Yombi 20
20
Zofale
1Co Zofale kaNamate
wakumbulwile ngwendi,
2“Ngecivene, viyongola vyange
vinjisindiya kukumbululako,
omwo vwasi-vwasi vuli muli yange.
3Evi viwunendeka vinapu vyakushaula,
oloni njazivuka mwakukukumbulwila.
4Kuma kuwazivukile ngeci ku visimbu vya ku san̄ulu,
omo vaakele vanu vakulivanga ano asi,
5kujolela kwa vaka-vuvi kukwesi kwishwala.
Co kuvwaelela kwa vaka-kujeneka kukulaela
kwapwa kwa kasimbu kakandondo.
6Nameme wakele na lutsimo lwakama
lwakweta na mwilu,
na mutwe wendi weta ku mashelwa,
7oloni ikeye vakamupekumwina
kulyala ngwe liputa.
Vaje vamuzivukile vakalikomokela
nakutonda kuje kwanai.
8Co akaita ngwe njozi,
co kuvakamumono lalo,
co akazimangana ngwe cimona ca ku vutsiki.
9Ikeye kakasholoka lalo ku mwela kuje kwakele,
10co vana vendi va vanalume vakavwaelela
na vije vyevile kuli vaka-kuutwa.
11Muvila wendi uje wapwile wa vukwenje na nzili,
oloni ololo ukemuka likungu.
12“Vuvi nambe vupwelelela mu kanwa kendi
nambe avushweka kwisi ya ndaka yendi,
13kashaka kuvwecela embwe,
oloni avunyunga mu kanwa kendi,
14oloni vyakulya vili mwimo lyendi
vimuka vyakulula,
ngwe vushungu vwa limbwambwa.
15Muka-vuvi akashanja vufuko vuje wevile,
Njambi avutundisa mwimo lyendi.
16Vyoshe vije vyamina muka-vuvi
vinapu ngwe vushungu vilinakumutsiya
ngwe kushumuwa ku linyoka wa vushungu.
17Kakamono vindonga na mipinda
vije viitisa vuki na mavele akukonda.
18Akelwisa vyoshe vije vyapangelele,
co kakajolela na vufuko vwendi,
19omwo wayandesele nakuyengula vaka-kuutwa,
nakutambula vinjuvo vya vanu
vije valitungilile vakevo vavenya.
20Muka-nuna kapwisamo na vije alinavyo.
21Nacimo cai casaleleo cajenekele kulya,
ngecivene, kufuka kwendi kukukeshwala.
22Nambe wakele na vufuko vwavungi
oloni akavujeneka,
co tuyando tukaija ali ikeye.
23Omo akashaka kulya nakukuta!
Co Njambi akamuhisa na vukalu vwendi vwakama.
24Omo akatewa ku mukwale wa cikuvo,
co mukili wa vuta vwa lusipa vwa vunengu
ukamwasha nakumuwisila asi.
25Co mukili ukamutiva a muvila wendi,
co shongo ya mukili ikandweka maninga endi,
nakumujujwisa manene.
26Vyuma vyoshe vije vyatulikile vikanyonga,
co tuhya tuje kavwekele munu,
tukamwenyeka na naanga yendi yoshe.
27Lilu likasholola vuvi vwa munu,
co kaye kakana vukaleo ali ikeye.
28Vufuko vwa mu njuvo yendi vukashandoka,
co vukahwa a litangwa lya vukalu vwa Njambi.
29“Otu tuketwo tuyando twa vaka-vuvi,
tuyando tuje Njambi akavaanatwo.”
The Bible in Mbunda ©The Bible Society of Zambia, 2006