Yombi 19
19
Yombi
1Co Yombi wakumbulwile ngwendi,
2“Visimbu vingai mukayandesa
mwonyo wange nakunjipunzozola na majwi?
3Co a simbu na simbu mulinakunjituka,
co kumwesi na shwamwa mu ngila
eyi mulinakunjiyandeselamo.
4Nameme nga njinazimbala,
casa kumivavalesa ku mbunge vatijo?
5Yeni mwayongola ngeci munapu
muvavavwa kutuvakana yange,
co munapwisa tuyando twange
vukaleo vwa mulonga wange.
6Kuma yeni kumwamwene ngeci
Njambi ikeye nalingi eci ndi?
Ikeye nanjitela mweto mukunjikwata.
7Njilinakutambeka a vukalu vwendi,
oloni naumo wai anjitolilila,
co naumo wai aziva kutambeka kwange kwa vushunga.
8Njambi nashoko ngila yange,
co kunjasa kwita,
naaka lisusulungu mu ngila yange.
9Ikeye nambata vufuko vwange vwoshe,
co naviisa lutsimo lwange.
10Ikeye nanjimwakula ku mitambela yoshe,
co natukula cinyangavili cange,
ngwe muti nanjiseza ngeci njijujwame na kutsa.
11Njambi naluvala nakunjilwisa,
alinakunjipangesa manene
ngwe nji citozi cendi.
12Alinakutuma mashwalale vendi mukunjilwisa,
vainda tupila nakuvandamo
nakuzengeleka mbalaka yange.
13“Njambi nanjishondolwesa ku naanga yange,
njinapu ngwe nji mungenzi oni kuli vaje vanjizivukile,
14vavushoko vwange na vasamba vange vananjivala.
15Co vaje vapwile vangenzi mu njuvo yange vananjivala,
co vangamba vange va vambanda valinakunjipangesa
ngwe nji mungenzi na muka-kwija.
16Omo njisana ngamba yange,
co kakumbulula embwe,
nameme nga njimulomba kunjikwasa.
17Co munakazi wange kashaka kuziva muku wange wakunika,
na vandolome vange shavo kushwenya kuyehi nange.
18Vanike valinakunjishaula
nakunjijola omo vanjimona.
19Vasamba vange va a mbunge
vanjikenga na vunyengwe,
vanu vaje vanjazemene manene,
ololo vananjitengulukila.
20Cikonde cange cilinakukapangela
a vitsiya vyange,
njilinakuyoyela lika aandondo.
21“Njizivileniko mema ku mbunge!
Yeni munapu mu vasamba vange.
Livoko lya Njambi likelyo lilinakunjipupa.
22Omwo vikajo munjipakesela
ngwe mwalinakulinga Njambi?
Kuma kumwapwisilemo mukunjiyandesa ndi?
23Nga casiwa munu umo anuke majwi ange,
nakuwasoneka mu livulu!
24Nambe kucokola majwi ange mu limanya na shinjo,
nakuwasonekamo ngeci akalemo simbu yoshe.
25Oloni njazivuka ngeci Numbi yange
akaija akukotoka nakunjamena.
26Nameme cikonde cange cinaliwa na mushongo,
kunjikamono Njambi mu muvila ou,
27njikamumona na mesho ange,
co ikeye kakapu mungenzi lalo kuli yange.
Kusimpa kwange kwonwene,
omwo yove wendekele ngwove,
28‘Vatijo twasa kumuyandesa?’
Yeni mwashakezekele mumo
mwakulyolela malambi ngeci munjilwise.
29Oloni ololo, teweni mukwale,
mukwale uje unena vukalu vwa Njambi a vuvi,
ngeci muzivuke ngweni kwali umo ikeye lyaako.”
The Bible in Mbunda ©The Bible Society of Zambia, 2006