Maako 19
19
KaLevi na lishano lyendi lya mbanja
1A simbu ije, kukwakele mwene mu Isalele, kwakele kaLevi umo wakele mu lifuti lya malundu lya Efalime. Wakele na lishano lyendi lya mbanja mu Mbetelehema mu Yunda. 2Oloni uje lishano lya mbanja waluvalele na munalume wendi, co welukile ku njuvo ya ishe ku Mbetelehema, wakakele kuje vingonde viwana. 3Asinoni munalume wendi wamukavele, nakweseka kumusindiya kwiluka kuli ikeye. Ikeye waile na ngamba yendi na vimulu vavali. Co uje munakazi watambwile mwamuvwa munalume wendi uje kaLevi ku njuvo ya ishe, co omo ishe wamumwene, wamutambwile nakuvwaelela manene. 4Co ishemweno wamulambelelele ngeci avandame kuje, co wakele kuje matangwa atatu. Muvuvali vwavo munalume na munakazi valile nakunwa. 5Co litangwa lyamuciwana, vendukile a mungulungengu, valivwaeselele kuya. Oloni ishe ya uje mumbanda wendekele kuli uje ishemweno kaLevi ngwendi, “Kacilyeni tai vyakulya akulivanga, ngeci muzive mwamuvwa, asinoni muya.”
6Ngecivene, vaje vanalume vavali, vatumbamene nakulya nakunwa amo. Co uje ishe ya mumbanda wamulekele ngwendi, “Kala kuno vutsiki vuno lalo nakulivwaelelesa yove vavenya.” 7Co uje munalume wa kaLevi wakatukile ngeci aye, oloni ishemweno wamusindiiye ngeci akale, ngecivene, walalele vutsiki vuje lalo. 8A litangwa lyamucitanu, ku mutondo-tondo, wakatukile nakuya, oloni ishe ya uje mumbanda wendekele ngwendi, “Acilye vyakulya tai. Vandamena tai noo ku mutanya.” Ngeci vaje vanalume vavali valile amolika.
9Omo uje munalume, na lishano lyendi lya mbanja, na ngamba yendi vashangumukile lalo kuya, co ishemweno wendekele ngwendi, “Kenga, ololo lyatoko laja, mwamuvwa kaleni kuno vutsiki vwoshe. Ololo kwija lisusulungu, laleni kuno vene, co mukakala na simbu yaivwa. Imene mukalimeneka mutondo-tondo a vungenzi vweni vwakuya kwimbo.”
10Oloni uje munalume katavele kulala kuje vutsiki vuje embwe, co wakatukile waile, wetele kuje kwalishungama na Njevushi (ikeyo Yelusalema). Wakele na vimulu vavali vakulemeka visileyi, co na lishano lyendi lya mbanja wakele amo nendi. 11Co omo vakele kuyehi na Njevushi, litangwa lyatokele, co uje ngamba wendekele kuli shukulu yendi ngwendi, “Tuyeni mwimbo lya vaNjevushi, tukalalemo.”
12Oloni shukulu yendi wamukumbulwile ngwendi, “Kutwasa kulala mu limbo eli, vanu vamwo kesi vaIsalele. Tutuvakaneni tuye ku Ngimbeya. 13Kanapu kanunda kakandondo lika, co tukalala ku Ngimbeya nambe ku Lama.” 14Co vatuvakanene Njevushi, vaile kulutwe mu vungenzi vwavo. Omo litangwa lyatokele, vetele ku Ngimbeya, lifuti lya muyati wa vanu va Mbenjemani. 15Co vaangunukile, vakalalele kuje. Vakakele mushandangala yangoco ya limbo, omwo naumo wai wavaanene kwakulala vutsiki vuje.
