Yombi 17
17
1Mbunge yange inazeye,
matangwa ange amandondo,
co mbumbo inanjivandamena.
2Mwa vushunga vaka-kunjishendumuna vananjizengeleka.
Co lisho lyange linamono
muvali nakunjishangumuka.
3Njambi, njinapu muka-kulongwa.
Tambula lijwi lyange.
Kukwesi umo weka lalo akundwiya evi vinjendeka.
4Omu mukemwo unashoko mana avo,
co kesi utave vanjilyatangele.
5Mu cisimo calaja,
munu wenda vungungu vasamba vendi
omwo a vimbongo,
co vana vendi valinakuyanda
omwo a cuma eci.
6Co ololo vanu valinakupangesa
cisimo eci ali yange,
co vaija nakunjijekwila mu luholo lwange.
7Co mesho ange lalo anatsitsivala
omwo yakulila manene,
mavoko ange na mendi ange vinayondwa.
8Vaje valitumbula kupwa vaka-kulongwa,
vakalikomokela,
co voshe vanjihisa ngwe nji muka-vuvi.
9Vaje valitumbula kupwa vaka-vulemu,
vanavetesa kupwa vaka-vushunga.
10Nga voshe vezile nakwimana kulutwe lwange,
co nga naumo wai njinesi kuwaneneo muka-mana.
11“Matangwa ange anahu,
co matumbe ange anonwa,
na cinyangavili cange cinahu.
12Oloni vasamba vange vendeka ngwavo
vutsiki vukevwo mutanya,
co vendeka ngwavo ceke cili muyehi,
oloni yange njazivuka ngeci
njicili mu lisusulungu.
13Oloni cinyangavili cange
cili lika ku lifuti lya vatsi,
kuje njikalala mu lisusulungu.
14Co njikatumbula mbumbo ngwange tate,
na mainyo vaje vakanjilya,
njikavatumbula vanana na vandokazi vange.
15Cooni cinyangavili cange cili kulijo?
Co iyajo nacimono?
16Cinyangavili kucikai amolika nange,
omo njikashelumuka ku lifuti lya vatsi.”
The Bible in Mbunda ©The Bible Society of Zambia, 2006