Yombi 31
31
1Njinalikumiya cikumiiyo na mesho ange
ngeci nalumo lwai njikakenga
mumbanda na lishungu.
2“Mutambela wange ukapwa ukajo
kuli Njambi wa mwilu?
Na vushwana vwange vukajo
kuli Muka-nzili yoshe wa mwilu?
3Kuma tuyando kutwesi kweta kuli vaka-vuvi?
Na luvinda kuli vaka-kulinga vyavivi ndi?
4Njambi azivuka vyuma vyoshe vinjikalingi,
co akalava manambo ange oshe.
5“Njilisinga ngeci kanda njilinge vuvi,
co lalo kanda njeseke kukwisa vakwetu.
6Njambi anjipeselese a cipeseleso cacivwa,
amone ngeci nga njili na mulonga.
7Nga njatundu mu ngila ya vushunga,
nambe njilikokweya yange vavenya kuya ku vuvi,
nga mavoko ange ali na mazilo a vuvi,
8co vimbuto vyange vavitukule,
nambe vanu veka valye vyakulya vije vinjinalimi.
9“Nga njashungwiiye munakazi wa mukwetu,
nambe kumuvandamena ku cikolo,
10co munakazi wange ekile vilya munalume weka,
nakulala a vulili vwa munalume weka.
11Omo cipululu capwa cacivi manene
capwa vuvi vuje vanapande kuvusompa maako.
12Cikapwa ngwe kunyongesa kwa tuhya,
kwenyeka vyuma vyoshe vije njilinavyo.
13“Nga njinavyana lijwi lya ngamba yange
wa munalume nambe wa munakazi,
omo valinyengelele kuli yange.
14Nga kunjilingimo,
vatijo njasa kulimona na Njambi?
Vatijo njasa kwendeka
omo Njambi aija mukunjisompa?
15Njambi uje vene wanjitangele,
ikeye lalo watangele vangamba vange.
16“Yange nalumo lwai njavyanene kukwasa tuutu,
co kunjatavele ngeci vifwile
vayoye kwakujeneka kuvakwasa,
17nambe kutava ngeci visiwa vakale na njala
omo yange njakele nakulya.
18Mukuyoya kwange kwoshe, njavanyungile.
19“Omo njawanene munu umo kautu,
uje kasa kulanda vuzalo,
20co njamwanene vuzalo vwa maka a vimanga,
akutunda ku litanga lya vimanga vange.
Co ikeye anjishangazala na mbunge yendi yoshe.
21“Nga njakwisile siwa umo,
ngeci njikasambe mu mbanja,
22co mavoko ange apokoke,
apamuke a vitsili vyange.
23Omwo yange njitewa cihiso ca Njambi,
co kunjasa kulinga cuma ca cifwa cangacije.
24“Yange kunjakulaelele mu vufuko,
25nambe kulyalesela a vufuko vwange.
26Yange kunjalemesele litangwa,
mukuvyazima kwalyo,
nambe ngonde mu vuvwa vwayo vwoshe.
27Kuvyanjungumwisile kunjitwala kweka mukuvilemesa,
nakutsemba livoko lyange nakuvisingimika.
28Eci nga cinapu mulonga ku mesho a maako,
omo nga njinapu wa
kulongwa kuli Njambi wa mwilu.
29“Yange kunjajolele omo vitozi vange
vakele mu tuyando,
nambe kuvwaelela omo vakele mu vukalu,
30yange kunjalingile vuvi
akulombelela vitozi vange ngeci vatse.
31Vanu voshe vaje vakapanga kuli yange,
vazivuka ngeci yange simbu yoshe
njikatambula vangenzi.
32Njalanyele vangenzi kwija ku njuvo yange,
co yange kunjavatavele ngeci valale
mushandangala yangoco.
33“Vanu vamo vakeseka kushweka vuvi vwavo,
oloni yange kunjashwekele vuvi vwange.
34Omwo njazivile lyova lya mbunga yakama,
co kayengu ka vavushoko kanjizivisile lyova,
ngeci njolokele kuluu, co kunjatuukile anja.
35“Kuma naumo wai atolilila
kuli vije njilinakwendeka ndi?
Njilisinga ngeci majwi oshe anapu a vushunga.
Eceleni Njambi Muka-nzili yoshe anjikumbulule.
Nga milonga yanjikutiiye citozi cange
vaisonekele ngeci njilimweneyo,
36nga njinavizala a vitsili vyange
ngwe vuzalo mu kulyalesa,
nga njinavyaka a mutwe wange ngwe cilongo.
37Nga njaleka Njambi vyuma vyoshe vinjalingi,
nakwenda nakundikangela ku mesho endi.
38“Nga njayandesele livu lije linjalimine,
nakulipangela na muuka ngeci lilinyenge,
39co nga njalilemo vyakulya vije vyamenenemo,
nakwecelela vandimi ngeci valanduke ku njala,
40nga njalingilemo,
co mu mwela wa tiliku na mu mwela wa mbale ya maumwa,
mumene mambimbo na shaku.”
Majwi a Yombi anahwila ano vene.
The Bible in Mbunda ©The Bible Society of Zambia, 2006