Yombi 13
13
1“Mesho ange anamono vyoshe evi,
na matwi ange anazivisisa.
Vyuma vyoshe viwunendeka,
yange njavizivile laja.
2Vije vimuzivuka,
nange lalo njivizivuka.
Kesi njiwangoco kuli yeni.
3Oloni njishaka kwendeka
kuli Muka-nzili yoshe.
Co njishaka kulihozola na Njambi
a mulonga wange.
4Yeni mu vaka-kumanga vya makuli,
mwapwa ngwe vimbanda va makuli
vaje kuvasa kukangwisa vanu.
5Mwamuvwa kwoloka,
co cikamwesa ngeci mu vaka-kunyanyama!
6“Tolilileni viyongola vyange,
co zivilileni vin̄anda
vitunda mu kanwa kange.
7Omwo vikajo mwendekela makuli ali Njambi?
Nakuvanda cimbango ali ikeye?
8Yeni mukamwimanena ndi?
Kuma mukasompela mulonga wendi ku mbanja ndi?
9Nga Njambi akengesesa manene ali yeni,
kuma akawanamo cuma cimo cacivwa muli yeni ndi?
Kuma mwayongola ngeci mwasa kukwisa Njambi
ngwe mumukakwisa vanu ndi?
10Nameme kusompa kweni kunapu kwa mu vushweke,
oloni ikeye akamyendekelako,
11co nzili yendi ikamizivisa lyova.
12Visimo vyeni vinapu vyangoco ngwe lito,
co vimata vyeni vinapu ngwe livu lya vuma lyakuvujuka.
13Munapande kwoloka kuluu,
njeceleni yange njendeke,
co vije vishaka kunjiwana,
vinjiwane ngano.
14“Omwo vikajo njiitikisamo mwonyo wange?
15Cinyangavili cange coshe cinahu,
ngecivene, nga Njambi anjitsiya,
co kuli mulonga ndi?
Yange njilinakwambulula
mulonga wange kuli ikeye.
16Eci lalo cikapwa ngeci
kusimpa kwange kukanjamena,
omwo kukwesi munu muka-vuvi
uje asa kusimpa ku kenga kuli Njambi.
17Co tolilileni ku majwi ange
omo njiwalumbununa.
18Yange njalivwaesela cimweja
kwambulula mulonga wange,
omwo njazivuka ngeci njili mu vushunga.
19“Njambi, unjana mulonga ndi?
Nga ngoconi, co njikoloka na kutsa.
20Njambi njitave njilombe vyuma vivali,
kunjikakushwekelavyo embwe,
21likele kunjihisa,
kesi unjitsene nakunjizivisa lyova.
22“Yove Shukulu Njambi endeka akulivanga,
co yange njikakumbulula.
Nambe njitave njendeke,
co yove unjikumbulule.
23Vivi vyange vinapu vikajo?
Co kuviya mukajo cinjinalingi?
Milonga mukajo unjisompa nayo?
24“Omwo vikajo unjivandesela cihanga cove?
Omwo vikajo unjiyongola ngwe nji citozi cove?
25Yove ulinakweseka kunjizivisa lyova ndi?
Yange njiwangoco, njinapu ngwe liputa,
ulinakulwisa mpindi ya cishati cakuma.
26“Kusompa kwove kwakunjilwisa kunapu kwakukalu,
nameme vije vinjalingile omo njapwile mukwenje.
27 #
Yom 33:11
Yove wakutu malyenge ku mendi ange,
ulinakwilula linambo lyoshe njilinakwenda,
co lalo ulinakwilula mwanja wange.
28Omwo cuma eci, yange njinafu ngwe vungululu
vwa citale cakuvola,
ngwe kazaku kakuliwa ku vimenzi.
The Bible in Mbunda ©The Bible Society of Zambia, 2006