Maako 6
6
Shukulu Kalunga atuma Ngilyone
1Co lalo vanu va Isalele valingile vuvi ku mesho a Shukulu Kalunga, ngecivene, Shukulu Kalunga wavakundikile ku mavoko a vaMindyani vaje vavashwanene myaka itanu na ivali. 2VaMindyani vapwile vaka-nzili kutuvakana vaIsalele, co vanu va Isalele vaile nakukavanda mu manzenzengoma na mu mitambela ikwavo yakujeneka vushonde mu malundu. 3Co capwile ngeci, omo vaIsalele vakunine vimbuto vyavo, co vaMindyani, na vaAmaleke, na miyati ya vanu va mu mambo vezile nakuvalwisa. 4Vatungile vilombo vyavo mu lifuti, co vaviisile vimbuto kutwala ku Ngaza. Vambatele vimanga voshe, na vingombe, na vimulu, co nacimo cai vasezelele vaIsalele cakuvayoyesa. 5Vaile na vimuna vavo, na vimbalaka vyavo, co vungi vwavo vapwile ngwe vinjame vya vimbimba. Co naumo wai wasele kulava vanu na tumelo twavo omwo vatumine manene. Vaile nakuviisa mu lifuti, 6vaIsalele vavayandesele manene kuli vaMindyani. Co valililile kuli Shukulu Kalunga ngeci avakwase.
7Omo vanu vaIsalele valililile kuli Shukulu Kalunga ngeci avakwase kuvalwila kuli vaMindyani, 8co Shukulu Kalunga wavatuminine muka-kwimanena uje wavanenelele lijwi lyakutunda kuli Shukulu Kalunga Njambi ya Isalele ngwendi, “Yange njamitundisile mu Ingito mu lifuti lya vundungo. 9Yange njamyamenene kuli vaka-Ingito na kuli voshe vaje vamilwisile mu lifuti lino. Co njavashekele ngwe omo yeni mwakele nakuya kulutwe nakumyana lifuti lyavo. 10Co njamilekele ngwange yange njapwa Kalunga Njambi yeni, kumwapandele kulemesa vinjambi va vaAmoli, vaka-lifuti lije mulinakuyoyelamo. Oloni kumwanjitolilile.”
11Asinoni kangelo ka Shukulu Kalunga wezile kwimbo lya Ofela nakutumbama mwisi ya muti wa Oke, uje wapwile muti wa Yowashe, wa ku cikota ca Aviyezele. Co munendi Ngilyone wakele nakujungula tiliku mu vushweke mu cikamwino ca vinyu, ngeci vaMindyani kesi vaimone. 12Co kangelo ka Shukulu Kalunga washolokele kuli ikeye wendekele ngwendi, “Shukulu Kalunga ali amo nove, yove u munalume wakusimpa na nzili!”
13Ngilyone wendekele kuli ikeye ngwendi, “Oloni Shukulu, omwo vikajo vyoshe evi vilinakulingiwa kuli yetu nga Shukulu Kalunga ali netu? Vili kulijo vikomokeso vyendi vije vatulekele vatatetu ngwavo Shukulu Kalunga ikeye wavatundisile mu Ingito? Oloni ololo Shukulu Kalunga natuseza, co natukundika ku mavoko a vaMindyani.”
14Asinoni Shukulu Kalunga wamukengele, co wendekele nendi ngwendi, “Ya na nzili yoshe eyi uli nayo ukamene vaIsalele ku mavoko a vaMindyani. Yange vavenya njinakutumu.”
15Ngilyone wamukumbulwile ngwendi, “Vatijo njasa kwamena vaIsalele? Kuma cikota cange cikeco cakuzeya manene ku muyati wa Manase, co yange njiwamundondo mu naanga yange.”
16Shukulu Kalunga wamukumbulwile ngwendi, “Mwa vushunga yange njikakukwasa. Ukafungulula vaMindyani voshe.”
17Ngilyone wamukumbulwile ngwendi, “Nga ololo njinawana kutetela ku mesho ove, njaneko cizivukiso cimo nga mwa vushunga unapu u Shukulu Kalunga ou alinakwendeka nange. 18Shukulu kesi uye ngoco, noo njinanena n̄ombelo ya vyakulya.”
Co ikeye wendekele ngwendi, “Kunjii noo unelukamo.”
19Ngecivene, Ngilyone waile ku njuvo yendi, wakatelekele muna membe, co wavwaesele vunga vwa tiliku vwa makilo likumi walingile makende akujeneka musima. Waakele situ mu mutonga na musozi mu ndeo, co wavinenele kuli kangelo ka Shukulu Kalunga. 20Co kangelo wamulekele ngwendi, “Aka situ na makende akujeneka musima a limanya eli, itilao musozi akamwa yavyo.” Co Ngilyone walingile ngacije. 21Asinoni kangelo ka Shukulu Kalunga washwenene kuje ku situ na makende akujeneka musima, co wenikileo nakukambekao mulamu uje wakwatele mu livoko lyendi. Co tuhya twatuukile mu limanya, twenyekele situ na makende. Asinoni kangelo walavukile.
