Yombi 26
26
Yombi
1Asinoni Yombi wakumbulwile ngwendi,
2“Yove unapu u mukwasi wakama kuli yange,
yange nji kautu, na munu wakuzeya!
3Kunangula kwove kwakuvwa,
co yove waana mana ku cilema
wakufwa ngwe yange!
4Iyajo iwuyongola ngwove asa kuziva majwi ove oshe?
Iyajo nakukwasele kuyongola majwi awa?
[Mbilendande]#26:4 MBILENDANDE: Kuvamutumbwile mu livulu, oloni majwi awa alinakutumbula ikeye.
5Minzinzime ya vaka-kutsa ilinakujaja
mema na vije vyakalamo vilinakujaja.
6Vukalo vwa vatsi vuli mushelengwa
ku mesho a Njambi,
co kuvesi na vintelo vyakuvazikinina ku mesho endi.
7Njambi wajangumwine lilu lya ku kunto
nakunyengelesa kaye a mukambwila.
8Njambi ikeye muka-kushulisa mashelwa na nyonzi,
nakuwanyunga kutewesa atavozoka na vulemu.
9Ikeye akashweke ngonde yoshe yamutunu mu lishelwa.
10Ikeye waangunwine ceke ku lisusulungu,
na cipalo cakulizenga akamwa ya mema a kalunga.
11Omo endeka ku vimanda vije vyakwata lilu,
co vijaja na lyova.
12Eyi inapu nzili yendi,
ije yahyanene mema a kalunga,
na vutongwe vwendi
wanyongesele cikashama Lahave.#26:12 LAHAVE: Kenga 9:13.
13Muku wendi ukewo walingisile lilu kelunguma,
co livoko lyendi lyatsiile cikashama
uje waputumukile.
14Oloni evi vinapu lika viyongola vya nzili yendi,
twavizivile lika na lijwi lyakuyeveta.
Iyajo asa kuzivuka mu vushunga
muvwapwa vukama vwa Njambi?”
The Bible in Mbunda ©The Bible Society of Zambia, 2006