Maako 17
17
Tumponya twa Mika
1Kwakele munalume umo lizina lyendi Mika, uje wakele mu lifuti lya malundu lya Efalime. 2Ikeye walekele vaina ngwendi, “Omo munu wevile vije vimbongo vyeni 1,100 vya mavundungulu a siliva, yeni mwasingile uje mwizi. Co njazivileko omo mwamusingile. Kengeni, vimbongo vyeni evi. Yange njavinonele.”
Co vaina vendekele ngwavo, “Shukulu Kalunga akuvezikise munange!” 3Co welwisile vije vimbongo kuli vaina, co vaina vendekele ngwavo, “Kutewa cisingo cikakale ali munange, yange vavenya njaka cikumiiyo cakukundika evi vimbongo kuli Shukulu Kalunga. Co vikevyo vikakwase kulinga kamponya wa citi wakufwika na siliva. Ngecivene, ololo njikakwilwisila awa mavundungulu a siliva.” 4Asinoni waviilwisile kuli vaina lalo. Co wanoneleo mavundungulu a siliva akupwa 200, waanene kuli muka-kufula, uje wafulile kamponya, washongele citi nakucifwika na siliva. Co wamwakele mu njuvo ya Mika.
5Co uje munalume Mika wakele na njuvo yakulemesela vinjambi. Watongele kangamuna kakwola nakushonga tumponya, co wemikile umo wa vana vendi kupwa muka-kukombelela wendi. 6#Maa 21:25 A simbu ije, kukwakele mwene mu Isalele, co munu na munu walingile cije cashakele. 7A simbu ije vene lalo kwakele mukwenje wa kaLevi uje wakele mu limbo lya Mbetelehema mu Yunda. 8Ikeye watundile mu Mbetelehema mu Yunda wakashakezekele mutambela weka wakukakala. Omo wakele nakwenda, wetile ku njuvo ya Mika mu lifuti lya malundu lya Efalime. 9Co Mika wamwihwile ngwendi, “Utunda kuli?”
Ikeye wamukumbulwile ngwendi, “Njapwa nji kaLevi, njitunda ku Mbetelehema mu Yunda. Njilinakushakezeka mwela wakutunga.”
10Co Mika wendekele ngwendi, “Kala nange, ngeci upwe muka-kunangula na muka-kukombelela wange, co a mwaka na mwaka njikakwana mavundungulu a siliva akupwa 10, na vuzalo, na vyakulya lalo.” 11Co uje mukwenje wa kaLevi watavele kukala amo na Mika, wapwile ngwe muna Mika vene. 12Co Mika wemikile uje mukwenje kupwa muka-kukombelela wendi, uje mukwenje wakele mu limbo lya Mika. 13Co Mika wendekele ngwendi, “Ololo njili nou kaLevi kupwa muka-kukombelela wange, njazivuka ngeci Shukulu Kalunga akashungamesa vyuma vyoshe, co vikapwa vyavivwa kuli yange.”
The Bible in Mbunda ©The Bible Society of Zambia, 2006