22Asinoni Ngilyone wazivukile ngeci kuma mwa vushunga uje wapwile kangelo ka Shukulu Kalunga yanamwene, co ikeye wendekele na lyova ngwendi, “Kaye kange Shukulu Kalunga wa Akamwa ya Vyoshe! Njamono kangelo kove mesho na mesho!”
23Oloni Shukulu Kalunga wamulekele ngwendi, “Kesi uzive lyova, kwoloka kukale nove, kuutsi embwe.” 24Co Ngilyone watungilile Shukulu Kalunga mutula nakuuluka lizina lyawo ngwendi, “Shukulu Kalunga Ikeye Kwoloka.” (Na lelo lino vene mutula uje anga wemanena kuje ku Ofela, mwela uje wakundama ku cikota ca Aviyezele.)
25A vutsiki vuje vene, Shukulu Kalunga walekele Ngilyone ngwendi, “Ambata ngombe wa nkomba wa isho na ngombe wa nkomba mukwavo wa myaka itanu na ivali, co siwula mutula wa isho wa Mbale, co vatula manda ya Ashela, ije ili kumukulo wawo. 26Co tungila Shukulu Kalunga Njambi yove mutula wa vutongwe akamwa ya limanya. Asinoni wambate uje ngombe wa nkomba wamucivali, mwenyeke woshe apwe n̄ombelo, na vitale vije vya manda ya Ashela vije unavatozola.” 27Ngecivene, Ngilyone waile na vangamba vendi likumi, co walingile ngwe muje mwamulekele Shukulu Kalunga. Co ikeye wazivile lyova lya naanga yendi na vanu va mu limbo lije, ngeci kasele kucilinga mutanya mwelu, oloni wacilingile simbu ya vutsiki.
28Omo vanu va muje mu limbo vendukile alikaki mutondo, vawanene mutula wa Mbale vanausiwula, na manda ya Ashela vanaivatozola, co na uje ngombe wa nkomba wamucivali vanamukombelela laja a mutula uje uvatungile kuje. 29Co valihozwele umo na mukwavo ngwavo, “Iyajo nalingi eci?” Co omo vasetelele nakulihozola, vawanene ngeci kuma Ngilyone muna Yowashe ikeye nacilingi. 30Asinoni vaje vanalume va mu limbo vendekele kuli Yowashe ngwavo, “Tuwisa munove ano anja ngeci tumutsiye! Nasiwula mutula wa Mbale nakuvatozola vimanda vya Ashela kumukulo wawo.”
31Oloni Yowashe wendekele kuli voshe vaje vamuzengelekele ngwendi, “Mulinakwimanena Mbale ndi? Indi mushaka kumwamena? Munu woshe uje amwamena vamutsiye mutondo uno vene. Nga Mbale napu njambi, mweceleni alyamene ikeye vavenya, omwo munu umo nasiwula mutula wendi.” 32Co tunde aje vene Ngilyone vamulukile lizina ngwavo Yelumbale,#6:32 YELUMBALE: Mu ciHevelu lijwi eli linalumbunuka ngwalyo, eceleni Mbale alyamene ikeye vavenya. omwo Yowashe wendekele ngwendi, “Eceleni Mbale alyamene ikeye vavenya, unapu mutula wendi ou vanasiwila asi.”
33Asinoni vaMindyani voshe, na vaAmaleke, na vanu va mu mambo vezile amo voshe, vajavukile Ndonga ya Yondau, co vatungile cilombo mu Cana ca Njezelele. 34Co Munzinzime wa Shukulu Kalunga wezile ali Ngilyone, co Ngilyone wembile lupembo mukusana vanalume va ku cikota ca Aviyezele ngeci vamukave. 35Co ikeye watumine tunganda kwita mu lifuti lyoshe lya muyati wa vanu va Manase, wavasanene ngeci vamukave. Co lalo watumine tunganda ku miyati ya vanu va Ashele, na Zembuloni, na Nafetali, na vakevo lalo vezile mukulipandakana nendi.
36Asinoni Ngilyone wendekele kuli Njambi ngwendi, “Yove unendeka ngeci ushaka kunjipangesa mukwovola vaIsalele, 37tala, njilinakwaka vwanda ano asi kuje tukajungwila tiliku. Nga ku mutondo kukakala lime a vwanda lika oloni asi akuma, cooni njikazivuka ngeci mwa vushunga vene ushaka kunjipangesa mukwovola vaIsalele.” 38Eci cikeco calingiwile. Alikaki omo Ngilyone wendukile mutondo-tondo, wakamwine vwanda nakuvuzenga manene, co kwatundile mema aje ashulisile lilonga. 39Asinoni Ngilyone wendekele kuli Njambi ngwendi, “Kesi unjiluvalele embwe, njitave ngeci njendeke nove lumo lalo. Tava ngeci vwanda vume, co asi oshe akale lime.” 40Vutsiki vuje vene Njambi walingile vije vyoshe. Co alikaki vwanda vwomine, oloni asi akele lime.
The Bible in Mbunda ©The Bible Society of Zambia, 2006