Yombi 2
2
Satana eseka Yombi lalo
1Omo litangwa lyetele ngeci vana va Njambi vaije nakulisholola ku mesho a Shukulu Kalunga lalo, co na Satana nendi wakele akati kavo lalo. 2Shukulu Kalunga wehwile Satana ngwendi, “Unakala kuli?”
Co Satana wamukumbulwile ngwendi, “Njinakala nakwendangana oku noku, kwendangana-endangana ano a kaye oshe.”
3Co Shukulu Kalunga wehwile Satana ngwendi, “Unamono ngamba yange Yombi ndi? Kukwesi umo ano a kaye muka-vushunga na kulongwa, nakukomoka Njambi nakulitenga ku vuvi ngwe Yombi. Wanjishongangeyeye ngeci njikutave umulwise kwa mulonga, oloni Yombi angavene nanjikulaela simbu yoshe.”
4Co Satana wamukumbulwile ngwendi, “Munu aana vyoshe vije alinavyo ngeci ayoye. 5Oloni ololo aceseke kukwata ku muvila wendi, co akakushaula citona-mesho!”
6Ngecivene, Shukulu Kalunga walekele Satana ngwendi, “Kenga, ololo ali mu mavoko ove, oloni kesi umutsiye embwe.”
7Asinoni Satana watundile ku mesho a Shukulu Kalunga, walingisile muvila wa Yombi woshe kukala na vimbandu. 8Yombi wakatukile nakutumbama a lishito lya lito, co wanonele citambi nakulipala naco a vimbandu vyendi. 9Munakazi wendi wendekele kuli ikeye ngwendi, “Anga na ololo ucikakateya ku vushunga vwove ndi? Omwo vika kuushaula Njambi ngeci utse?”
10Co Yombi wakumbulwile ngwendi, “Yove ulinakwendeka ngwe munakazi wakujeneka mana. Vati tukatambula vyuma vyavivwa lika kuli Njambi kwakujeneka kutambula vyuma vyavivi?” Nameme ngoco mu tuyando twendi twoshe, Yombi kavulumwine ku mesho a Njambi.
Vasamba va Yombi vaija kuli ikeye
11Vasamba va Yombi vatatu vezile kuli ikeye mazina avo, Elifaze, wa ku nganda ya Temane, na Mbilendande, wa ku lifuti lya Shuwa, na Zofale, wa ku lifuti lya Nama. Omo vazivile tuyando twa Yombi, co vayongwele kuyako nakumuzembeleka. 12Omo vakele alyala, vamwene Yombi, oloni kuvamunongonwene. Co omo vamunongonwene vashangumukile kulila nakuulula, vatavwile vuzalo vwavo mukuviilila, nakulishawila livu a mitwe yavo. 13Asinoni vatumbamene amo nendi matangwa atanu na avali kwakujeneka kwendeka lijwi limo, omwo vamumwene vati wakele nakuyanda.
The Bible in Mbunda ©The Bible Society of Zambia, 2006