Maako 8
8
Kufunguluka kwa vaMindyani kwakumanesela
1Asinoni vanalume va Efalime vendekele kuli Ngilyone ngwavo, “Vikajo unalingila netu ngacije? Omwo vikajo kuwatusanene omo mwaile nakulwa na vaMindyani?” Co valinyengele manene a cuma eci.
2Oloni ikeye wavalekele ngwendi, “Evi njinalingi vinapu vyavindondo, kuvilyeseka nevi munalingi yeni. Nameme ngoco vundondo vwa cije mwalingile yeni vaEfalime, cinatuvakana vije valingile vaka-cikota cange coshe. 3Munima ya vyoshe evi, mu nzili ya Njambi mwatsiile vimyene vavali, Oleva na Zeve. Cikajo njalingile cakweseka na cije cimwalingile yeni?” Omo wendekele evi, co valikelele kuluvala.
4A simbu ije Ngilyone na vanu vendi 300 vezile ku Ndonga ya Yondau, co vajavukile. Nameme vajukile manene, oloni anga vene vakele nakusheka vitozi. 5#Mya 83:11 Omo vetele ku Sukote, co wendekele kuli vanalume va muje mu limbo ngwendi, “Shukulu, aneniko vanu vange makende. Vanajuka manene omwo njilinakusheka Zeva na Zalumuna, vimyene va vaMindyani.”
6Oloni vantwama va ku Sukote vendekele ngwavo, “Omwo vikajo twana vyakulya kuli mashwalale vove? Yove kanda ucifungulule Zeva na Zalumuna.”
7Ngecivene, Ngilyone wendekele ngwendi, “Mwamuvwa, omwo Shukulu Kalunga akakundika Zeva na Zalumuna ku mavoko ange, co njikamipupisa mambimbo na mishwena vya mu mambo!” 8Co Ngilyone waile ku Penyele, wendekele cuma cimo ngwe cije wendekele kuli vanalume va ku Sukote, oloni vanalume va ku Penyele vamukumbulwile ngwe muje muvamukumbulwile vanalume va ku Sukote. 9Ngecivene, Ngilyone wendekele kuli vakevo ngwendi, “Omwo njikeluka mu kwoloka, co njikasiwila asi aka kaposhi!”
10Co Zeva na Zalumuna vakele ku Kalekole amo na mashwalale 15,000 vaje vasaleleo ku mashwalale va miyati ya vanu va mu mambo, oloni mashwalale 120 vavatsiile. 11Co Ngilyone waile mu ngila yakushwangesa kumukulo wa mambo, ku ngangela ya Nomba, na Njongambeha, wavakasumwine nakuvalwisa. 12Co vimyene vavali va vaMindyani, Zeva na Zalumuna, vatewelele kulyala, oloni ikeye wavashekele nakuvafungulula, co washandwele nzita yavo yoshe.
13Omo Ngilyone welukile ku nzita ku Ngila ya ku Helese, 14wakwatele mukwenje watundile ku Sukote nakumwihula. Co uje mukwenje wasonekelele Ngilyone asi mazina a vaje vantwama va ku Sukote vakupwa 77. 15Asinoni Ngilyone waile kuli vaje vanalume va ku Sukote, co wendekele ngwendi, “Kumwanuka muje mumwavyanene kunjikwasa ndi? Mwendekele ngweni yeni kumwasa kwana vyakulya kuli mashwalale vange vaje vajukile, omwo te kanda njifungulule Zeva na Zalumuna. Mukemwo, ava vaka?” 16Co ikeye wanonele mambimbo na mishwena vya mu mambo, co wavipupisile vantwama va ku Sukote. 17Co ikeye lalo wasiwile kaposhi ka Penyele nakutsiya vanalume va muje mu nganda. 18Asinoni Ngilyone wehwile Zeva na Zalumuna ngwendi, “Vanalume va cifwa mukajo vaje mwatsiile ku Tavole?”
