Yombi 24
24
1“Omwo vikajo Njambi Muka-nzili yoshe
kemikile simbu yakusompesa,
kupwa litangwa lya vushunga
kuli vaje vamupangela?
2“Vanu vashwenyesa vinginga vya mamanya
ngeci vawezeleleko ku lifuti lyame,
co vakevi vimanga nakuvaka ku matanga avo,
3vakambata vimulu va vana va visiwa,
co vatambula ngombe wakulimisa wafwile
kupwa cishimbikiya.
4Vakavindika tuutu kesi vakale na vyavo
vije vyavapande,
nakusindikiya vaje vanajeneka
ngeci vatewe nakuvanda.
5“Ngecivene, kautu napu ngwe ngolo wa mu mambo,
akashakezeka vyakulya mu mambo yangoco,
kukwesi kweka lalo kuje vasa kuwanako vyakulya
vya vana vavo,
6vakateje mu mahya aje kesi avo,
nakukungulula vushuka mu mahya a vaka-vuvi.
7Ku simbu ya vutsiki vakalala ngoco
nevi vyakulifwika vyai,
co nacimo cai casa kuvakwasa ku lisika.
8Vananyokowa ku nyonzi
ije ilinakwolomoka ku munkinda,
co vavumbatela mamanya omwo a lipapela
mwakuvanda.
9“Vaka-vuvi vakapwisa vana va visiwa vindungo,
co vakambata vana va kautu kuvapwisa cishimbikiya.
10Oloni tuutu vendangana mutotototo
omwo yakujeneka vuzalo,
co omo njala vatuta-tuta mikuta ya tiliku.
11Vakevo vakakamuna mazi a olive,
na mikolovozi ya vushuka vwa vinyu ngeci vanwe,
oloni nameme valinakukamuna, vali na lihwila.
12Mu vinganda, vaje vanavetwa,
na vaje valinakuvinjoka valinakuteta,
oloni Njambi kombuko mbunge ku malombelo avo.
13“Kuvali vanu valinakuvyana ceke,
kuvacizivuka, nambe kuya oku cilinakuvatwamenena.
14A mungulungengu, lipwepwe enduka
aya nakutsiya kautu na muka-kuyanda,
co ku vutsiki aya nakwiva.
15Co muka-vupangala avandamena lyezi,
co alifwika ku mesho ayongola ngwendi
naumo wai asa kumumona.
16A simbu ya vutsiki,
vezi vatuva vinjuvo nakukovelamo,
oloni a simbu ya mutanya, vavanda nakutewa ceke.
17Vatewa ceke ca litangwa,
oloni kuvazivi lyova omo lisusulungu liija.
Zofale akumbulula#24:17 ZOFALE: Kuvamutumbwile mu livulu, oloni majwi awa alinakutumbula ikeye.
18“Muka-vuvi ongumuka ngwe citi
ciwungumuka na livazi,
co mutambela wendi muje mwakala Njambi awusinga,
co kakai lalo nakupanga
mu lihya lyendi lya mikolovozi ya vushuka vwa vinyu.
19Ngwe mema akukonda akanyongolokota
na ntwima na lilanga,
ngecivene, muka-vuvi akanyonga
mu lifuti lya vaka-kuyoya.
20Nambe vaina kuvakamwanuka lalo embwe,
co vakamulya mainyo,
nakunyonga ngwe muti wakuwa.
21Eci cilingiwa omwo ikeye wayandesele vifwile,
co kamwesele cizemo ku mumba.
22Njambi, mu nzili yendi,
akanyongesa vaka-vukama,
Njambi alinga, co muka-vuvi atsa.
23Njambi amutava ngeci ayoye mwamuvwa,
oloni simbu yoshe alinakukenga lisho ali ikeye.
24Kasimbu lika muka-vuvi akala mwamuvwa,
oloni ajujwama ngwe shaku,
ngwe cishati ca mbuto cije vanashevela asi.
25Munu iyajo asa kuvyanangana
ngeci kucafwile ngacije?
Iyajo asa kuvyana ngeci majwi ange kesi a vushunga?
The Bible in Mbunda ©The Bible Society of Zambia, 2006