni kuli yange,
yeni vaka-kuzivuka vyuma,
3 #
Yom 12:11
litwi likeseka majwi,
ngwe muje kanwa kakeseka vyakulya.
4Twanguleni cije cakushungama,
ngeci tuzivuke akati ketu cije cacivwa.
5Yombi nendeka ngwendi
ikeye napu wakujeneka mulonga,
ngeci Njambi natundisa vushunga muli ikeye.
6Ehula ngwendi, ‘Nameme nji muka-vushunga,
oloni vanjitumbula muka-makuli,
mbandu yange inapu ya mukongo,
oloni yange kunjalingile vuvi.’
7“Yombi, munalume iyajo nalifu nendi?
Ikeye kesi kukomoka Njambi.
8Uje aya mu munga ya vaka-kulinga mwamuvi,
co endeka na vanu vaka-vuvi.
9Omwo nendeka ngeci ngwendi nacimo cai cikwasa munu
kuvwaelela muli Njambi.
10“Ngecivene, njitolilileni,
yeni vanalume vaka-kuzivisisa!
Njambi kesi kulinga vuvi nambe kamandondo,
co Muka-nzili yoshe kesi kulinga vuvi embwe.
11 #
Mya 62:12
Ikeye aana cikandelela kuli vanu
ngwe ku vilinga vyavo,
nakuvapangesa kwesekesa ku vipangi vyavo.
12Njambi Muka-nzili yoshe
kesi kulinga vuvi embwe,
ikeye kesi kulinga vuvi ku munu.
13Kuma Njambi wambatele nzili yendi kuli weka ndi?
Nambe iyajo namukundika kaye koshe?
14Nga Njambi natundisile muku wa mwonyo,
15vanu voshe vakuyoya nga vanatsi,
nakwimuka lalo livu.
16“Nga munazivisisa tolilileni vinjendeka.
17Kuma mulinakuhisa vushunga vwa Njambi ndi?
Kuma mwayongola ngweni Njambi wazinda vushunga ndi?
18Njambi akahisa vimyene na vaka-kushwana,
omo vatenguluka na kupwa vangoco nambe vaka-vuvi.
19Ikeye kakemanena ku mutambela
wa vaka-kushwana lika embwe,
nambe kushangala vaka-kufuka ali vaka-kuutwa embwe,
omwo voshe ikeye wavatangele.
20Munalume asa kutsa vwasi-vwasi
mukati ka vutsiki.
Njambi akahisa vanu,
co vanyonga, akatsii vaka-nzili
nakupindako kwai.
21Mesho endi alinakukenga mu vingila vya vanu.
22Kukwesi lisusulungu lyakuzivala vwii
lyasa kushweka muka-vuvi ku mesho a Njambi.
23Njambi kesi kwimika simbu,
ngeci atundise vantwama
nakwingisamo veka lalo.
24Ikeye kesi kulohwelela
ngeci atundise vantwama
nakwingisamo veka lalo.
25Omwo azivuka vilinga vyavo,
co avanakula nakuvatsena
a simbu ya vutsiki.
26Ikeye akahisa vaka-vuvi mutanya mwelu,
kuje voshe vasa kucimona,
27omwo vanalikela kumukava,
nakuvyana lalo mashiko endi oshe.
28Vasindiiye tuutu kulilila kuli Njambi,
co Njambi wazivile mutambi wavo wakuvakwasa.
29“Nga Njambi ayongola kulinga cuma,
co naumo wai asa kumupopolola.
Nga ashweka cihanga cendi,
co vanu vapwa vangoco.
30Nacimo cai civakalinga vanu,
mukuvindika vaka-kujeneka kukulaela vaje valinakuvapakesa
ngeci kesi vavashwane.
31“Yombi, walitavela vivi vyoshe kuli Njambi?
Nakumukulaesa ngwove kuukalingi lalo vuvi ndi?
32Unehula Njambi kukumwesa milonga yove?
Co unatava kulikela kulinga vuvi ndi?
33Omwo ulinga vimata na vije vyalinga Njambi,
co yove umuyongwela kulinga
vije viwushaka ndi?
Co kuvatula n̄anda cili kuli yove,
kesi kuli yange embwe,
tuleke oni vati unayongola.
34“Munu woshe muka-mana mwa vushunga asa kutava,
co munu woshe wakunyanyama uje anjiziva,
nendi lalo akendeka ngwendi
35Yombi alinakwendeka vyangoco,
co nacimo cai calinakwendeka cinapu ca mana.
36Yongoleni vyuma vyoshe vije vyanendeka Yombi,
mumone nga alinakwendeka ngwe munu muka-vuvi.
37Co ku vuvi vwendi alinakukumbasanako kutengulukila,
ku mesho etu voshe,
ikeye alinakushendumuna Njambi.”
The Bible in Mbunda ©The Bible Society of Zambia, 2006