Yombi 28
28
Kushangazala mana
1Kuli vitapo vivakendi siliva.
Co kuli mitambela kuje kuvakajelesela ngolinde.
2Vanu vakendi vutale mu livu.
Co vayengununa mamanya nakuwapwisa vutale.
3Vanu vakanenge mu lisusulungu
lyakulova manene.
Co vakashakezeka mu mitambela
yakulova manene-nene,
co vakendi mamanya mu lisusulungu.
4Vakendi mbulu kulyala na vanu,
kuje munu naumo wai walyatako.
Vanu vakendi vimbulu vya vutale.
Kuje vakapanga mwavo lika,
co vajenjelela mu vimbulu na mikole.
5Vyakulya vilinakumena mu livu,
oloni mwisi ya livu cifwa cimo
vyuma vikatavozoka nakutsenoka.
6Co mamanya a mu livu akala na safile,
co vunga vwawo vwakala na ngolinde.
7Lishelele naumo wai wamona mu vingila
vya ku vitapo vya vutale,
nambe likuvi naumo wai wamonako.
8Kukwesi ndumba nambe cikashama wakutewesa,
wendele endi lika mu vingila vije.
9“Vanu vakendi mamanya akukola,
vakendi kwisi ya minkinda.
10Vakendi vingunja mukati ka mamanya,
nakuwanamo mamanya a seo yakama.
11Vakaziki mema ngeci kesi aite,
co vatuwisamo vije vyakushweka vilimo.
12Oloni kulijo vakawana mana?
Kulijo vakalilongesela kuzivuka?
13Munu kazivuka ndando ya mana,
nambe kutwasa kuwana mana ano asi.
14Co nzinga ngwayo,
‘Muli yange mana aimo,’
na mema a kalunga ngwawo,
‘Mana kuwesi muli yange.’
15Kutwasa kulanda mana na vulemu vwa siliva
nambe na vulemu vwa ngolinde.
16Co vuvwa vwa ngolinde na mamanya a seo,
kuvwasa kupwisamo mu seo ya mana embwe.
17Seo yawo yatuvakana ngolinde na kalivanjelo,
atuvakana seo ya vyakushoveya
na seo ya ngolinde yaivwa.
18Seo ya mana yatuvakana kolale
nambe kilisitela, nambe mamanya a lumbi.
19Co vuvwa vwa topaze na ngolinde yakujela
kuvwasa kuvweseka na seo ya mana embwe.
20Ngecivene, kulijo kuli nsina ya mana?
Kulijo tulilongesela kuzivisisa?
21Cikashama wakuyoya naumo wai asa kuwamona.
Nambe kazila wakupulula kasa kuwamona.
22Kutsa nakunyonga vinendeka ngwavyo,
‘Tunazivi lika lingwavo lya mana.’
23Njambi endi lika ikeye azivuka ngila,
ikeye lika azivuka mitambela
kuje kwakuwana mana.
24Omwo ikeye muka-kumona ahwila kaye,
akamono vyuma vyoshe vili mwisi ya lilu.
25Omo Njambi waanene lihunzi nzili yalyo,
co lalo wesekele vulemu vwa mema a kalunga.
26Omo Njambi wayongwele kulijo nyonzi
inapande kunyokela,
na mu ngila muje mwakwitila nyonzi yakuluma,
27asinoni ikeye wamwene mana,
co wesekele seo yawo,
co waanene vukaleo vwendi ali akewo.
28 #
Mya 111:10; Vis 1:7; 9:10 “Njambi wendekele kuli vanu ngwendi,
‘Kupwa vaka mana,
munapande kukomoka Shukulu Kalunga.
Co mukuzivisisa, munapande kutunda ku vuvi.’ ”
The Bible in Mbunda ©The Bible Society of Zambia, 2006