Yombi 30
30
1“Oloni ololo vaje vanapu vanike kuli yange,
valinakunjiyeluwisa!
Vaishavo simbu yoshe kuvesi na seo
ngeci kunjatavesele tutali twange
kukwasa kunyunga vimanga.
2Yapwile munga ya vanu vaje vanakuluvala,
vakuzeya manene vaje kuvasele kupanga vipangi vyange.
3Vapwile vaka-kuutwa na njala ya lyangengela,
ngeci vatsembele mizi yakuma
a simbu ya vutsiki mu mambo,
ku mitambela ya mu vingundu vyangoco.
4Vatukwile vimena vya mu mambo nakuvilya,
valile nameme mizi ya muti wakukombesa
wa vutovalesi.
5Vanavasheke mukati ka vanu,
na mitambi munima yavo,
ngwe muje vakatambeka vezi.
6Vakele mu viteke vya manzenzengoma,
na viteke vya mu mamanya vije vendile.
7Co mu mambo volwile ngwe tusitu,
co valikungulwile amo mwisi ya maputa.
8Vakevo vanapu vilema vangoco va lizina!
Co vavashekele mu lifuti.
9“Ololo valinakwija nakunjijola,
yange njinapu njiwangoco kuli vakevo.
10Vananjizindi nakunjijenjuka,
omo vanjimona, co vajekula mate.
11Omwo Njambi nanjipwisa munu wakuzeya
na munu wangoco, vananjitengulukila
na vukalu vwavo vwoshe.
12Munga ya viyambangani valinakunjilwisa,
vanjisheka nakushakezeka vingila
vyakunjinyongeselamo.
13Vananjishokela kwakuvandela,
co vashaka kunjinyongesa,
co naumo wai avavindika.
14Valinakunjilwisa ngwe mashwalale vatuva civumbe,
co vaija nakulyalanga ali yange.
15Vyakujujwisa vyanjiwana,
vukama vwange vuneti ngwe lihunzi,
co vufuko vwange vuneti ngwe lishelwa.
16“Ololo njili muyehi na kutsa,
matangwa a n̄avava ananjiwana.
17Ku vutsiki vitsiya vyange vyoshe vilinakutenda,
co mishisha ilinakungwima simbu yoshe.
18Njambi nakwata ku matwi a cikoveyo cange,
co vuzalo vwange vunatenguluka,
19Shukulu Kalunga nanjumbila mu vutome,
co njinatenguluka ngwe livu nambe ngwe lito.
20“Njilinakutambeka kuli yove
Shukulu Njambi,
oloni yove kuwesi nakunjikumbulula,
omo njilombela, co yove kuumbuko mbunge.
21Yove unemuka kupwa muka-muuka,
co ulinakunjiyandesa na nzili yove yoshe.
22Unanjecelela lihunzi lyakama
ngeci linjipekumune,
co wanjinakwila mu lihunzi lyakama lyakunjipekumuna.
23Njazivuka ngwange ulinakunjitwala ku kutsa,
ku njuvo ije ivavwaesela vaka-kuyoya voshe.
24Omo vikajo ulwisila munu wakuvindama laja?
Munu uje nacimo cai casa kulinga kuvanga lika kulomba
ngeci vamuzivileko mema ku mbunge?
25Kuma yange kunjalilisile vanu vaje
vakele mu tuyando?
Nambe kuzivila mema ku mbunge
vanu vaje vanajeneka ndi?
26Omo njakengelelele vuvwa, co kwezile vuvi,
omo njavandamenene ceke, co lisusulungu lyezile.
27Mbunge yange ilinakuziva cikela, kuyesi nakuhwima,
co a litangwa na litangwa njilinakumona tuyando.
28Njilinakwenda mu lisusulungu, mwakujeneka ceke,
njikemana mu mbunga ya vanu kulomba kunjikwasa.
29Lijwi lyange lili na vusiwa na vulika,
ngwe kuvwoza kwa mbanje nambe nkumbwa.
30Cikonde cange cinemuka cakuzivala,
co cilinakujamozoka,
co vitsiya vyange vilinakwenya na ntwima.
31Kuje kunjazivile laja myaso yakuvwaelela,
ololo njilinakuzivako lika vusiwa nakulila.
The Bible in Mbunda ©The Bible Society of Zambia, 2006