Yombi 16
16
Yombi
1Co Yombi wakumbulwile ngwendi,
2“Njaziva laja majwi akufwa ngacije,
kuzembeleka mulinakunjizembeleka nakwo,
kunapu kwakunjizeyesa lika.
3Majwi a seo kesi kuhwa ndi?
Nambe vika vyamishangumuna ngeci mukumbululeko?
4Nga yeni mwapwile ngwe yange,
nange ngwe njapwile ngwe yeni,
nga njasa kwendeka vyuma vyoshe vije mulinakwendeka.
Nga njasa kumipikisila mutwe wange,
nakumisindakana na majwi amangi.
5Njasa kumitakamesa nakuminangula,
nakwendeka kuli yeni nakumizembeleka.
6“Oloni navimo vyai vinjendeka vikwasa,
co lalo kulikela kuluu,
kucasa kwolwesa kuvinjoka kwange.
7Njambi, yove unanjizeyesa laja,
unecelela naanga yange vavatsiye.
8Yove unanjikwata,
co unapu u citozi cange.
Asala lika cikonde na vitsiya,
co vanu vacendeka ngeci cinapu
vukaleo vwa vuvi vwange.
9Co mu vukalu Njambi nanjitavozola
cilyo na cilyo,
nanjiyungumwina mesho nakunjizinda.
10Vanu vananjishendumuna,
vananjipupu ku nana, nakunjikungulukila.
11Njambi nanjikundika ku mavoko a vaka-vuvi.
12Njayoyele mu kwoloka,
oloni Njambi wanjikwatele a mulivu,
nakunjimwakula nakunjitsena.
Njambi nanjipwisa seteko yakulilongesela,
13nakunjasha mikili ku mitambela yoshe,
mikili ije inanjitivi nakunjivetwesa,
nameme ngoco kesi na mema ku mbunge
kuli yange embwe.
14Ikeye anjivetwesa vimbandu-mbandu,
co anjicuncumukila ngwe lishwalale
wakuzaluka na cizindo.
15Njalitongela cikeleya ca vusiwa,
co njalishuwila livu ku mutwe wange.
16Mesho ange avengele nakulila,
co kunjasele kumona mwamuvwa,
17oloni yange kunjesi na mulonga nambe lwozi lwai,
co lilombelo lyange linapu lyakujela kuli Njambi.
18“Ove kaye, kesi ushweke kupenga-penga kwange
kuje njalingile!
Kesi utave kwolwesa mutambi wange wa vushunga!
19 #
Yom 19:25
Kwali mukaleo wange mwilu, wakunjimanena.
20Vasamba vange vanjishendumuna,
co mesho ange alinakulila misozi
kuli Njambi.
21Njishaka munu umo wakunjimanena kuli Njambi,
ngwe munu emanena musamba wendi.
22Ololo myaka yange ilinakuhwa,
co njilinakuya mu ngila ije kunjikeluka.
The Bible in Mbunda ©The Bible Society of Zambia, 2006