Maako 5
5
Mwaso wa Ndembola na Mbalake
1A litangwa lije Ndembola na Mbalake muna Avinowame vembile mwaso ou ngwavo,
2Shangazaleni Shukulu Kalunga!
Omwo vana va vimyene mu Isalele vatwamene kulutwe,
omwo vanu valyanene na cizango vakevo vavenya.
3Tolilileni, yeni vimyene!
Zivilileni, yeni vaka-kushwana!
Njikembila Shukulu Kalunga,
njikembila Shukulu Kalunga vishangala.
Ikeye Njambi ya Isalele.
4Omo Shukulu Kalunga
watundile ku minkinda ya ku Seila,
omo watundile mu lifuti lya vaEndome,
kaye kajajele,
na nyonzi yanyokele kutunda mwilu.
Eyo, mema atundile mu mashelwa etikile.
5 #
Kut 19:18
Minkinda yajajele
ku mesho a Shukulu Kalunga wa Sinai,
ku mesho a Shukulu Kalunga
Njambi ya Isalele.
6Mu matangwa a Shamengale muna Anate,
mu matangwa a Njaele,
matanga kuwakele nakwita mukati ka lifuti,
co vaka-kwenda vakele nakwitila kumukulo,
mu tungila twakulizenga-zenga.
7Co membo a vaIsalele asalele vingundu vyangoco,
noo yange Ndembola njezile,
njezile ngwe cisemi kuli vaIsalele.
8Omo vaangwile vinjambi vavaha,
co mu lifuti mwakele nzita.
Akati ka vanu 40,000 mu Isalele,
kuma kuli munu umo wambatele ntelo
nambe likunga ndi?
9Mbunge yange ili amo na vana va vimyene
va mu Isalele,
vaje valyanene vakevo vavenya
na cizango akati ka vanu.
Shangazaleni Shukulu Kalunga!
10Cambululeni,
yeni munalondo a vimulu vakutoka,
oku munatumbama a visileyi.
Neni vaka-kwenda na mendi,
cambululeni kwoshe kuje kumukaya.
11Tolilileni muyoyo wa mbunga ya vanu,
vaje valizengeleka ku masima,
valinakwendeka akuhyana
kwa Shukulu Kalunga,
akuhyana kwa vanu va Isalele!
Asinoni vanu va Shukulu Kalunga
vashelumukile mu vinganda vyavo.
12Induka, induka, yove Ndembola!
Induka, induka wimbe mwaso!
Katuka, yove Mbalake
utwale vinzinda vove,
yove muna Avinowame.
13Asinoni vanalume vaje
vendele mu mikana,
vezile kuli vaka-vukama,
co vanu va Shukulu Kalunga
vezile kuli yange,
vendele ngwe vaka-kulwa.
14Vatundile ku Efalime
nakwija mu cana,
valilile ngwavo,
“Tunaija nakumikwasa,
yeni vanu va Mbenjemani,
vavushoko vweni vali kuno.”
Co vaka-kushika vezile
kutunda kuli Makile,
co vamyata vashelumukile
kutunda kuli Zembuloni.
15Vantwama va Isakale
vezile amo na Ndembola,
eyo, Isakale wezile na Mbalake lalo,
co vakevo vamukavele mu cana.
Oloni muyati wa vanu va Luvena
valyangunukile,
vakevo kuvayongwele kwija embwe.
16Omwo vikajo vasalele munima
na vimanga?
Kutolilila kuli tunyungi
valinakwimba milozi
mukusana matanga?
Eyo, muyati wa vanu va Luvena
valyangunukile,
vakevo kuvayongwele kwija embwe.
17Co muyati wa vanu va Ngande
vasalele mu ngangela ya Yondau,
co muyati wa vanu va Ashele
vasalele ku cikuma ca mema a kalunga,
eyo, vasalele ku ngenge ya cikuma
ca mema a kalunga.
18Oloni vanu va Zembuloni na Nafetali,
valambwile myonyo yavo ku nzita.
19Co ku Tanake,
ku ngenge ya muna ndonga Mengindo,
vimyene vezile nakulwa,
co vimyene va ku Kanana valwile,
oloni kuvambatele siliva embwe.
20Co vingongonosi vyalwile mwilu,
vyalwile omo vyakele nakwenda mwilu,
co vyalwisile Sisela.
21Co livazi lya mu Kishone lyavakupwile,
ndonga ya ku san̄ulu,
Ndonga ya Kishone.
Njikenda, nakwenda kutwalao na nzili!
22Asinoni tuvalu vashatukile na misindo,
co asi vaakeleo vimweso na vimbemba vyavo.
23Co kangelo ka Shukulu Kalunga
wendekele ngwendi,
“Singa Meloze cisingo,
cisingo ali vaje valinakuyoya muje.
Vakevo kuvezile mukukwasa
Shukulu Kalunga embwe,
kuvezile ngwe mashwalale
mukumulwilako.”
24Njaele ikeye munakazi wakuvezika,
kutuvakana vanakazi voshe,
munakazi wa Hevele kaKeni.
Munakazi wakuvezika
kutuvakana vanakazi voshe
vaje vakele mu vimbalaka.
25Sisela walombele mema,
oloni ikeye wamwanene mavele,
co ikeye wamunenelele mavele akukonda
mu lilonga lyalivwa.
26Co wambatele pampalingo
ya mbalaka mu livoko limo,
na kavulo ka muka-kufula
mu livoko likwavo,
co wapupile Sisela,
co wamutavwile mutwe,
nakumupulyasana,
co wautavozwele tumbazuvwila-tumbazuvwila.
27Co watsikamene a mavuli,
wawililile asi anga nalalela,
Sisela watsikamene wawililile
ku mendi a Njaele,
watsikamene wawililile asi nakutsa.
28Co vaina ya Sisela
vashumbililile mu njanena.
Vashumbililile kunima
ya njanena yakushela mesho a vwanda.
Wehwile ngwendi,
“Omwo vikajo litemba lyendi
lineshwala kwija?
Omwo vikajo tuvalu twendi
vaneshwala kwiluka?”
29Co vanakazi vendi vaka-mana
vamukumbulwile,
co walihwile ikeye vavenya kushwakumo ngwendi,
30“Valinakushakezeka lika
kuwana vyuma vyakupukula nakulipangelavyo,
mumbanda umolika nambe vavali
kuli lishwalale na lishwalale,
na vuzalo vwavuvwa kuli Sisela,
na vinanga vyakwola
vya mu mukoshi wa vamwene.”
31Ngecivene, Shukulu Kalunga
vitozi vove voshe vakatsa ngacije vene,
oloni vaje vakuzema vakavyazima
ngwe misha yakutuuka kwa litangwa!
Co kwakele kwoloka mu lifuti myaka makumi awana.
The Bible in Mbunda ©The Bible Society of Zambia, 2006