Yombi 14
14
1“Munu woshe wakusemuka ku munakazi,
matangwa endi apwa amandondo,
ashula na tuyando.
2Tulinakukola nakujujwama vwasi ngwe vishani,
co tuzimuka ngwe munzinze.
3Kuma Njambi, ukakenga ali yange,
nakunjisompa mu mbanja ndi?
4Cuma nacimo cai cakujela
citunda ku cuma cakujeneka kujela ngwe munu.
5Simbu yakuyoya kwendi vanaiseteka laja,
nakutuma kwa vingonde vyendi vili kuli yove.
Nginga yendi unaitu laja
ngeci kasa kuyijomboka.
6Mu ngila eyi, mwecele ngeci ahwime,
co museze endi lika ajolele,
ngwe muka-kupangela fweto ajolela,
omo amanesa vipangi vya litangwa lije.
7“Kucili cinyangavili ku muti omwo vaushinja,
co ujovelela lalo,
na munango wawo wa njovolwezi ukajovelela.
8Nameme mizi yawo ikolela mu livu,
co nsina yawo yumina mu livu,
9oloni omo uziva vutonwezi vwa mema,
co ujovelela ngwe muti wauha.
10Nga munu atsa,
co kuli ikeye vinahuko,
omo atula mwonyo,
co ali kulijo?
11“Ngwe muje muwakomu mema a mu ndonga,
co mema alikungiya amo nakuma,
12vanu vakatsi, co kuvesi kwinduka lalo,
co kuvakenduka lalo noo melu akahwa,
co kuvakakasumuka mu tulo twavo embwe.
13Nga unatavele kunjishweka mu lifuti lya vatsi,
ngeci njivandemo noo vukalu vwove vuneti,
nakunjitumbwila simbu yakunjanuka.
14Nga munu atsa, kuma asa kuyoya lalo ndi?
Oloni njikavandamena visimbu vyavivwa,
njikavandamena noo simbu eyi ya tuyando inahu.
15Ukanjisana, co njikakutava,
co nove ukashaka kutumama nange,
munu uje iwatangele.
16Asinoni ukalava manambo ange,
oloni kuukalandula vivi vyange.
17Ukavisambesa nakuvyumbila kulyala,
ukazimangana kupenga-penga kwoshe kunjalingi.
18Simbu ikaija omo minkinda ikawa,
na mamanya akatunda mu myela yayo.
19Co mema aliwisa mamanya,
na nyonzi yakama ikasindumwina livu kulyala,
ngecivene, unyongesa cinyangavili ca munu.
20Yove uhyana munu,
co ikeye aitilila myaka yoshe,
utengulula cihanga cendi nakumutuma kweka.
21Vana vendi nambe vavasingimika,
ikeye kacizivuka, nambe vavashaula,
ikeye kacimono.
22Ikeye aziva lika kuvavala mu muvila wendi,
nakuviilila mu mbunge yendi.”
The Bible in Mbunda ©The Bible Society of Zambia, 2006