Co vamukumbulwile ngwavo, “Vafwile ngwe yove, umo na umo woshe walifwile ngwe muna mwene.”
19Co Ngilyone wendekele ngwendi, “Vapwile vandolome vange, vana va vanana vene. Njilisinga ngeci nga yeni mwavamenene, nange lalo nga kunjimitsii embwe.” 20Asinoni ikeye wendekele kuli Njetele munendi wa ntwatwa ngwendi, “Katuka uvatsiye!” Oloni mukwenje kashomwene mukwale wendi. Wazivile lyova, omwo wapwile mwanike.
21Asinoni Zeva na Zalumuna vendekele kuli Ngilyone ngwavo, “Ija ututsiye yove vavenya. Munalume ikeye akalingi vipangi vya munalume.” Ngecivene, Ngilyone wavatsiile, co wanonele vimande vije vyakele mu mikoshi ya tumelo twavo.
22Munima yevi, vaIsalele vendekele kuli Ngilyone ngwavo, “Tushwane yove, na vatekulwila vove vaje vakaija munima yove, omwo unatwamena kuli vaMindyani.” 23Oloni Ngilyone wavakumbulwile ngwendi, “Yange kunjikamishwana embwe, nambe munange kakamishwana. Shukulu Kalunga ikeye akapwa muka-kumishwana.” 24Oloni ikeye wendekele ngwendi, “Njimilomba ngeci munu na munu anjane vimbilingwa vije mwapukwile kuli vaMindyani.” (Capwile cilika ca vaMindyani kuzala vimbilingwa vya ngolinde ku matwi avo, omwo vapwile vaIshimaele vanu va mu mambo.)
25Co vanu vamukumbulwile ngwavo, “Mukemwo vene tujolela akukwanavyo.” Co vajangumwine nanga, munu na munu waakeleo vimbilingwa vije wakapukwile. 26Co Ngilyone wambatele vije vimbilingwa vya ngolinde vya vulemu vwa makilo 20, vulemu vuje kuvavukumbasanene ku vimande, na sungu, na vuzalo vwa linyu vuje vuvazalele vimyene va Mindyani, nambe miva ije ivazengelele ku mikoshi ya tumelo twavo. 27Co Ngilyone wafulile kamponya ka ngolinde, co wakaakele mu limbo lyendi mu Ofela. Co vaIsalele voshe vakengesele Njambi nima, vaile nakulemesa kamponya. Co eci capwile mweto kuli Ngilyone na naanga yendi.
28Ngecivene, Mindyani vaifungulwile kuli vaIsalele, co kukwakele lalo kuvashungwiya. Co lifuti lyakele mu kwoloka myaka makumi awana noo Ngilyone watsile.
Kutsa kwa Ngilyone
29Co Ngilyone welukile kwimbo lyendi, co wakakele kuje. 30Ikeye wakele na vana 70, omwo wakele na vanakazi vacikovelela vavangi. 31Co Ngilyone lalo wakele na lishano lya mbanja ku Shekeme, co uje lishano lya mbanja wakele na mwana wa munalume, wamulukile lizina lyendi Avimeleke. 32Co Ngilyone muna Yowashe watsile omo nakolo laja, co vamutsindile mu mbumbo ya ishe Yowashe ku Ofela, limbo lya cikota ca Aviyezele.
33Co munima ya kutsa kwa Ngilyone, vanu va Isalele kuvakulaelele lalo kuli Njambi, oloni valemesele Mbale. Co vatengulwile Mbale kupwa njambi yavo, 34vanu va Isalele vevalele Shukulu Kalunga Njambi yavo uje wavamenene ku vitozi vavo voshe vaje vavazengelekele. 35Co vaIsalele kuvakandelelele ku naanga ya Ngilyone ku vyuma vyoshe vyavivwa vije vyalingile kuli Isalele.
The Bible in Mbunda ©The Bible Society of Zambia, 2006