16Simbu vacikele kuje, mukulunu umo wezile omo wamanesele vipangi ku lihya. Ikeye wakulivanga mukutunda ku lifuti lya malundu lya Efalime, oloni ikeye a simbu ije wakele mu Ngimbeya. (Oloni vanu vakele kuje vamo vatundile ku muyati wa Mbenjemani). 17Co uje mukulunu wandwile mesho endi, wamwene uje mungenzi mushandangala yangoco ya limbo, co wamwihwile ngwendi, “Utunda kuli? Co lalo ulinakuya kuli?”
18Co uje kaLevi wamukumbulwile ngwendi, “Tutunda ku Mbetelehema mu Yunda, co tulinakwiluka kwimbo lyetu, mu lifuti lya malundu lya Efalime kunjakala. Njinakele mu Mbetelehema mu Yunda, co ololo njilinakuya ku njuvo ya Shukulu Kalunga, oloni naumo wai nanjitambula mu njuvo yendi, 19nameme ngoco, tuli na vyakulya, na mwila wa vimulu vetu, na makende a lishano lyange lya mbanja, nawa ange, nawa a ngamba yange. Tuli na vyuma vyoshe vije tushaka.”
20Co uje mukulunu wa munalume wendekele ngwendi, “Kwoloka kukale nove, njikakwana vyoshe viwushaka! Kuwapandele lalo kulala mushandangala yangoco vutsiki vuno embwe.” 21Ngecivene, wavatwalele ku njuvo yendi, walisile vimulu vavo. Co vangenzi vendi vajwelele ku mendi avo nakutambula vyakulya nakunwa.
22Omo vakele nakulivwaelelesa vakevo vavenya, co vanu vaka-vuvi vezile kutunda muje mu limbo, vazengelekele ije njuvo nakushangumuka kumbombola a lipito. Co vendekele kuli uje mukulunu wa munalume ngwavo, “Tuwisa uje munalume naija ku njuvo yove! Tushaka kulala nendi!”
23Oloni uje mukulunu wa munalume watuukile anja, co wendekele kuli vakevo ngwendi, “Embwe, vasamba vange! Kesi mulinge vuvi vwa cifwa cangacije embwe! Ou munalume napu mungenzi wange. 24#Kus 19:5-8 Kengeni! Munange wa munakazi ou ali muno nange, ikeye kanda acilimone na munalume, co na lishano lya mbanja lya mungenzi wange eli. Njivatuwisa ololo, co mwasa kulinga vyoshe mushaka kuli vakevo. Oloni kesi mulinge cuma ca vunyengwe vwangacije kuli munalume ou embwe!” 25Oloni vaje vanalume kuvamutolililile. Ngecivene, uje kaLevi watuwisile lishano lyendi lya mbanja anja, co wavaneneye. Co vakevo vamuviisile vutsiki vwoshe noo mutondo. 26A mungulungengu, munakazi wezile nakuwila asi ku cikolo ca lipito lya njuvo ya uje mukulunu, muje mwakele munalume wendi. Co ikeye wakele kuje noo litangwa linaki. 27Co munalume wendi wendukile mutondo, omo washokolwele ku lipito ngeci atuuke, co wawanene lishano lyendi lya mbanja anga nalala mu cikolo ca njuvo, mavoko endi anakwata a lipito. 28Co ikeye wendekele ngwendi, “Induka tuye.” Oloni kakumbulwile. Ngecivene, wamwakele a cimulu cendi, co waile kwimbo lyendi. 29#1 Sam 11:7 Omo wetele, wakovelele mu njuvo, wanonele moko. Co watetangele muvila wa lishano lyendi lya mbanja vipuka likumi na vivali, co watumine cipuka cimo ku muyati umo na umo wa miyati likumi na ivali ya vanu va Isalele. 30Munu woshe uje wacimwene wendekele ngwendi, “Cuma eci kanda cilingiwe tunde aje vaIsalele vatundile mu Ingito! Singanyekeni vati tunapande kulingao!”
The Bible in Mbunda ©The Bible Society of Zambia, 2006