Yombi 12
12
Yombi
1Co Yombi wakumbulwile ngwendi,
2“Kukwesi vimata vyai,
yeni vene vanu vaje,
omo mukatsa, co mana akahwa.
3Oloni nange njili na mana ngwe yeni,
kumwanjituvakanene embwe.
Iya kazivuka vimunendeka?
4Nameme vasamba vange
valinakunjijola ololo, valinakujola,
nameme nji muka-vushunga
na muka-kujeneka mulonga,
oloni kwakele simbu imo omo Njambi
wakumbulwile malombelo ange.
5Yeni kumwesi mu tuyando embwe,
oloni mulinakunjishendumuna,
mupupa munu uje ali kuyehi nakuwa.
6Oloni vezi na vaka-vuvi
valinakuyoya mu kwoloka,
nameme nzili yavo vavenya,
ikeyo vapwisa njambi yavo.
7“Nameme tuzila na tusitu
vali na vyavingi vyakumilongesa,
8lombeni mana ku vikashama va mu kaye
na ku vikashama va mu mema a kalunga.
9Vyoshe vizivuka ngeci livoko lya Shukulu Kalunga
likelyo lyavipangele.
10Njambi lika ikeye atwamenena
myonyo ya vitanga vyendi,
mwonyo woshe wa munu wakala mu livoko lyendi.
11Ngwe ndaka yeni ijolela kumakela vyakulya,
co matwi eni ajolela kuziva majwi.
12“Tukulukazi vakala na mana,
oloni Njambi wakala na mana na nzili.
13Tukulukazi vakazivisisa,
oloni Njambi akazivisa, co wakala na nzili yakulinga cuma.
14Omo Njambi asiwula,
iya asa kutungulula?
Co iyajo asa kushokolola munu uje
yanashokela Njambi mu kamenga?
15Omo Njambi avindika nyonzi kunyoka,
co lilanga liija,
omo anyokesa nyonzi,
co livazi linyongesa kaye.
16Njambi wapwa Muka-nzili,
co simbu yoshe muka-kuhyana,
munu uje ivanakwisa na munu uje akwisa mukwavo,
voshe vanapu vanu va Njambi.
17Ikeye akatundisa mana a vaka-kushwana,
co apangesa vantwama ngwe vilema.
18Ikeye akatundisa vimyene a matanda,
nakuvapwisa vinzinda,
19ikeye ononwesa vaka-kukombelela,
co awisa vaka-nzili.
20Ikeye olwesa vanu vaje vavanakulaela,
co akatundisa mana a vakulunu.
21Ikeye akazivisa shwamwa vanu vaje valinakushwana,
nakumanesa nzili ya vaka-kushwana.
22Ikeye afukula vyuma vyakulova
vya mu lisusulungu,
nakutengulwila lisusulungu lyakama ku ceke.
23Ikeye akolesa miyati ya vanu,
co avanyongesa,
aamesa miyati ya vanu,
co avatwala ku vunzinda.
24Ikeye atundisa mana ku vantwama va asi,
co avendesa mu mambo mwakujeneka ngila.
25Co vapapateya mu lisusulungu mwakujeneka ceke,
co avapelyanganesa ngwe vaka-kupenda.
The Bible in Mbunda ©The Bible Society of Zambia, 2006