Yombi 23
23
Yombi
1Co Yombi wakumbulwile ngwendi,
2“Na lelo vene kulinyenga kwange kunapu kwakulula,
co livoko lya Njambi lyanjilemena
kutuvakana kuvinjoka kwange.
3Nga njazivukile kuje kunjasa kumuwanena,
nakuzivuka kuya kuje kwali.
4Nga njasa kulyendekela
mulonga wange ku mesho endi,
nakwambulula vukaleo vwange vwoshe.
5Ngecivene, njikazivuka vika endeka,
co vati akasa kunjikumbulula.
6Kuma Njambi asa kupangesa nzili yendi yoshe
nakunjitengulukila ndi?
Embwe, oloni ngwe nanjitolilila.
7Yange nji wa kulongwa,
njasa kusimutwiya na Njambi,
anjikumbulula ngeci yange
kunjesi na mulonga ku vyoshe.
8“Kenga, nameme njiya mu ngangela
oloni Njambi waimo,
nameme njiya mu kangombe ka yambi kunjikamuwana.
9Njambi nakala nakupanga ku kunto na mu mbwela,
oloni anga kunjamumwene.
10Oloni Njambi azivuka ngila ije injilinakwenda,
omo anjeseka, co njikatundamo ngwe ngolinde yakujela.
11Lindi lyange linalyata mbe mu myanja yendi,
njinende mu ngila yendi nakutundamo kwai.
12Simbu yoshe njikalingi vije Njambi avishika,
co njikalingi cizango cendi,
kesi cizango cange embwe.
13“Ikeye kesi kutenguluka.
Co naumo wai asa kumuyeluwisa,
nambe kumuvindika vije vyashaka kulinga.
14Ikeye akashulisa vutumbe
vuje watumbile ali yange,
vutumbe vuje vunapu vumo
vwa matumbe amangi aje alinawo,
15omu mukemwo njilinakuziva lyova
ku mesho endi,
omo njisinganyeka evi vyoshe, co njimutewa.
16Njambi nazeyesa mbunge yange,
co Muka-nzili yoshe nanjizivisa lyova,
17nga njilavuka mu lisusulungu,
co lisusulungu lyakuzivala vwii
likafwika cihanga cange.
The Bible in Mbunda ©The Bible Society of Zambia, 2006