Maako 7
7
Ngilyone afungulula vaMindyani
1Litangwa limo, Yelumbale ikeye Ngilyone, na vanu vendi vendukile mutondo-tondo, vatungile cilombo kumukulo wa Lisima lya Halonde. Co cilombo ca vaMindyani cakele mu cana ku kunto kumukulo wa Munkinda wa Mole.
2Co Shukulu Kalunga wendekele kuli Ngilyone ngwendi, “Ava vanu uli navo vanapu vavangi manene kuli yange ngeci njivane nzili yakufungulula vaMindyani, kutewa vaIsalele vakalyalesa ngwavo vakevo vavenya vanalyamena. 3#Kwi 20:8 Co ololo ambulula kuli vanu ngwove, ‘Munu woshe uje ali na lyova eluke kwimbo, co yetu tukakala kuno ku Munkinda wa Ngilyande.’ ” Ngecivene, vanu vakupwa 22,000 velukile, oloni kwasalele vanu vakupwa 10,000.
4Oloni Shukulu Kalunga wendekele kuli Ngilyone ngwendi, “Anga ucili na vanu vavangi manene. Vashelumwise ku ndonga, co yange njikakwangunwinavo kuje. Nga yange njikuleka ngwange munu ou napande kuya nove, co aye. Nga njikuleka ngwange munu ou kesi aye nove, co kesi aye nove embwe.” 5Ngecivene, Ngilyone washelumwisile vanu ku ndonga, co Shukulu Kalunga wamulekele ngwendi, “Angununa munu na munu uje akacula mema na ndaka yendi ngwe katali, kuli munu na munu woshe uje akulama a mavuli endi mukunwa mema.” 6Co vanalume vaje vakacwile mema na mavoko avo vapwile 300, co voshe vakwavo vakulamene a mavuli avo mukunwa mema. 7Co Shukulu Kalunga wendekele kuli Ngilyone ngwendi, “Njikamyamena kuli vaMindyani ali vanalume 300, vaje vanakacwile mema. Co leka voshe vanasalao veluke ku membo avo.” 8Ngecivene, Ngilyone watumine vaIsalele voshe ku membo avo, co kwasalele lika vanalume 300, vaje vasalele na vyuma vyoshe vya nzita, na malupembo. Co cilombo ca vaMindyani cakele mwisi yavo mu cana.
9Vutsiki vuje vene Shukulu Kalunga wendekele kuli Ngilyone ngwendi, “Shelumuka ku cilombo, omwo njinakwanaco mukucifungulula. 10Oloni nga uli na lyova lyakulwa, co ya na ngamba yove Pula. 11Co ukaziva vije valinakwendeka, cooni ukasimpa nakulwisa cilombo.” Ngecivene, Ngilyone na ngamba yendi Pula vashelumukile kumukulo wa cilombo ca vitozi. 12Co vaMindyani, na vaAmaleke, na vanalume va miyati ya vanu va mu mambo valishandwelele mu cana ngwe vimbimba mikumbi, co vakevo vakele na tumelo vavangi ngwe lishen̄avu lya ku ngenge ya mema a kalunga.
13Omo Ngilyone wetele, co wazivile munalume alinakuleka musamba wendi njozi yalotele. Wendekele ngwendi, “Njaloto mukasha wa likende lya mbale ya maumwa unandumukila mu cilombo cetu nakuwisa mbalaka. Co mbalaka yawile, yatengulukile mukali.”
14Musamba wendi wamukumbulwile ngwendi, “Eci kucalumbunukile mweka! Ou ukewo mukwale wa Ngilyone muna Yowashe kaIsalele! Njambi nakundika vaMindyani na mbunga yoshe ku mavoko endi!”
15Co capwile ngeci omo Ngilyone wazivile njozi ya uje munalume na muje muyalumbunukilile, co walemesele Shukulu Kalunga. Asinoni welukile ku cilombo ca vaIsalele wendekele ngwendi, “Katukeni! Shukulu Kalunga nakundika mbunga ya vaMindyani ku mavoko eni!” 16Co waangunwine vaje vanu vendi 300 mu vimbunga vitatu, co waanene munu na munu lupembo, na njava, amo na mutetango mukati kayo. 17Co wavalekele ngwendi, “Omo njeta kumukulo wa cilombo, co njikengeni yange, lingeni vyoshe vije vinjilinga yange. 18Omo yange na mbunga yange twimba malupembo etu, asinoni yeni voshe mwimba malupembo eni nakuzengeleka cilombo nakutambeka ngweni, ‘Omwo ali Shukulu Kalunga, na omwo ali Ngilyone!’ ”
19Ngilyone na vanu vendi 100 vezile kumukulo wa cilombo simbu kanda vacete mukati ka vutsiki, mu kasimbu lika omo muka-kunyunga mukwavo namwingi. Asinoni vembile malupembo nakutsiya vinjava vije vakwatele mu mavoko avo. 20Co vimbunga vije vitanu vakwatele mitetango mu mavoko avo a ku cimoshwe na malupembo mu mavoko avo a ku cilyo, co vatambekele ngwavo, “Mukwale wa Shukulu Kalunga nou wa Ngilyone!” 21Munu na munu wemanene mu mutambela wendi nakuzengeleka cilombo, co vaMindyani voshe vatewele nakutambeka. 22Omo vanu va Ngilyone vakele nakwimba malupembo avo, co Shukulu Kalunga walingisile vitozi va nzita kulilwisa vakevo vavenya na mikwale yavo. Co vatewelele ku Zaletane kweta na ku Mbete Shita, na ku nginga ya Avele Mehola kuyehi na Tavate.
23Asinoni vanalume vatundile ku miyati ya vanu va Nafetali, na Ashele, na Manase valikungulwile amo, co vashekele vaMindyani. 24Ngilyone watumine tunganda mu lifuti lyoshe lya malundu lya Efalime ngwendi, “Shelumukeni nakulwisa vaMindyani. Akeni Ndonga ya Yondau na vana va vindonga mukati kweta na ku Mbetevala, kutewa vaMindyani vajavuka.” Co vaEfalime valikungulwile amolika, co vaakele Ndonga ya Yondau na vana va vindonga mukati kweta na ku Mbetevala. 25Co vakevo vafungulwile vimyene vavali va vaMindyani, Oleva, na Zeve. Co vatsiilile Oleva ku Limanya lya Oleva, co vatsiilile Zeve a Cikamwino ca Zeve. Co vatwaleleo kusheka vaMindyani, vanenele mitwe ya Oleva na Zeve kuli Ngilyone, uje wakele mu ngangela musambwa ya Yondau.
The Bible in Mbunda ©The Bible Society of Zambia, 2006