Yombi 27
27
Yombi
1Yombi wakumbulwile ngwendi,
2Njilisinga ali Muka-nzili yoshe
Njambi wakuyoya,
uje anjivyanesa vushunga
nakukaluwisa kuyoya kwange,
3omo Njambi alinakunjana kuhwima,
4co kanwa kange kukendeka cuma cimo cacivi.
Co ndaka yange kuyikendeka makuli.
5Co kunjikendeka ngwange
yeni munendeka mwa vushunga,
omo njicili nakuyoya
njikakolesa nakwendeka ngwange
yange kunjesi na mulonga.
6Njikakateya mu vushunga vwange,
co kunjikavwecela,
simbu yoshe injiyoya
mbunge yange kuyikanjivayesa.
7“Co voshe vaje valinakunjiyeluwisa nakunjilwisa,
vapwe vaka-cisingo ngwe vaka-vuvi,
vaka- vushunga.
8Cinyangavili mukajo valinaco vaka-vuvi,
a simbu ije omo Njambi
atundisa myonyo yavo?
9Omo vukalu vwija,
kuma Njambi akaziva mitambi yavo ndi?
10Kuma vakavwaelela muli Muka-nzili yoshe?
Kuma vakatambekela kuli Njambi
visimbu vyoshe ndi?
11“Njimilongese vukama vwa nzili ya Njambi
muje muvwafwa,
nakulumbununa vati Njambi Muka-nzili yoshe
mwayongwela vutumbe vwendi.
12Kengeni, muvavoshe mwalimwena
yeni vavenya vyanalingi,
omwo vikajo mukakateya vyangoco?
[Zofale]#27:12 ZOFALE: Zofale kuvamutumbwile mu livulu, oloni majwi awa alinakutumbula ikeye.
13Omu mukemwo Njambi Muka-nzili yoshe
mwakahisila vaka-vuvi, na vaka-kuyandesa.
14Nambe vakakala na vana vavangi va vanalume,
oloni voshe vakavatsiila mu nzita,
co vana vavo kuvakakala na vyakulya vyakupwisamo.
15Co vaje vakasalao vakatsa ku mushongo,
nameme vifwile vavo kuvakalinyenge a kutsa kwavo.
16Muka-vuvi nambe ali na siliva yaingi ngwe mamanya,
na vuzalo vwavungi manene ngwe maputa,
17eyo, akavukundika, oloni vaka-vushunga vakavuzala,
na vaka-kulongwa vakalipangezela siliva ije.
18Muka-vuvi atunga njuvo yendi
ngwe lishwa lya kazila,
nambe ngwe citanda ca muka-kuvingila mahya.
19Co a simbu yakukotoka,
vaka-kufuka valala mu kwoloka,
co omo venduka vawana vufuko vwavo vwai.
20Vyakujujwisa vikavawana ngwe livazi,
co lihunzi lya vutsiki likavapekumwina kulyala.
21Co lihunzi lya mu ngangela likavakomba,
nakuvatundisa ku membo avo,
22co Njambi akavasha kwa mema ku mbunge,
omo vashaka ngeci vatewe kuli ikeye.
23Vakavakandela vimbanda,
nakuvasheka na mulozi ku myela yavo.”
The Bible in Mbunda ©The Bible Society of Zambia, 2006