Yombi 22
22
Visimutwiya vyamucitatu
(22:1—27:23)
Elifaze
1Co Elifaze kaTemane
wakumbulwile ngwendi,
2“Kuma munu asa kupwa wa seo kuli Njambi ndi?
Munu uje ali na mana na seo
ku mesho endi vavenya?
3 #
Yom 35:6-8
Kuma vilinga vyove vya vushunga
vili na seo kuli Njambi?
Nambe vuvwa vwove kuma vukamukwasa ndi?
4Kuma yove ngwove omwo kuukomoka Njambi,
mukemwo mwakuvalazelela ndi?
Vikevyo vyaila nove ku mbanja ndi?
5Embwe, oloni omwo unalingi vuvi vwakama manene,
omwo a vyuma vyoshe vyavivi vije viwunalingi.
6Ndolome yove akufwetela vimbongo vyanatambula,
co wamutambwile vuzalo vwendi nakumuseza ngoco
nacimo cai cazalele.
7Yove wominime mema kuli vaje vajukile,
nakumina vyakulya kuli vaje vakele na njala.
8Wapangesele nzili yove na vukama vwove,
ngeci ushwane lifuti lyoshe.
9Kuwavyanene kukwasa vifwile lika,
oloni yove wevile nakupangesa lalo visiwa na cikela.
10Ngecivene, myeto yoshe inakuzengeleka,
co vwasi-vwasi lyova linakuwana.
11Ceke cove cinatenguluka lisusulungu
ngeci kuwasa kumona,
co livazi linakungumbula.
12Kuma Njambi kakele mwilu ya melu akuhyana,
nakukenga asi a vingongonosi,
nameme vili akamwa manene ndi?
13Co yove ukehula ngwove,
‘Vikajo Njambi vyazivuka?
Ikeye wavanda mu mashelwa,
co vatijo asa kutusompa?’
14Uyongola ngeci mashelwa akuzivala
amuvindika ngeci kasa kumona,
omo enda a mukambwila wa lilu.
15“Kuma yove ukenda mu vingila vyalaja,
vije vivendele vaka-vuvi ndi?
16Nameme simbu yavo te kanda icete,
livazi lyavakupwile nakuvongumwina kulyala.
17Ava vakevo vanu vaje vavyanene Njambi,
co vakulaelele ngeci ikeye nacimo cai asa kuvalinga.
18Oloni Njambi ikeye washulisile
vinjuvo vyavo na vyuma vyavivwa,
kunjasa kuzivisisa viyongola vya vaka-vuvi.
19Vaka-vushunga omo vacimona vajolela,
co vaka-kulongwa vavwaelela,
omo vamona vaka-vuvi vavahisa.
20Co vyuma vyoshe vije
vyakele navyo muka-vuvi vikanyonga,
co tuhya tukenyeka cuma coshe cije cikasalao.
21“Ngecivene, Yombi lihambe na Njambi,
likele kumupangesa ngwe citozi,
co mu ngila eyi, akakuvezikisa.
22Tambula vilongesa vitunda mu kanwa kendi,
co nyunga majwi endi mu mbunge yove.
23Eyo, unapande kulilumbilisa nakwiluka kuli Njambi,
nakuseza vuvi vwoshe vuje vuli mu njuvo yove.
24Umbila kuti ngolinde yove,
umbila ngolinde yove yaivwa
mu muna ndonga wakuma.
25Tava Njambi Muka-nzili yoshe
apwe ngolinde yove,
co tava apwe siliva yove
yakulundika mutumbo wakama.
26Co simbu yoshe ukapwa u muka-kukulaela kuli Njambi,
co ukawana ngeci ikeye napu nsina yakujolela kwove.
27Omo ulombela, co ikeye akakukumbulula,
co ukanyunga cisingo ciwalisingile.
28Co ukavezika mu vyoshe viwukalinga,
co ceke cikatwa mu ngila yove.
29Njambi akakeesa vaka-kulyalesa,
co akaamesa vaka-kulilumbilisa.
30Ikeye akakupatula nga unapu wa kulongwa,
nga vije viwulinga vinapu vya vushunga.
The Bible in Mbunda ©The Bible Society of Zambia, 2006