Yombi 29
29
Kumaneselela kwa vukaleo vwa mulonga wa Yombi
Yombi
1Yombi wakumbulwile ngwendi,
2“Nga njikala ngwe munjakele vingonde vyalaja
ngwe ku matangwa aje omo Njambi wanjinyungile.
3Njambi simbu yoshe wakele amo nange,
co wanjimwesele ceke ngeci
njase kwenda mukati ka lisusulungu.
4Ngwe muje njakele mwamuvwa
a matangwa a vutukuka vwange,
co vusamba vwange na Njambi
vwanyungile limbo lyange.
5Ngecivene, Njambi Muka-nzili yoshe,
wakele amo nange,
co vana vange voshe vanjizengelekele.
6Co vingombe vange va lwavo na vimembe
vakele na mavele amangi,
co na miti ya olive yakolele mu livu lya mamanya.
7Co omo njatuukile nakuya ku cikolo ca nganda
kuje kwakele mbanja,
8vakwenje vanjimwene, co vavandele,
co vakulunu vakatukile vemanene,
9co vamyata volokele kuluu.
10Nameme vanu va vulemu volokele kuluu.
11“Co munu woshe uje wanjimwene,
nambe kunjiziva,
wanjishangalele a vije njalingile.
12Omo tuutu vatambekele, co njavakwasele,
co njakwasele visiwa
vaje kuvakele noku kuvakundamene.
13Co vanu vaje vakele mu vukalu vwakama,
vanjishangazalele,
co njakwasele vifwile kukala mwamuvwa.
14Njazalele vushunga ngwe vuzalo,
co vukevwo vwanjifwikile,
co kulongwa kwange kwapwile ngwe
cikoveyo cacilaja,
nakupwa ngwe cilongo.
15Yange njapwile mesho a tupuputwa,
na mendi a vilema.
16Njapwile ngwe nji ishe ya tuutu,
co njakwasele vangenzi
vaje vakele mu tuyando.
17Njanyongesele nzili ya vaka-muuka,
co njacakunwine vaje vavayandesele.
18“Asinoni njayongwele ngwange
njikatsila mu njuvo yange,
co njikatumisa matangwa ange ngwe lishen̄avu.
19Njapwile ngwe mizi ya muti
yakukala mu mema simbu yoshe,
muti uje minango yawo ikajulu na lime.
20Simbu yoshe vanu vakele nakunjishangazala,
co nzili yakele muli yange simbu yoshe.
21Omo njakele nakunangula,
co vanu volokele kuluu,
vatolililile mwamuvwa vije njakele na kwendeka,
22co nacimo cai vawezeleleleko
omo njamanesele kwendeka.
Co majwi ange akovelele muli vakevo
ngwe mambase a nyonzi,
23munu na munu waatambwile mwamuvwa,
ngwe vandimi vatambula nyonzi ya musanda.
24Njavajolele mwesu-mwesu,
omo vajenekele likulaelo,
co kuzanguluka kwange kwavasimpisile.
25Njavaangwilile ngila yavo nakuvatwamenena
ngwe mwene atwamenena mashwalale vendi,
nakuvazembeleka mukulinyenga kwavo.”
The Bible in Mbunda ©The Bible Society of Zambia, 2006