Yombi 32
32
Visimutwiya vya Elihu
(32:1—37:24)
1Ngecivene, vanalume vaje vatatu vonwele kukumbulula Yombi, omwo walimwene ikeye vavenya kupwa wakushungama. 2Co Elihu muna Mbalakele mutekulwila wa Mbuze, wa ku cikota ca Lama, waluvalele manene omwo Yombi walisambesele ikeye vavenya kuli Njambi. 3Co Elihu lalo waluvalele na vasamba va Yombi vatatu. Vakevo kuvasele kuwana ngila imo yakukumbulula Yombi, eci cikeco casholokele kupwa ngwe Njambi nalingi vuvi. 4Omwo Elihu wapwile mukwenje, co wavandamenene noo voshe ava vanamanesa kwendeka. 5Omo wamwene ngeci vaje vanalume vatatu kuvasele kukumbulula Yombi, co waluvalele.
Elihu
6Elihu muna Mbalakele kaMbuze wakumbulwile ngwendi,
“Yange nji mwanike, yeni mu vakulunu,
co yange njakele na lyova lyakumileka munjinayongola.
7Njayongwele ngeci yeni mwapandele kwendeka,
co yeni mu vanalume vakukola,
mwapandele kulongesa mana.
8Oloni unapu Munzinzime wa
Njambi Muka-nzili yoshe,
uje ukaija kuli vanu nakuvana mana.
9Kupwa mukulunu kucilingisa munu kukala na mana
nambe kuvakwasa kuzivuka
vije vinapu vya vushunga.
10Ngecivene, ololo
njishaka ngeci munjitolilile,
maneni njimileke vinjinayongola.
11Kengeni, njavandamenene majwi eni,
co njatolililile kukusompa kweni kwa mana
omo mwakele nakushakezeka vyakwendeka.
12Co njamitolililile,
naumo wai wavayesele Yombi,
nambe kukumbulula majwi endi.
13Nyanyameni kutewa mwendeka ngweni tunawana mana,
Njambi ikeye asa kukumbulula Yombi
kesi munu embwe.
14Yombi nakele nakwendeka kuli yeni,
kesi kuli yange embwe,
oloni yange kunjimukumbulula na majwi
ngwe umunakala nakwendeka yeni.
15“Munalikomokela, co kumukumbululako lalo,
kumwesi na majwi akwendeka.
16Kuma njivandamene omwo vanoloka ndi?
Omwo vanemana lika kuvakumbululako lalo?
17Embwe, ololo njikakumbulula
nakumileka vije njinayongola.
18Omwo njili na majwi,
co mbunge yange ilinakunjisindiya ngeci njendeke.
19Nga kunjiwana simbu yakwendeka,
co njikatuvika ngwe njeke ya cilambu
ije inashulu na vinyu vyaviha.
20Njinapande kwendeka,
ngeci njizive ehu ku mbunge,
njinashama kanwa kange nakukumbululako.
21Yange kunjikakenge ku muvila wa munu,
nambe kushangala munu embwe.
22Yange kunjizivuka kushangala,
nga njilingamo, co vwasi-vwasi
Njambi akanjihisa.
The Bible in Mbunda ©The Bible Society of Zambia, 2006