Yombi 11
11
Zofale
1Co Zofale kaNamate
wakumbulwile ngwendi,
2“Kuma kwendeka manene
cishungamesa munu ndi?
3Yombi, kuma yove wayongola ngeci
kesi tukukumbulule ndi?
Kuma kujokota kwove
kwasa kwolwesa vanu ndi?
Omo ushendumuna vanu
kuma kuvakuzivisa shwamwa?
4Yove ngwove vyendeka vyove vya vushunga,
co unendeka lalo ngwove
uwakujela ku mesho a Njambi.
5Nga Njambi atava ngeci akukumbulule!
6Nga nakuleka omwo kuyili mitambela ya vaka-mana,
co kuvili vyuma vyakulova manene
kuli munu vije kasa kuzivuka.
Njambi alinakukuhisa kamandondo lika
kutuvakana milonga yove.
7“Yove wasa kuwana vyuma vyakulova vya Njambi ndi?
Wasa kuwana aje ahwila vukama
vwa Njambi Muka-nzili yoshe ndi?
8Livu kulyesi naa alyahwila kuli Njambi,
oloni lyalova kutuvakana mana ove.
Njambi azivuka lifuti lya vatsi,
oloni yove kuulizivuka.
9Njambi wapwa wakama kutuvakana kaye,
co wajanjavala kutuvakana mema a kalunga.
10Nga Njambi akukwata nakukusompa,
iyajo asa kumuvindika?
11Njambi azivuka vanu vaje vanapu vangoco,
ikeye amona vilinga vyavo vyoshe vyavivi.
12Cinapu cacikalu ku vilema kukala na mana
ngwe mucapwa cacikalu ku vingolo kusema vimulu.
13“Yombi, kundika mbunge yove kuli Njambi.
Co olwela mavoko ove kuli ikeye.
14Tundisa vuvi na kupenga-penga ku njuvo yove.
15Mwa vushunga asinoni ukandula mesho ove
shwamwa,
co ukemana mbe kwa lyova.
16Asinoni ukevala tuyando twove,
ukatwivala ngwe njozi ije ineti laja.
17Mwonyo wove ukavyazima kutuvakana misha
ya akati ka litangwa,
nameme kukakala lisusulungu,
oloni likatwa ngwe ceke ca mutondo.
18Co ukayoya mwamuvwa
nakushula na cinyangavili,
Njambi akakunyunga,
nakukwana kuhwima.
19Kuukatewe vitozi vove embwe,
vanu vavangi vakakulomba ngeci uvakwase.
20Oloni mesho a vaka-vuvi akonwa,
co kuvakawana oku vakatewela.
Kuvakakala na cinyangavili, oloni vakatsa.”
The Bible in Mbunda ©The Bible Society of Zambia, 2006