Maako 18
18
Mika na muyati wa vanu va Ndani
1A simbu ije, kukwakele mwene mu Isalele. Co a matangwa aje vanu va muyati wa Ndani vashakezekele mutambela ngeci upwe wavo vatungemo, omwo te kanda vatambule mutambela wavo akati ka miyati ya vanu va Isalele. 2Ngecivene, vanu va Ndani vaangwile vanalume vatanu vakusimpa, mu naanga ya muyati wavo woshe, co vavatumine ku membo a ku Zola na Eshetawole mukunenga lifuti nakulohwelela. Omo vetele mu lifuti lya malundu lya Efalime, co vakele ku njuvo ya Mika. 3Co omo vakele ku njuvo ya Mika, vanangukile nakuzivuka endekesi ya uje mukwenje wa kaLevi, co vemanene nakumwihula ngwavo, “Vikajo ulinakulinga kuno? Iyajo wakunenele kuno?”
4Ikeye wavakumbulwile ngwendi, “Njakala na lizivasano limo na Mika, uje alinakunjifweta a vipangi vyange vya vuka-kukombelela.”
5Co vendekele kuli ikeye ngwavo, “Mbai, twihwile kuli Njambi nga tulinakwenda mwamuvwa mu vungenzi vwetu.” 6Co uje muka-kukombelela wavakumbulwile ngwendi, “Yeni mu kwoloka. Omwo Shukulu Kalunga alinakuminyunga a vungenzi vweni ovu.”
7Ngecivene, vaje vanalume vatanu vaile ku limbo lya Laishe. Co vamwene vati valinakuyoya vanu vaje vakelemo, ngwe ku cilika ca Sindone. Vapwile vanu va kwoloka nakushungama, kuvakele na vimata kuli vanu veka embwe, vakele na vyoshe vije vivashakele. Vakele nakulya vyakulya vyakutunda ku Sindone, co kuvapangele na vanu veka embwe. 8Omo vaje vanalume vatanu velukile ku Zola, na Eshetawole, vaka-lifuti lyavo vavehwile vati vakawanene. 9Co vavakumbulwile ngwavo, “Tuyeni tukalwise Laishe. Twakamwene lifuti, na vuvwa vwalyo. Kesi mukale kuno nevi vimulinga vyai, zambuleniko, tuyeni tukalitambule! 10Omo muketa kuje, mukawana ngeci munu naumo wai ashakezeka cuma. Lyapwa lifuti lyakama, co lili na vyuma vyoshe vije munu ashaka, Njambi namyanalyo.”
11Ngecivene, vanalume vakupwa 600 va ku muyati wa Ndani valipakatele vitwa vasezele Zola na Eshetawole. 12Co valamatele, vakatungile cilombo cavo mu kangombe ka yambi ku Kilyate Njelime mu Yunda. Omu mukemwo vatumbwile mwela uje ngwavo Cilombo ca Ndani. 13Co vatundile kuje, vezile ku njuvo ya Mika mu lifuti lya malundu lya Efalime.
14Asinoni vaje vanalume vaile nakunenga lifuti lya Laishe, vendekele kuli vandolome vavo ngwavo, “Yeni mwazivuka ngeci kuno a vinjuvo evi, kuli imo ili na njambi wa citi wakufwika na siliva ndi? Co kuli vinjambi vakwavo lalo na kangamuna kakwola. Vatijo muyongola mutunapande kulinga?” 15Ngecivene, vaile mu njuvo ya Mika muje mwakele uje mukwenje wa kaLevi, co vamwihwile ciindu cendi. 16A simbu ije vene mashwalale va Ndani vakupwa 600, vaje valipakatele vitwa vyavo mukulwa nzita, vemanene ku cikolo. 17Co vaje vaka-kunenga vatanu vakovelele mu njuvo, vanonele uje njambi wa citi wakufwika na siliva, na vinjambi vakwavo lalo, na kaje kangamuna kakwola, simbu uje muka-kukombelela ali ku cikolo na vaje vanalume vaka-nzita vakupwa 600.
18Omo vaje vanalume vakovelele mu njuvo ya Mika, vanonele vije vyuma vya cizila, co uje muka-kukombelela wavehwile ngwendi, “Vikajo mulinga?”
19Co vakevo vamulekele ngwavo, “Oloka kuluu, kesi wendeke lijwi limo. Ija amolika netu upwe muka-kunangula na muka-kukombelela wetu. Kuma yove kuushaka kupwa muka-kukombelela wa muyati woshe wa Isalele, kutuvakana kupwa muka-kukombelela wa naanga ya munu umolika ndi?” 20Eci cazivisile kuvwaa uje muka-kukombelela, co wanonele vyuma vije vya cizila, waile amo navo.
21Co vatengulukile, vafumineko vaile, amolika na vana vavo, na vimuna vavo, na vufuko vwavo vaile navwo. 22Vendele nunda yakama kutunda ku njuvo ya Mika, co Mika wasanene vanalume vaje valyatele na njuvo yendi. Co valikungulwile amo vashatukilile vaNdani nakuvawana, 23co vatambekele kuli vakevo. Co vanalume va ku Ndani vatengulukile nakwihula Mika ngwavo, “Mulonga ukajo? Omwo vikajo unaija na mbunga yoshe eyi?”
24Mika wavakumbulwile ngwendi, “Ngweni, ‘Mulonga ukajo?’ Munambata muka-kukombelela wange, na vinjambi vaje njapangele munaija navo! Co yange vika njinasala navyo?”
25Co vanalume va ku Ndani vamulekele ngwavo, “Yove kuwapandele kwendeka cuma cimo, kuvanga amo ushaka kuluvalesa ava vanalume ngeci vakulwise. Co nove na naanga yove yoshe mutse.” 26Asinoni vanalume va ku Ndani vaile. Mika wamwene ngeci vakevo vakele na nzili kutuvakana ikeye, ngeci watengulukile nakwiluka kwimbo.
27Vanalume va ku Ndani vambatele vyuma vije vyapangele Mika, co lalo vambatele muka-kukombelela wendi. Vaile nakulwisa Laishe, membo a vanu va kwoloka. Co vatsiilemo vaje vatungilemo nakwenyeka nganda. 28Co naumo wai wavamenene, omwo Laishe yakele kulyala na Sindone, co lalo kuvalyendelele na vakwavo vanu. Co lije limbo lyakele mu cana ku Mbetelehombe. Vanalume va ku Ndani vatungulwile ije nganda, co vakelemo. 29Vailukile lizina lya Ndani, lizina lya kukulwila yavo Ndani, muna Yakomba. Oloni laja vaitumbwile Laishe. 30Vanalume va ku Ndani vemikile tumponya mukuvalemesa, co Yonatana, muna Ngeleshone, muna Mosesa, na vana vendi vapwile vaka-kukombelela ku muyati wa Ndani noo vavatwalele mu vunzinda. 31Co vinjambi va Mika vasalele kuje simbu yoshe ije Mbalaka yakulemesela Njambi yakele ku Shilo.
The Bible in Mbunda ©The Bible Society of Zambia, 2006